LEVI 11
11
Atsühbe le Amütsühbe Shiwühbo
(Yuzüng 14.3-21)
1Tüsho Atungpuhnü Mosa le Aron büne ki tha, 2Israel tsührübo ki thaang, Alomi ching lakhi shiwühbo lung nüsanü atsühpü shiwühbo ju: 3shiwüh bolung abiuo dübeakkhi tüsho mukhiuhkhitloa müjakkhi mungjibo, nüsanü atsühpü kuklah. 4Judüalalashe mukhiuhkhitloa müjakkhi yungsho abiuo dübeakkhi bolung nüsanü harü dütsüh: kemel, tümüde apinü mukhiuhkhitloa müjakchoh tüshe abiuo müdübeak, ju nüsa thsungkheaknü mümüsüh. 5Loyeak, tümüde apinü mukhiuhkhitloa müjakchoh tüshe abiuo müdübeak, ju nüsa thsungkheaknü mümüsüh. 6Ayipungshih, tümüde apinü mukhiuhkhitloa müjakchoh tüshe abiuo müdübeak, ju nüsa thsungkheaknü mümüsüh. 7Tüsho kheaknu, tümüde abiuo dübeaklah tüshe apinü mukhiuhkhitloa mümüjak, ju nüsa thsungkheaknü mümüsüh. 8Jurü shih nüsanü dütsüh yungsho nüsanü ashemi kheak she düqiu; jurübo nüsa thsungkheaknü mümüsüh.
9Nüsanü ke ching lakhi thüngüh aghi tüsho aphülap kihkhi–ketobo yungsho ayungbo ching lakhi athrünkhi tsühpü kuklah. 10Tüshe ketobo yungsho ayungbo ching lakhi lorilokobo tümüshe aghi tüsho aküp mükihkhibo nüsanü mütsühbeah. 11Hadürü lorilokobo nüsanü mümüsühkhi khebeah. Nüsanü jurü shih dütsüh yungsho ashemibo she düqiu. 12Nüsanü ke ching tümüshe aghi tüsho aphülap mükihkhi dütsüh.
13Nüsanü wuhnu harü athraneanbebo dütsüh: müleang, müleangtopü, ke-müleang, 14arilupü, müleangmuchu, 15khüyak mungjibo, 16kewühtopü, 17lungru, thüngüh tsühbe lungru, lungrutopü, 18kewunu, loshelungru, merham, 19kewuhnu, kewüh mungjibo, asherü-wuhnu, tüsho phihnuliplip.
20Aghi kihbe lorilokobo ajing phüyinü abübe alala nüsa thsungkheaknü mümüsüh. 21Tüshe aghi kihbe loriloko ajing kihbah alo kheak jukde atsahbe nüsanü atsühpü kuklah. 22Nüsanü harü tsühpü kuklah: tangkho mungjibo, muthsutangkho mungjibo, jerepung mungjibo, tüsho müngrhüh tangkho mungjibo. 23Tüshe aghi kihbe lorilokobo ajing phüyi kihkhi nüsa thsungkheaknü mümüsüh.
Mümüsühkhi Shiwühbo
24Tüsho hade athsükhinü nüsa mümüsühde akambah; sherünü loriloko ashemibo qiubanü arelim khiungde mümüsüh. 25Tüsho sherünü jurü ashemibo khürü lang she ahanbanü apinü nihbuh khimmih müsühbah tüsho arelim khiungde mümüsühkhi labah. 26Shiwüh abiuo dübeaka lah tüshe tsüde müdübeakkhi yungsho mukhiuhkhita mümüjakkhibo nüsa thsungkheaknü mümüsüh; sherübonü harü qiubanü mümüsühde akambah. 27Tüsho shiwühbo ajing phüyi kihbah jinglungnü atsahkhibo nüsa thsungkheaknü mümüsüh; sherünü ju ashemi qiubanü arelim khiungde mümüsühkhi labah, 28tüsho shepünü ashemi ju ahanbanü akhimmih müsühbah tüsho arelim khiungde mümüsühkhi labah, jurübo nüsa thsungkheaknü mümüsüh.
