JIHUSUA 22
22
Jihusuanü Aniakhiuklim Trükbo Thüyam lim Yüshihkhi
1Judüki Jihusuanü Reuben, Gad tüsho aniakhiuklim Manase trükbo jimukhung, 2tüsho apinü arü ki tha, “Atungpuh yamlarü Mosanü thiyukhüm jihkhi alala nüsanü rhimodo, tüsho nüsanü I yukhüm alala anido. 3Harü nimungbo chingnü khihni khiungde nüsanü nüsa keoniorü Israelrü mübahyuk, tüshe Atungpuh nüsa Thrünpuh yukhüm kümkangde anido. 4Kheakü, apinü thiyuchihchimkhi nangde, Atungpuh nüsa Thrünpuhnü nüsa keoniorü Israelrü kilim mungtsü jihdo. Jumonü Jordan thripkhüh lim Atungpuh yamlarü Mosanü ajihkhi küpü nüsa yamalo la, ju ching nihbuh yam yimde yüang. 5Mosanü ajihkhi yakzan anipü ha tsüde thsakhamang: Atungpuh nü Thrünpuh muzhoang, api limro alala ching tsahang, api yukhümbo aniang, api kheak ramrihang, tüsho nü mulong tüsho nü me athrünkhinü mulongkhitbah api tankihang.” 6Jumonü Jihusuanü arü müngühjihde arü thiyia yüshih; tüsho arübo nihbuh yam lim yü.
7Kheakü, Manase trük chamkhüh kilim Bashan ching yo Mosanü yamalo jih; tüshe Jihusuanü püpü chamkhüh kilim a aniyüzahlim Jordan lo ching arü keoniorü phünide jih. Tüsho küyimki Jihusuanü arübo müngühjihde thüyam lim thiyia yüshihkhea, 8apinü arü ki tha, “Nüsa shiwühbo, shoto yinchi, suna, müwayinchi, yinchi tüsho khimmihbo suhdahde hanbah alarü kamde thüyam lim wulungang. Nüsa riri khah chingnü alukhi kukrukbo nüsa keoniorübo ki she chama jihang.” 9Jumonü Reuben, Gad, tüsho aniakhiuklim Manase trükbonü Israelrübo Kanan lomi, Shilo ching zojihbahle Atungpuhnü Mosa ki thiyukhüm jihkhi nangde arü yamalo Gilead yimde wulung.
Jordan ching Kingaün Sadam Thsükhi
10Küyimki Reuben, Gad tüsho Manase trük chamkhüh Kanan mükeak ching lakhi Jordan ke yean arükheanü arünü sadam ato khülang thsü. 11Judüki Israelrü tsührübonü hade so, “ Kheahang! Reuben, Gad tüsho aniakhiuklim Manase trükbonü Israelrü lo lim Jordan phünide Geliloth ching kingaün sadam khülang thsüa lah.” 12Tüsho küyimki Israel mihtsürübonü ha sokhea, arü bede keochihpü boto alala trüngmukhungde Shilo ching arü.
13Jumonü Israelrünü amükeambuh Eleazar tsührü Phinehas ju Reuben, Gad tüsho aniakhiuklim Manase trükbo kilim Gilead ching yüshih. 14Israel trük tüsho guk aban chingnü akubo dukbah mihtsürü thürü Phinehas lung yüshih. 15Arübo Reuben, Gad, tüsho aniyüzahlim Manase mihtsürübo yimde Gilead ching arü, 16tüsho Atungpuh borü alala mung chingnü arü ki tha, “Nüsanü Atungpuh azhihde kingaün sadam thsübah khihni api yankhi chingnü tuklode Atungpuh Israel Thrünpuh azhihkhi rhimo amütsü ha tümüa? 17Isa neak dünkheaknü Peor ching Atungpuhnü arüm boto kheak arüshihde thsümüchikhi tüsho khihni khiungde mümüsühkhitkhinü mumo de? 18Kheakü nüsanü api yanpü thsungloba de? khihni nüsanü Atungpuh azhihsho, apinü shido Israel boto alala kheak bukakhiukbah. 19Jumonü nüsa yamalo amüsüh mülasho, kingaünpung lakhi A TUN GPU H lo ching arübah isa lung laang; tüshe kingaün sadam püpü thsüde Atungpuh isa Thrünpuh dazhih yungsho isa dazhih. 20Zera tsührü Akhan nü muthrua bahkhi kukruk lukhi dünkheaknü Israel trük alala thsümüchi ngükhi yung de? Anihbuh neak dünkheaknü api lang ashekhi yung.”
