JIHUSUA 20
20
Tsoyukpung Kiutobo
1 Atungpuhnü Jihusua ki tha, 2“ Mosa hode inü nüsa ki thiyukhüm jihkhi kiutobo tsoyukpung thsungkheaknü mokhitang de Israelrü ki thaang, 3junangde mihtsürü khürünü müranglimnü khürükhüh laksahsho athrihpü larü mihtsürü kheaknü tsokhide yünü ju ching jikbah. 4Api jurü kiutobo ching alihde ayübah tüsho kiuto chipimurung ching zhipbahle adünjikhibo limberübo ki mükheahshihbah. Jushu arünü api kiuto ching yüzahshihbah api kilim lapung jihbah, tüsho api ju ching labah. 5Mürangkhüh royimrünü adunglim müshamde arüsho mihtsürübonü api ju arü khah ching müjih. Arübonü api khümkhitbeah tümütüsho püpüki ane dükeak mükthsü mülade müranglimnü mihtsürü ju alaksahkheah. 6Boto miki mah mükhapyiki tüsho ju kim ching achangbe amükeambuh müsheyi khiungde api ju ching labah. Jushu lang api alihde atsopung kiuto ching ayam lim alode ayüpü kuklah.”
7Jumonü arünü Naphtali awung lomi ching Galilee ching lakhi Kadesh mokhit; Ephraim awung lomi ching Shekem mokhit; tüsho Juda awung lomi ching Kiriath-arba (ju Hebron) mokhit. 8Tüsho Jordan hobah, Jirikho aniakhiuklim wungdüpheak kheak sunglo ching arünü Reuben trük chingnü Bezer mokhit; Gad chingnü Gilead ching lakhi Ramoth mokhit; tüsho Manase trük chingnü Bashan ching lakhi Golan mokhit. 9Harü kiutobo ha Israelrü tüsho arü lung larü khiungkerü khürü thsungkheaknü tsoyukpung mokhitkheah. Khürünü mihtsürü müranglimnü laksahsho royimrü kheaknü yübah ju ching jikpü kuklah; tüsho boto miki mah mükhapchokia royimrünü api mülaksahkhuk.
Currently Selected:
JIHUSUA 20: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
