JIHUSUA 11
11
Jihusuanü Jabin tüsho api Müshiprü Kukkhi
1Küyimki Israel thrungkhi Hazor kiulongthsüpuh Jabinnü asokhea, apinü thiyusheak Madon kiulongthsüpuh Joab, Shimron tüsho Akshaph kiulongthsürübo kilim, 2tüsho dukulim awung lomi, Kinnereth düjinglim Araba lokeamlo tüsho Dor phünide aniyüzahlim yüshih. 3Tüsho apinü thiyusheakbo Jordan thrip abande alarü Kananrü, Amonrü, Hitrü, Perizrü, awung lomi ching Jebusrü, tüsho Mizpa lomi Hermon ching larü Hivrü kilim yüshih. 4Arübo nihbuh bonungrü ke yean loyi nangde be tüsho khora le keochih-lolungbebo she hihdakde lubah arü. 5Harü kiulongthsürübo sühmüh alala thsürubah arü tüsho Israel bede keochihpü thsüde Merom ke ching binkheam.
6 Atungpuhnü Jihusua ki tha, “ Arübo ki dütre, tümüde shido hadüchokia Israelrü khilim inü arübo laksahbah; nüsanü khora jingbo lipshakbah tüsho lolungbebo takabahbah.” 7Jumonü Jihusua tüsho thirithsürübo zukleangnü arübah arübo Merom ke chingnü yanabah. 8Atungpuhnü arübo Israelrü khah ching jih; Israelrübonü Misrephothmaim, Sidon, tüsho Mizpa jindükhün aniakhiuklim khiungde müshamde yan. Thiriri müshekhamyi khiungde arünü yande laksah. 9Atungpuhnü thiyukhüm jihkhi nangde Jihusuanü khora jingbo lipshak tüsho lolungbebo takabahjih.
10Jushu Jihusuanü Hazor lim alode arübah yan tüsho kiulongthsüpuh ju nukshangnü laksah. (Judüki Hazor ju kiulongthsübo ching wu-sühmüh lakhi kiulongthsü khülang lakheah.) 11Arünü ju ching rhangdung lakhi khülang she maningshihde nukshangnü laksah, tüsho kiuto she monü takabah.
12 Atungpuh yamlarü Mosanü thiyukhüm jihkhi nangde Jihusuanü jurü kiulongthsürü kiutobo tüsho kiulongthsürübo yanabah, tüsho alala nukshangnü sheshih. 13Tüshe, Israelrünü wungduduhbo ching lakhi kiutobo mütak tahle Hazor lang Jihusuanü takabah. 14Israelrübonü shoto kukruk tüsho shiwühbo nihbuh thsungkheaknü ju kiutobo chingnü lu; tüshe arünü mihtsürübo a alala shekhamshih. 15Atungpuhnü thiyukhüm ayamlarü Mosa kilim jih, jurübo Mosanü Jihusua kilim jih, tüsho Jihusuanü jurübo anide rhimo. Atungpuhnü Mosa kilim thiyukhüm jihkhi nangde apinü tümü mürhimokhi müla.
Jihusuanü Ayankhikhi Lomi-kewung
16Jumonü Jihusuanü alomi alala yankhia lu; awung lomi tüsho Negeb, Goshen lo alala tüsho lokeamlo, Araba, Israel awung lomi tüsho Jordan dükhün, 17Halak wung chingnü Seir lim wutukhi, Hermon wung khüp Lebanon jindükhün ching Baalgad khiungde apinü kiulongthsürübo alala kingde laksah. 18Jurü kiulongthsürübo kheak Jihusuanü nimung ashang thirithsü. 19Israelrü kheak mungtsükhi kiuto Hivrü lapung Gibeon ju lang alakheah; püpü alala keochihpung kamabah. 20Israelrü bede keochihshihpü Atungpuhnü arü ki lümkihshih, junangde arübo shahde thsümünimde tüsho mihmuzho mülade laksahkhamshihpü thsü. Ha Atungpuhnü Mosa ki thiyukhüm jihkhi ah.
21Judüki Jihusuanü yübahle atoshang mihtsürü Anakim de ajikhi trük awung lomi ching larü Hebron, Debir, Anab, tüsho Juda le Israel awung lomi ching larübo laksahkham; Jihusuanü arübo laksahkham tüsho arü kiutobo thsümünimjih. 22Israel ching larü Anakimrü sheshe maningshih; tüshe, Gaza, Gath, tüsho Ashdod ching larü anükhüh aningjih.
23Junangde Atungpuhnü Mosa ki thiyukhüm jihkhi yande Jihusuanü lomi alala yankhia lu; tüsho Jihusuanü jurübo Israelrü kilim nihbuh yo thsüpü chamachih-a trük abande jih. Jushu mihtsürübo keochihkhi chingnü sühakhim.
Currently Selected:
JIHUSUA 11: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
