JIHUSUA 10
10
Amorrü Yankhi
1Jirikho tüsho kiulongthsüpuh yanabahkhi ruk, Jihusuanü Ai tüsho kiulongthsüpuh yando de Jirusalem kiulongthsüpuh Adonizedeknü so. Tüsho Gibeonrünü Israelrü kheak mungtsüde arü bolung lah de apinü so. 2Ha sobah mihtsürübonü tode arhunganim tümütüsho Gibeon ju kiuto ato; ju Ai kheaknü atobe, tüsho mihtsürübo ju athrungrübo lakheah. 3Jumonü Jirusalem kiulongthsüpuh Adonizedeknü ha yusheak Hebron kiulongthsüpuh Hoham, Jarmuth kiulongthsüpuh Piram, Lakish kiulongthsüpuh Japhia, tüsho Eglon kiulongthsüpuh Debir kilim yüshihde tha: 4“ Gibeon yanpü thsungkheaknü arübah I rungang, tümüde arünü Jihusua tüsho Israelrü kheak mungtsü thsüdo.” 5Judüki Amorrü kiulongthsürü phüngü, Jirusalem, Hebron, Jarmuth, Lakish, tüsho Eglon kiulongthsürü bolung thirithsürübo bebah Gibeon zündo tüsho bede keochih.
6Tüsho Gibeonrünü Gilgal binkheampung ching Jihusua kilim thiyusheak yüshih, “Nü yamlarübo dübahyuk; isa kilim nahde atuang, isa khümkhitang, tüsho isa rungang; tümüde awung lomi ching larü Amorrü kiulongthsürü alala isa azhihde shomukhunga lah.”
7Jumonü Jihusua tüsho api bonungrü athrünkhi lung, athrungrübo bebah Gilgal chingnü tsahmusu. 8Atungpuhnü Jihusua ki tha, “ Arübo dütre, tümüde inü arübo nü khah ching jihdo; arübo shenü she nü azhihde müzhipkhuk.” 9Jumonü Jihusuanü tsüngreroro Gilgal chingnü tsahmusubah zukleangnü arü kheak arü. 10Tüsho Atungpuhnü arübo Israel müngüh yingyingde kamshih. Israelrübonü arü Gibeon ching laksah tüsho yande Beth-horon wutu limro khiung, tüsho Azeka le Makkeda khiungde laksah. 11Küyimki Amorrü ju Israel bonungrü müngüh alihde yükheanü, Atungpuhnü arü kheak Beth-horon chingnü Azeka khiungde aru keamkhishih. Israelrü thsühnuknü alaksahkhi kheaknü arunü akingsahkhi ahihbe lakheah.
12 Atungpuhnü Israel mihtsürü kilim Amorrü kheak akuk ngüshihkhi nimung mihtsürübo lungnü Jihusuanü Atungpuh ki tha,
“ Ani, Gibeon kumung dütsahde zhipang;
khinu, Aijalon jindükhün ching zhipang.”
13Ha trüknü arü riri mukukyikia aninü zhikde zhip tüsho khinunü maphap. Ha Jasher Hüm ching thrüta lah. Aninü thüning phulung zhikde zhip tüsho nimung khülang bande müyüzah. 14Atungpuhnü mihtsürü khülang düsheak anikhi hadürü nimung küyimkishe dünjia mükheah; tümüde Atungpuhnü Israelrü thsungkheak keochih!
15Judüki Jihusua tüsho Israelrü alala Gilgal binkheampung ching yülo.
Jihusuanü Amorrü Kiulongthsürü Phüngü Tholokhi
16Judüki Amorrü kiulongthsürü phüngü ju tsokhitde yünü Makkeda lungkhün ching jik. 17Tüsho Jihusua ki tha, “ Kiulongthsürü phüngü Makkeda lungkhün ching jika lakhi ngüdo.” 18Apinü tha, “Lungkhün ripit ki ju lung atokhüh lah-a yüzahshang, tüsho ju ching aheangrü khürü zhipang; 19tüsho nüsa ju kheak düzhip, tahle thiriribo dunglim müshamang; arübo nihbuh kiuto ching düyüzahshih, tümüde Atungpuhnü arübo nüsa khah ching jihdo.” 20Küyimki Jihusua tüsho Israelrünü arübo mükheamkhamyi khiungde shahde alaksahkhamkhea, tüsho küyimki khürü yünü chipi ayünkhi kiuto ching yüzahkhea, 21mihtsürü alala tsüdü lang Makkeda binkheampung ching Jihusua kilim arü; shenü she Israelrü azhihde mütha.
