LEVI 12
12
Khungarü Zübe Dunglim Müsühkhitkhi
1 Atungpuhnü Mosa ki tha, 2Israelrü mihtsürübo ki thaang, Aliberü khülang mübünkeangde kambah tsührü athrürü zübesho, anihbe nimung thüne khiungde mümüsühkhi labah; alibe ju nihbe khinu shihcham arümuro nangde lah. 3Tüsho nimung atizheah ni khungarü ju tsütabahang. 4Tüsho thiyih tsokhi chingnü müsühkhitpü nimung samrükheak mahsam aleangbah; alibe müsühkhitpü nimung mübankhityi khiungde, anihbenü kukruk amüsüh tümü she muqiu, yungsho arüngyam ching she marü.
5Tüshe alibenü tsührü aliberü zübesho, anihbe nimung thürükheak phüyi mümüsühkhi labah, ju anihbe khinu shihcham arümuro nangde lah; tüsho anihbe thiyih tsokhi chingnü müsühkhitpü nimung rukrükheak thuruk aleangbah.
6Küyimki alibe müsühkhitpü nimung bankhitbanü, tsührü athrürü yungsho aliberü dün thsüthsü, alibenü kam khülang bankhi namfimihnunu Atungpuh shorupung khimyam ripit ki amükeambuh kilim taka kingaünpü handarübah, tüsho müthrithrümpü yungsho chithüreku, neak kingaünpü jihbah, 7tüsho amükeambuhnü alibe münean dünthsükhipü thsüde kingaünbo ju Atungpuh kilim jihbah, tüsho alibe müsühkhitbah. Haruk, alibenü tsührü athrürü yungsho aliberü zübeshu rhimobeah.
8Alibenü namfimihnunu müjihkhuksho, anihbenü müthrithrümpü mahne yungsho chithüreku mahne handarübeah, khülang ju taka kingaünpü tüsho püpü ju neak kingaün thsungkheak, tüsho amükeambuhnü anihbe münean dünthsükhipü ju kingaün jihbah, tüsho alibe müsühkhitbah.
Currently Selected:
LEVI 12: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
