MAHKHAPRÜ 1
1
Juda tüsho Simeon Trüknü Adonibezek Tholokhi
1Jihusua she dunglim Israelrünü Atungpuh ki keo, “Isa thsung thsüde she akhuhde yübah Kananrübo azhihde thirithsüba?” 2Atungpuhnü tha, “ Juda wutubah. Inü alo ju api khah ching jihabahdo.” 3Tüsho Judanü aniurü Simeon ki tha, “I kilim akhukhita jihkhi lomi ching I lung arang, tüsho isanü Kananrübo bebah thirithsübah. Tüsho inü she nüsa lung nüsa kilim akhukhita jihkhi lomi ching arübah.” Jumonü Simeonnü api lung yü. 4Judüki Judanü yü tüsho Atungpuhnü Kananrübo le Perizrübo arü khah ching jih, tüsho arünü Bezek ching arü 10,000 laksah. 5Kheaküshe arünü Bezek ching Adonibezek ngü, tüsho api bede keochih, tüsho Kananrü le Perizrübo kuk. 6Adonibezeknü alihde tso; tüshe arünü api müshamde yü, tüsho ramlobah api khahkutopü le jingkutopü khapshakjih. 7Tüsho Adonibezeknü tha, “ Kiulongthsürü 70 arü khahkutopü le jingkutopübo khapshakbah I dükhüm bukkhüp adütrebo moa lude lado; kheakü inü tümü rhimokheanü Thrünpuhnü I kilim jihlochoh.” Arünü api Jirusalem ching bebah arü, tüsho api ju ching sheabah.
8Juda mihtsürübonü Jirusalem azhihde keochih, tüsho nukshangnü laksahde ju luabah tüsho kiuto kheak mo thsahkihjih. 9Ju dunglim Juda mihtsürübonü Negeb awung lomi ching larübo tüsho adükhün lo ching larü Kananrübo bede thirithsüpü yüki. 10Tüsho Judarünü Kananrübo Hebron (atankih mung Kiriath-arba de ji) ching larübo azhihde yü. Tüsho arünü Sheshai, Ahiman tüsho Talmai laksah.
11Ju chingnü arünü Debir ching larübo azhihde yü (Debir mung ju atankih a Kiriath-sepher lakheah.) 12Tüsho Kalebnü tha, “Shepünü Kiriath-sepher yankhitbanü tüsho alubanü api kilim I tsührübe Aksa api yamkhünbe thsüpü jihbah.” 13Kenaz tsührü Kaleb niurü Othnielnü ha lu; tüsho apinü anihbuh kilim atsührübe Aksa ayamkhünbe thsüpü jih. 14Küyimki anihbe api kilim arükhea, anihbenü api ki tuthsuka abuh ki thulu khülang kheangshih; tüsho alibenü api khora kheaknü aki tüsho Kalebnü alibe ki tha, “Nünü tümü lunela?” 15Alibenü api ki tha, “Nünü I Negeb lo ching lashihla le kenü I kilim thsambah jihang.” Tüsho Kalebnü alibe kilim akube tüsho abobe kenü ju jih.
16Kheakü Kenrü tsühsoniuso Mosa akü Hobab ju ashidung kiuto chingnü Juda mihtsürübo bebah Arad phüni Negeb ching lakhi Juda sunglo ching wutu. Tüsho arünü yübah Amalekrü lung laabah. 17Tüsho Judanü aniurü Simeon lung yü tüsho Zephath ching larü Kananrü yande shahde dükheakshih. Jumonü kiuto mung ju Horma de ji. 18Judanü Gaza, Ashkelon tüsho Ekron lomibo she luabah. 19Junangde Atungpuh Juda lung lakheah. Tüsho arünü müzüng lomi ching larü alala yankhitabah, tüshe arünü lokeam ching larübo a müyankhitkhuk tümütüsho arübo yinchi khora-lolungbebo lakheah. 20Tüsho Mosanü athakhi nangde arünü Kaleb kilim Hebron jih; tüsho apinü ha chingnü Anak tsührü mahsam yankhitabah. 21Tüshe Benjamin tsührübonü Jirusalem ching lakhi Jebusrü yankhita mübah; jumonü khihni khiungde Jebusrü ju Benjaminrü lung Jirusalem hing lah.
22Tüshe Josep tsührübonü Bethel azhihde wutu; tüsho Atungpuh arü lung lakheah. 23Jumonü Josep yamkhünnü Bethel züta kheahshihpü mihtsürübo yüshih. (Kiuto mung ju atankih ching a Luz lakheah.) 24Küyimki kiuto chingnü mihtsürü khülang akhiukde thirirhurübonü angükhea, arünü api ki tha, “ Kiuto ching yüzahpü limro isa ki huhang, tüsho isanü nü ki muzhode arhimobah.” 25Jumonü apinü kiuto ching yüzahpü limro arü ki huh; tüsho arünü nukshangnü kiuto ching larübo laksah, tüshe ju buh mihtsürü tüsho api betsührübo a tsoshih. 26Jumonü ju buh mihtsürü ju Hitrü lomi ching yübah kiuto khülang thrün tüsho ju mung Luz de ji; ju mung khihni khiungde lah.
27Manaserünü Beth-shan ching larü tüsho kiulongbo yungsho Taanak tüsho ju kiulongbo, yungsho Dor ching larü tüsho ju kiulongbo, yungsho Megiddo ching larü tüsho ju kiulongbo ching larü müyankhit; tüshe Kananrünü mutuklode ju ching la. 28Küyimki Israelrü müküpde akamkhea, arünü Kananrü ju reangkih-a rhimoshih tüshe arü yankhita mübah.
29Tüsho Ephraimnü Gezer ching larü Kananrü yankhita mübah; tüshe Kananrü Gezer ching arü lung la.
30Zebulunnü Kitron ching larübo yungsho Nahalal ching larü yankhita mübah; tüshe Kananrü arü lung la, tüsho reangkih-a rhimoshihde la.
31Ashernü Ako, yungsho Sidon, yungsho Alap, yungsho Akzib, yungsho Helba, yungsho Aphek, yungsho Rehob ching larübo yankhita mübah; 32tüshe Asherrü a lomi ching larü lung la; tümütüsho arünü arübo yankhita mübah.
33Naphtalinü Beth-shemesh ching larü yungsho Beth-anath ching larü yankhita mübah, tüshe lomi ching larü Kananrü lung la; tütüshe arü thsungkheaknü arübo reangkih-a rhimoshih.
34Tüsho Amorrünü Danrü ju thsungkih-a müzüng lomi ching yüshih, tümütüsho arünü arübo ju adükhün ching akishihpü mümülü. 35Amorrünü Aijalon ching lakhi Heres Müzüng tüsho Shaalbim ching mutuklode la; tüshe Josep yamkhün khah müküpde la, tüsho arü reangkih-a rhimoshihde la. 36Kheakü Amorrü aredung ju Sela chingnü Akrabbim wutu lim akulim peang ah.
Currently Selected:
MAHKHAPRÜ 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