21Reuben, Gad, tüsho aniakhiuklim Manase trükbonü Israel guk ching akuthsürübo ki alo: 22“Atungpuh ju thrünpuhbo kurungkheak Thrünpuh! Atungpuh ju thrünpuhbo kurungkheak Thrünpuh! Apinü mükheahlah; tüsho Israelrünü she mükheahshihnelah! Ha Atungpuh azhihde api kheak akin mülaa lasho, khihni isa dülashih! 23Atungpuh ki mihyu manide isanü nihbuh kingaün sadam kheak taka kingaünsho yungsho hi kingaün tüsho mungtsü kingaün jihsho Atungpuhnü aküdah thsüde isa kheak royimshang. 24Yung! Arübe nimung ching nüsa tsührübonü isa tsührübo ki ha ruk thasho mütsüle de trede lümbah rhimodo, ‘Atungpuh Israel Thrünpuh kheak nüsanü tümü yihnüpü thsüba? 25Tümüde Atungpuhnü isa le nüsa Reuben tüsho Gad tsührübo dükeak Jordannü aredung thsüjihdo. Atungpuh kilim nüsa shihcham tümü müla.’ Junangde nüsa tsührübonü isa tsührübo Atungpuh mükingaünshihde ayanlobah. 26Jumonü isanü kingaünpü yungsho laksah-a kingaünpü thsungkheak thsükhi yung, 27tüshe ha isanü she Atungpuh amüsüh kingaünpung ki taka kingaünde, laksah-a kingaünde tüsho mungtsü kingaünde laa lah de isa le nüsa tüsho dunglim tsührübo dükeak thiyumütsan lang ah. Junangde nüsa tsührübonü isa tsührübo ki, nüsa Atungpuh miki tümü shihcham müla de arübe kim ching müthashihpü thsungkheak ah. 28Isa lümkhi ju dünjisho arübe ching tsühsoniusonü athabah, ‘ Kheahang! Atungpuh kingaün sadam kiphahde isa jipürünü she thsüa lah. Ha taka kingaünpü yungsho laksah-a kingaünpü thsungkheak yung, tüshe nüsa tüsho isa mihtsürü dükeak thiyumütsan khülang ah.’ 29Dükde isanü Atungpuh mazhih yungsho kingaün sadam thsübah taka kingaünde, hi kingaünde, yungsho laksah-a kingaünde khihni api dunglim yankhi chingnü mutuklo. Arüngyam müngüh lakhi Atungpuh isa Thrünpuh kingaün sadam khiode püpü kingaün sadam isanü müthsü.”
30Küyimki amükeambuh Phinehas tüsho boto limthorübo, Israel guk ching akuthsürübo api miki zhiprünü Reuben, Gad tüsho aniakhiuklim Manase trükbonü athakhi sokhea, arübo reangkeam. 31Eleazar tsührü amükeambuh Phinehasnü Reubenrü, Gadrü tüsho Manaserü ki tha, “ Khihni isa lung Atungpuh lah de isanü mükheahlah, tümütüsho nüsanü api mazhih, kheakü nüsanü Israelrü Atungpuh khah chingnü bekhitdo.”
32Judüki amükeambuh Eleazar tsührü Phinehas tüsho limberübonü Reuben, tüsho Gadrü Gilead ching zojihbahle Israelrü kilim Kanan ching wulunglo tüsho arübo ki thiyusheak jih. 33Thiyusheak hode Israelrübo reangkeamabah tüsho Thrünpuh mung shi. Jushu arünü Reuben tüsho Gadrü lapung thsümünimjihde keochihpü müthadebah. 34Tüsho Reuben le Gadrünü kingaün sadam mung ha ji: Atungpuh ju Thrünpuh de isa dükeak thiyumütsan khülang ah.
Currently Selected:
JIHUSUA 22: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