22Jihusuanü tha, “Lungkhün ju lahashungang tüsho kiulongthsürü phüngü ju I kilim bede akhiukang.” 23Junangde arünü rhimo, tüsho Jirusalem, Hebron, Jarmuth, Lakish, tüsho Eglon, harü kiulongthsürü phüngü bekhita api kilim bebah arü. 24Küyimki arünü kiulongthsürü phüngü Jihusua kilim bedarükhea, Jihusuanü Israelrü athrünkhi jimukhung tüsho api lung yürü atorübo jia arü jingnü kiulongthsürübo hung ching thrümshih. Arünü jude rhimo. 25Tüsho Jihusuanü arübo ki tha, “Dütre tüsho mulong dünini; reangzahang tüsho mulong ato thsang; tümüde Atungpuhnü nüsa riri alala ki ha ruk rhimopü thsüchoh.” 26Ju dunglim Jihusuanü kiulongthsürü phüngü ju laksah tüsho arelim khiungde arü pang sangdung phüngü kheak zhina zo. 27Ani yüzahchoki Jihusuanü thiyukhüm jih, tüsho arü pang ju sangdung kheaknü yihkhibah püpüki arü jikpung lungkhün ching thoyuka bah. Arünü lung atotobo lah-a lungkhün ching ju mürhüt, tüsho jurü ju khihni khiungde lah.
Jihusuanü Amorrü Lomi Yankhikhi
28Ju nimung Jihusuanü Makkeda tüsho ju kiulongthsüpuh laksah. Ju ching larü alala apinü sheshe maningshihde laksah. Apinü Jirikho kiulongthsüpuh kheak tümü rhimokheanü junangde Makkeda kiulongthsüpuh kheak she rhimo.
29Judüki Jihusua tüsho Israel alala Makkeda chingnü akhinde Libna ching yü tüsho ju yan. 30Tüsho Atungpuhnü Israel kilim kiuto tüsho ju kiulongthsüpuh arü khah ching jih; ju ching lakhi khülang she maningshihde arü nukshangnü laksahkham. Arünü Jirikho kiulongthsüpuh kheak rhimokhi nangde Libna kiulongthsüpuh kheak she rhimo.
31Jushu, Jihusua tüsho Israelrü alala Libna chingnü Lakish khiung, tüsho ju zündobah yan. 32Atungpuhnü nimung mahnepü ching Lakishrü ju Israelrü khah ching jih. Arünü Libna ching rhimokhi nangde ju kiuto ching khülang she maningde laksahkham. 33Judüki Gezer kiulongthsüpuh Horam she Lakish rungpü atu, tüshe Jihusuanü api tüsho amihtsürübo sheshe maningde laksahkham.
34Jushu, Jihusua tüsho Israelrü alala Lakish chingnü Eglon khiung tüsho zündode yan. 35Arünü ju nimungnü yan, tüsho nukshangnü laksah; tüsho Lakish ching rhimokhi nangde ju ching lakhi mihtsürü sheshe maningde laksahkham.
36Jushu, Jihusua tüsho Israelrü alala Eglon chingnü Hebron ching wutubah keochih, 37tüsho ju yan, tüsho kiulongthsüpuh, ju mühi kiutobo tüsho ju ching lakhi mihtsürü athrünkhi nukshangnü laksah; Eglon ching rhimokhi nangde apinü ju kiuto thsümünimjih tüsho mihtsürü khülang she maningde laksah.
38Jushu Jihusua tüsho Israelrübo Debir lim alodarübah ju ching keochih. 39Apinü ju kiuto, kiulongthsüpuh tüsho ju mühi kiutobo alala yanabah. Ju ching she khülang lang she maningde laksahkham. Jihusuanü Hebron tüsho Libna tüsho jurü kiulongthsürübo kheak rhimokhi nangde Debir tüsho ju kiulongthsüpuh kheak she rhimo.
40Jumonü Jihusuanü lomi alala, awung lomi tüsho Negeb lokeam lobo, adüpheak tüsho arü kiulongthsürü alala yankhitkham; apinü sheshe maningshih, tüshe sheak thsükhi alala Atungpuh Israel Thrünpuhnü thiyukhüm jihkhi yande thsümünimjih. 41Junangde Jihusuanü Kadesh-barnea chingnü Gaza, tüsho Goshen lomi chingnü Gibeon khiungde alala yanabah. 42Tüsho Jihusuanü kiulongthsürübo tüsho ju lomi khülang kinü lukham, tümüde Atungpuh Israel Thrünpuhnü arü thsung thsüde keochih. 43Jushu a Jihusua tüsho api lung Israelrü athrünkhi Gilgal binkheampung ching alodarü.
Currently Selected:
JIHUSUA 10: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
