JIHUSUA 23
23
Jihusua Achamachih Yu
1 Atungpuhnü Israelrübo arü mühi thiriribo khah chingnü khümkhitbah kim ashang dunglim, küyimki Jihusua ashinbuhrü kamkhea, 2apinü Israelrü alala, limberübo tüsho akuthsürübo, mahkhaprü tüsho atorübo athrünkhi jibahle tha, “ Kheaküa I ashinbuhrü kamdo; 3tüsho nüsa thsungkheaknü Atungpuhnü lomibo kheak tümü rhimokheanü nüsanü mükheahlah, tümüde Atungpuh nüsa Thrünpuhnü nüsa thsung thsüde keochihjihdo. 4Kheakü aninga lakhi lobo tüsho inü ayankhikhi lobo nüsa trükbo kilim yamrüplurüp jihdo, ju Jordan yung chingnü aniyüzahlim Mediterranean Keto khiunglah. 5Atungpuh nüsa Thrünpuhnü nüsa müngühnü arü akhinshihbah, tüsho nüsa mikinü apinü arü yankhita bahbah. Atungpuh nüsa Thrünpuhnü thiyuchihchimkhi nangde, nüsanü arü lo lubah. 6Jumonü mihyuanipü tüsho Mosa yakzan hüm ching thrüta lakhi nangde alala rhimopü düküngang, Ju chingnü tsülim yungsho huzulim danguh, 7junangde nüsa lung larü mihtsürü bolung mütsah yungsho arü Thrünpuh mung jide thiyuchihchim müthsü yungsho arü mütankih yungsho arü miki mümükhüm, 8tüshe nüsanü khihni rhimokhi nangde Atungpuh nüsa Thrünpuh kheak düngde ramrihang. 9Tümüde ato tüsho sühmüh lakhi trükbo nüsa mikhuh chingnü Atungpuhnü yanyuka bahdo; tüsho nüsa thsungkheaknü khihni khiungde shenü she nüsa azhihde müzhipkhuk. 10Nüsa khülangnü lang she mihtsürü chithürü alihde tsoshihkhuklah, tümütüsho apinü thiyuchihchimkhi nangde, Atungpuh nüsa Thrünpuhnü nüsa thsung thsüde keochihchoh. 11Jumonü Atungpuh nüsa Thrünpuh muzhopü khide kümkangang. 12Tümüde nüsanü rholode yübah nüsa lung aninga larü trükbo lung thsürude yihluachihsho, 13Atungpuh nüsa Thrünpuhnü kheakü harü trükbo nüsa müngühnü yana mübahjih dükhi nüsanü tsükjide mükheahang; tüshe nüsa thsungkheaknü arü lang atrebe qimürip tüsho azheang tüsho nüsa düthsün kheak rhapbe liu tüsho nüsa mük ching ayang zahkhi nangde, Atungpuh nüsa Thrünpuhnü ajihkhi lo atsü ching nüsa müdükheakkhamyi khiungde alabah.
14“Kheakü I ashepü kim khiungdo, tüsho Atungpuh nüsa Thrünpuhnü thiyuchihchimde nüsa thsungkheak atsü lümjihkhi khülang she mülakphahde nüsa mulong tüsho me chingnü mükheahlah. Khülang she mülakphahde dünjido. 15Tüshe Atungpuh nüsa Thrünpuhnü atsü lümjihbah nüsa kheak dünjikhi nangde Atungpuh nüsa Thrünpuhnü ajihkhi lo atsü chingnü nüsa müdükheakkhamyi khiungde Atungpuhnü nüsa alala kheak athsümünimbe handarübah. 16Nüsanü Atungpuh nüsa Thrünpuhnü tangzüngkhi thsümünimbah püpü thrünpuhbo ki mükhümde kingaünsho Atungpuh bukakhiukkhi nüsa kheak alü labah, tüsho apinü nüsa kilim jihkhi lo atsü chingnü nüsa nahde adükheakbah.”
Currently Selected:
JIHUSUA 23: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