29Tüsho harü alo kheak abüde atsahbe lorilokobo nüsa thsungkheaknü mümüsüh: udung, phihnu, chimutrungtopü mungjibo, 30thüyam chimutrung, münto-chimutrung, loyichimutrung, yakmüthrichimutrung. 31Loriloko alala bolungnü harü nüsa thsungkheaknü mümüsüh; sherünü jurü ashemi kheak qiubanü arelim khiungde mümüsüh. 32Judürü ashemi tümükhüh kheak lang she keamkihsho ju mümüsühde akambah, ju sang kukruk, khimmih, shihküp, yungsho shungliukhim thsüala, yihnübe kukruk tümütümü thsüthsü she ke ching thsambeah, tüsho arelim khiungde mümüsühde alabah; jushu müsühde akambah. 33Tüsho ashemi ju alo phüh kheak keamsho, ju ching zahkhi abümnü mümüsühde akambah, tüsho nüsanü phüh ju yihrüpabahbeah. 34Atsühbe tsühyungpü khürü kheak ha phüh ching yo kenü pangsho, ju mümüsühde akambah, tüsho ha phüh ching yo ayungbe tümütümü she mümüsühkhi labah. 35Tüsho ashemi tümükhüh kheak lang she keamkihsho ju mümüsüh; yinchikuk yungsho mophüh thsüthsü, ju yihthünaka bahang, jurübo mümüsüh, tüsho jurübo nüsa thsungkheaknü mümüsüh, 36tüshe kekhip yungsho kesopung a müsühlah; tütüshe tümütümü she ashemi kheak qiukhi a mümüsüh. 37Tüsho ju ayangpü lakhi müjih kheak keamsho, ju a müsühlah, 38tüshe kenü müjih kheak pangsho tüsho ashemi ju kheak keamsho, müjih ju mümüsüh.
39Nüsanü atsühbe shiwüh khürü shebahle, khürünü ashemi qiusho arelim khiungde mümüsühde akambah, 40tüsho khürünü ashekhi shih ju tsühsho, apinü akhimmih müsühbeah, tüshe api arelim khiungde mümüsüh; khürünü ashemi hansho khimmih müsühabahbeah, tüshe api arelim khiungde mümüsühkhi labah.
41Alo kheak abüde atsahbe loriloko alala athraneanbe ah; jurübo mümüsüh. 42Buknü chinde atsahkhi thsüala, yungsho ajing phüyi yungsho ahihkhüh kihbah atsahkhi thsüala, jurü mütsühbeah; tümüde nüsa thsungkheaknü jurübo athraneanbe. 43Abüde atsahbe lorilokobo hode nüsa zangrü athraneanbe dükam; nüsanü harü hode zangrü müneana lude mümüsühkhi dükam. 44Tümüyungde I Atungpuh nüsa Thrünpuh ah; jumonü nüsabo müsühkhitang, tüsho müsühde laang, tümütüsho I amüsüh ah. Alo kheak abüde atsahbe lorilokobo dünkheaknü müneana dulu. 45Tümüyungde I nüsa Thrünpuh thsüpü thsüde, nüsa Ijip lo chingnü bekhitbuh Atungpuh ah; jumonü nüsa müsühde laang, tümütüsho I amüsüh ah.
46Jumonü, ha rhangdung lakhi shiwühbo tüsho wuhnubo, ke ching labe alala, tüsho alo kheak tsahbe alala dünkheaknü yakzan ah. 47Nüsanü amüsüh le amümüsüh dükeak, tüsho atsühbe rhangdung lakhi shiwüh le amütsühbe rhangdung lakhi dükeak shihcham thsübeah.
Currently Selected:
LEVI 11: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
