JIHUSUA 24
24
Shekem ching Tangzünglokhi
1Jihusuanü Israel trük alala Shekem ching bemukhung, tüsho apinü azothsürübo, mahkhaprübo tüsho Israel atorübo ji tüsho arübo Atungpuh miki arü. 2Jihusuanü mihtsürübo ki tha, “ Ha Atungpuh Israel Thrünpuhnü thachoh: Adüso nüsa jipürü Tera tüsho atsührü Abraham tüsho Nahor, Ephraim ayung thripkhüh lim lade püpürü thrünpuhbo kingaünkheah. 3Tüsho inü nüsa jipürü Abraham ju Euphra chingnü bekhitbahle Kanan lo alala behode yü, tüsho tsühsoniuso amükhebin jih. Inü api kilim Isak jih; 4tüsho Isak kilim Jakob tüsho Esau jih. Esau kilim inü Edom awung lomi api lapung lo thsüpü jih tüshe Jakob le atsührübo a Ijip ching yüki. 5Judüki inü Mosa tüsho Aron ane yüshih, tüsho inü Ijip ching arüm hanyuk. Ju dunglim inü nüsa jipürü Ijip chingnü bekhit. 6Inü nüsa jipürü Ijip chingnü bekhit, tüsho Ijiprübonü arü dunglim khora lolungbe tüsho khora-berü bebah müshamde Amürüm keto khiung. 7Küyimki arünü I ki zhikhea, inü arü le Ijiprü dükeak zhingdoshih, tüsho keto ju Ijiprü kheak bukde arüshihbah arübo thüraksah. Inü Ijiprü kheak tümü rhimokheanü nüsa müknü ngüdo; ju dunglim nüsa sunglo ching ashangkhüh lado. 8Tüsho inü nüsa Jordan aniakhiuklim Amorrü lo ching bedarü. Arünü nüsa bede keochih, tüshe inü arübo nüsa khah ching jih tüsho nüsanü arü lo lu, tüsho inü nüsa müngühnü arü dükheakshih. 9Tüsho Zippor tsührü Balak, Moab kiulongthsüpuhnü Israel bede keochih; tüsho apinü Beor tsührü Balaam thiyia nüsa athrushih, 10tüshe inü Balaam yu mani; jumonü apinü nüsa müngühjih; junangde api khah chingnü inü nüsa bekhit. 11Küyimki nüsa Jordan hobah Jirikho lim arükhea, Jirikho mihkhungbonü nüsa bede keochih tüsho Amorrü, Perizrü, Kananrü, Hitrü, Girgashrü, Hivrü, tüsho Jebusrünü bede keochih. Tüshe arü alala inü nüsa kilim jih. 12Amorrü kiulongthsü mahne yankhita bahshihpü inü mukhuto nüsa müngüh yüshih; hoju nüsa nukshang yungsho sanglühnü yung. 13Nüsanü küyimkishe thulu müthsükhi tüsho kiuto müthrünkhi lo inü nüsa kilim jih tüsho nüsa ju ching lachoh; nüsanü amükhimkhibo kurungasolu tüsho oliv lu chingnü aso tsühchoh.”
14“Jumonü Atungpuh wüntreang, tüsho rhüngrhüngde tüsho thiyuronü api tankihang; nüsa jipürünü ke thripkhüh tüsho Ijip ching kingaünkhi thrünpuhbo bahkhiang tüsho Atungpuh tankihang. 15Kheakü nüsanü api mütankihnesho, nüsa lakhi lo ching nüsa jipürünü akingaünkhi kethripkhüh yungsho Amorrü thrünpuhbo tankihba shi shepü tankihbanü khihni mokhitang; tüshe I tüsho I yamkhün a Atungpuh tankihbah.”
16Judüki mihtsürübonü alo, “Püpü thrünpuhbo tankihpü thsungkheak isanü Atungpuh mübahyuk; 17tümüde Atungpuh isa Thrünpuhnü isa jipürü tüsho isa Ijip azhorü kuhi chingnü bedarü, tüsho apinü amüyinsahbe rhimokhi isanü ngü. Isanü hode arükhi limro tüsho mihtsürü bolung chingnü apinü isa khümkhit; 18tüsho ju lo ching larü Amorrübo Atungpuhnü isa müngühnü yankhitabah. Jumonü isa she Atungpuh tankihbah, tümüde api isa Thrünpuh.”
19Tüshe Jihusuanü mihtsürübo ki tha, “Nüsanü Atungpuh mütankihkhukpü labah tümüde api amüsüh Thrünpuh, api mükthsü Thrünpuh; nüsanü alakmihkhi yungsho neakbo apinü mübahjih. 20Nüsanü api bahyukde khiungkerü thrünpuhbo tankihsho, apinü nüsa ki atsü rhimo dunglim rholobah nüsa thsümüchide adükheakshihbah.”
21Tüsho mihtsürübonü Jihusua ki tha, “Yung! Isanü Atungpuh tankihbah.”
22Judüki Jihusuanü arü ki tha, “Nüsa zangrünü nüsa thiyumütsan thsüde nüsanü Atungpuh tankihpü mokhitdo.”
Tüsho arünü tha, “Isa thiyumütsan ah.”
23Apinü tha, “Dale tüsho nüsa bolung lakhi khiungkerü thrünpuhbo bahyukang, tüsho Atungpuh Israel Thrünpuh kheak nüsa mulong jihang.”
24Mihtsürübonü Jihusua ki tha, “Atungpuh isa Thrünpuh isanü tankihbah, tüsho isanü api düsheak anibah.”
25Jumonü Jihusuanü mihtsürübo thsungkheak ju nimung tangzüng thsakham, tüsho Shekem ching arü thsungkheak yakzan tüsho thiyuzüngbo thsüjih. 26Jihusuanü harü yubo Thrünpuh yakzan hüm ching thrütyuk; tüsho apinü lung ato khülang lubahle Atungpuh arüngyam ki thülamdung khüp khima zo. 27Jihusuanü mihtsürü alala ki tha, “ Kheahang, ha lungnü isa thiyumütsan thsübah; tümüde Atungpuhnü isa ki thakhi yu alala sodo; jumonü nüsa Thrünpuh kheak thiyuro mülasho hanü nüsa azhihde thiyumütsan thsübah.” 28Jumonü Jihusuanü mihtsürübo ju buh lapungpung ching thiyia tsoshih.
Jihusua tüsho Eleazar Shekhi
29Ju dunglim Nun tsührü Atungpuh yamlarü Jihusua kam 110 labah she. 30Arünü api mi anihbuh lo Gaash wung dukulim Ephraim awung lomi Timnath Sera ching kiuyukabah.
31Jihusua rhangdung la khiungde Israel mihtsürübonü Atungpuh tankih, tüsho api sheshu she Atungpuhnü Israel mihtsürübo thsungkheak rhimokhi ngürü limberübo lakhi khiungde tankih.
32Josep robo Israelrünü Ijip chingnü handarükhi ju, Jakobnü Shekem abuh Hamor tsührübo kheak shotoyinchi 100 jihbah athulokhi lo ching kiuyukabah; ju Josep tsührü yamrüplurüp kamabah.
33Aron tsührü Eleazar sheabah; tüsho atsührü Phinehas kilim jihkhi Ephraim awung lomi Gibea ching arünü api mi kiuyukabah.
Currently Selected:
JIHUSUA 24: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
