JIHUSUA 17
17
Aniyüzahlim Manaserü Lomi
1Akhukhi lo ju Manase trük kilim jih tümüde api Josep tsührü adüjibuh lakheah. Gilead abuh Makir ju Manase tsührü adüjibuh tüsho bonungrü bolung athrungrü, jumonü Gilead tüsho Bashan api kilim jih. 2Tüsho akhukhi lo ju Manase trük ching guk aningkhi harü kilim jih: Abiezer, Helek, Asriel, Shekem, Hepher tüsho Shemida: harü ha Josep tsührü Manase kheaknü atrükkhitkhi athrürübo, tüsho arübo guk ching akubo ah. 3Kheakü Zelophehad ju, Manase tsührü, Makir tsührü, Hepher tsührü ah, tüshe atsührü aliberübo lang alakheah; tüsho arübo mung ju Mahla, Noa, Hogla, Milka, tüsho Tirza. 4Arübonü amükeambuh Eleazar, Nun tsührü Jihusua tüsho limberübo kilim yübah tha, “Isa she isa buhtsührübo lung yamrüplurüp lupü Atungpuhnü Mosa ki thiyukhüm jihkheah.” Jumonü Atungpuhnü thiyukhüm jihkhi nangde arü buhtsührü lung arübo kilim yamrüplurüp jih. 5Junangde Jordan thripkhüh Gilead tüsho Bashan kheak khiode Manasenü shihcham thürü ngü, 6tümütüsho Manase tsührü aliberübo she athrürübo lung yamrüplurüp khülang lu. Gilead lo ju Manaserü aningkhibo kilim jih.
7Manase lomi ju Shekem aniakhiuklim thrip Asher chingnü Mikmethath khiunglah; tüsho aredung ju düjinglim Entappua ching larü kilim yülah. 8Tappua lo ju Manase yo, tüshe Manase aredung yean Tappua kiuto ju Ephraim yo ah. 9Ju chingnü aredung ju Kana yung lim yükilah. Ayung düjinglim lakhi kiutobo Manase kiutobo lung lakhi ju Ephraim yo ah. Tüsho Manase aredung ju ayung dukulim yeande yülah tüsho Mediterranean keto chingnü kheamlah. 10Düjinglim Ephraim, tüsho dukulim Manase, Mediterranean keto ju ane dükeak aredung ah. Dukulim Asher tüsho aniakhiuklim Issakar khiunglah. 11Issakar tüsho Asher ching Manase yo ju Beth-shan tüsho ju kiulongbo, Ibleam tüsho ju kiulongbo, Dor ching larü tüsho ju kiulongbo, awung lomi mahsam–Endor ching larü tüsho ju kiulongbo, Taanak ching larü tüsho ju kiulongbo, tüsho Megiddo ching larü tüsho ju kiulongbo. 12Tütüshe Manaserünü jurü kiutobo ching larü yankhita mübahkhuk, jumonü Kananrü mutuklode ju lo ching la. 13Tüshe küyimki Israelrü sühmüh lade akamkhea arünü Kananrü ju azhorü thsüde thsungkih-a rhimoshih, tüshe shahde yankhitamübah.
Ephraim tüsho Manaserünü Alo Alü Kheangkhi
14Josep trüknü Jihusua ki tha, “ Tümüde nünü isa kilim alo shihchamkhüh lang ajihkhea le? Tümütüsho Atungpuhnü müngühjihkhi hode isa hihdakde lah.”
15Jihusuanü alo, “Nüsa khide hihdaklasho tüsho Ephraim awung lominü mathsangsho, Periz tüsho Rephaim lo ching yübah nüsa lo thsüpü murung kimang.”
16Arünü alo, “ Awung lominü isa musuhdah, tüsho adükhün ching larü Kananrü Beth-shan tüsho ju mühi kiulongbo le Jezreel jindükhün ane chido ching larübo yinchi lolungbe lah.”
17Judüki Jihusuanü Josep yamkhün Ephraim tüsho Manaserü ki tha, “ Am nüsa khide mih hihlah, tüsho khide wu tolah. Nüsa kilim alo shihchamkhüh kheaknü alü jihbah. 18Tüshe awung lomi ju nüsa yo thsübah, tümüde ju murung thsüthsü she, nüsanü kimkhitang tüsho akheamnü akheam khiungde nüsa yo thsübah; tümüde Kananrübo lolungbe tüsho sühmüh larü mihtsürü thsüthsü she nüsanü yankhita bahbah.”
Currently Selected:
JIHUSUA 17: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
