JIHUSUA 18
18
Aningkhi Lo Chamkhi
1Arünü alomi kukkhit dunglim mükühabahshu, Israelrü lüpdükhi Shilo ching mukhung tüsho Atungpuh shorupung khimyam khülang thsü. 2Judüki Israel trük thüne yamrüplurüp müngüyide alakheah. 3Jumonü Jihusuanü Israelrü ki tha, “Atungpuh nüsa jipürü Thrünpuhnü ajihkhi lo ching yübah muluyichoki nüsa külokhüh henih thsüba le? 4I kilim trük abande mihtsürü mahsamsam arüshang, tüsho arü yamrüplurüp lupü lakhi lomi chinzhina kheahde thrüta lupü yüshihanü. Tüsho arübo I kilim alode arüshihanü. 5Arünü ju shihcham thüne thsüde achambah, Juda ju düjinglim lomi ching, tüsho Josep yamkhün dukulim lomi ching labah. 6Lomi shihcham thüne chamkhi ju thrütbahle I kilim lubah arang, tüsho inü nüsa thsungkheak Atungpuh isa Thrünpuh ki keode azan thsübah. 7Tütüshe nüsa bolungnü Levirü kilim a yamrüplurüp müjih. Tümüde arü yamrüplurüp ju amükeamrü thsüde Atungpuh tankihpü ah; tüsho Gad, Reuben, tüsho Aniakhiuklim Manase trükbo a arü yamrüplurüp Jordan aniakhiuklim luabahdo, ju Atungpuh yamlarü Mosanü arü kilim jihkheah.”
8Jumonü mihtsürübonü tsahmusude arü; tüsho lomi thrüta lupü yürü ki Jihusuanü tha, “Lomi alala ching yüang tüsho thrüta lubah I kilim alode arang, tüsho ha Shilo ching nüsa thsungkheaknü A TUN GPU H ki azan thsüde akeokhibah.” 9Jumonü mihtsürübonü lomi alala ching yü tüsho kiuto shihcham thüne chamkhi ju arünü hüm ching thrüt; tüsho arübo Jihusua kilim Shilo ching alode arü. 10Arübo thsungkheak Jihusuanü azan thsüde Atungpuh ki keokhi tüsho Israel trükbo kilim alo chama jih.
Benjaminrü kilim Jihkhi Lomi
11Benjaminrü kilim guk ayannü ajihkhi lo ju Juda tüsho Josep trük dükeak lakheah. 12Dukulim arü lo aredung ju Jordan kheaknü tankihlah; aredung ju dukulim Jirikho lo düpheak thrip yü tüsho aniyüzahlim awung lomi hode Beth Aven khiunglah. 13Kheaküshe aredung ju düjinglim Luz lo düpheak (ju Bethel) yüki, ju kheaknü Beth-horon düjinglim awung kheak Ataroth-addar yüki khiunglah. 14Tüsho aredung ju püpü thrip, aniyüzahlim awung chingnü düjinglim anguhbah Beth-horon thripkhüh anguhbah Kiriath-baal chingnü kheamlah (ju Kiriathjearim), Juda trük kiuto. Hanü aniyüzahlim aredung thsülah. 15Düjinglim aredung ju Kiriathjearim akheam kheaknü Ephraim lim Nephtoa kenü khiunglah. 16Ju kheaknü achinkheam dukulim Rephaim jindükhün ching Hinnom tsührü jindükhün chinzhina kheahpung wung khiunglah. Kheaküshe düjinglim Hinnom jindükhün hode abolim Jebusrü lo düpheak Engrogel thrip yükilah. 17Jushu dukulim Enshemesh lim yülah tüsho Adummin wutu lim miki Geliloth khiunglah. Ju chingnü Reuben tsührü Bohan lungkhim khiungde yükilah; 18tüsho dukulim Beth-araba lo düpheak hobah Araba lim yükilah; 19ju chingnü Beth-hogla wung dukulim hochoh; tüsho dukulim Ashe keto Jordan akheam kheaknü arün ah; ha düjinglim aredung ah. 20Jordan ju aniakhiuklim aredung thsülah. Haju Benjamin trük guk ayannü ajihkhi yamrüplurüp aredungbo ah.
21Kheakü Benjamin trük kilim arü guk ayannü ajihkhi kiutobo ju Jirikho, Beth-hogla, Emek Keziz, 22Beth-araba, Zemaraim, Bethel, 23Avvim, Para, Ophra, 24Kepharammoni, Ophni, tüsho Geba: kiulongbo bebah kiuto 12. 25Gibeon, Rama, Beeroth, 26Mizpa, Kephira, Moza, 27Rekem, Irpeel, Tarala, 28Zela, Haeleph, Jebus (ju Jirusalem), Gibea, tüsho Kiriath-jearim: kiulongbo bebah kiuto 14. Ha Benjamin tsührübo yamrüplurüp ah.
Currently Selected:
JIHUSUA 18: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
