JEREMIA 51
51
Babilon Thsümünimkhi
1 Atungpuhnü ha thachoh: Inü Babilon azhihde tüsho Lebqamai ching larü azhihde athsümünimbe apung rhumusupü lah; 2tüsho inü athrüprü Babilon ching yüshihbah, tüsho arünü anihbe thrüpbah. Küpkhuk nimung ching arünü anihbe azhihde thrip aban chingnü arüchoki anihbe lomi akeangkeang kamshihbah. 3Hühzo kiprünü anihbuh sanglüh dühünshih, tüsho anihbuh thirithsü zülu düyihshih. Athrününgtsüng daningshih; bonungrü shahde dükheakshang. 4Arübo Kaldearü lomi ching laksah-a yapbah, tüsho kiudunglimrobo ching yuribah. 5Israel Amüsühbuh miki arü lomi amülimnü mide lalashe, Israel tüsho Juda arü Thrünpuh Wuto Atungpuhnü mübahyuk. 6Babilon bolungnü tsoang, nüsa mihbüm abannü nihbuh rhangdung khümkhitang! Anihbe neak dünkheaknü düdükheak, tümüde ha Atungpuh royimkhi kim lah; anihbe ngüpü lakhi apinü jihlochoh. 7Babilon a Atungpuh khah ching suna pung lakheah, lomi alala müshangshih; trükshihbonü anihbe yukhu yungdo, tüsho junangde trükshihbo yingyingde kam. 8Zukleangnü Babilon lungabah tüsho ajan; anihbe thsungkheak tüzhoang! Anihbe thsünükhi thsungkheak moli luang; khükijua anihbe athsüngubah. 9Isanü Babilon thsüngupü mürangdo, tüshe anihbe müthsüngukhuk. Anihbe bahyukang, tüsho isa mihbüm abannü isa nihbuh lomi lim yüanü; tümüde anihbe mahkhapkhi yinmi khiungdo tüsho thüningbo khiungde shuhkihdo.
10 Atungpuhnü isa thiyuro handarüdo; arang, isanü Atungpuh isa Thrünpuh rhimo Zion ching thaanü.
11Hühzobo züang! Tsungbo thsakhamang! Atungpuhnü Midia kiulongthsürübo me thurumusudo, tümütüsho Babilon dünkheak api lümkhi ju athsümünimpü lah, tümüde ju Atungpuh royimkhi, api arüngyam royimkhi lah. 12Babilon chipi yeande riphin khülang shuhkihang; akheahrü düküngshang; ajimrü thsakhamang; tümüde Atungpuhnü Babilon ching larü dünkheak tümü asukdünü lümkhi thsüdo tüsho rhimodo. 13Nüsa sherü ke ahihdo yean lacho, rahpungbo ching lakhit la, nüsa yo akheam arüdo, nü rhangdung liu yihshakdo. 14Wuto Atungpuhnü aküdah thsüde thiyuchihchim. Tsükjide inü nü tangkho boto nangde mihtsürübonü amishihbah, tüsho arünü nü kurungkheak akukkhi düsheak ahobah.
15Api wunü alomi thrün, api lümlungnü alomi lashih,
tüsho api anikhitkhinü thüningbo thoshang.
16Küyimki apinü tsüngmukbanü, thüningbo ching kebo arungchoh;
api alomi akheam chingnü amobo yükihshihchoh.
Apinü tsüng lung chinchobe arüshihchoh tüsho api zowupung yambo chingnü apung hankhitchoh.
17Mihbüm abannü zhazhalah tüsho mükheahmudu müla;
sunakingrübo alala arü sangthsübo hode achih ngüdo;
tümüde arü mejakbo amülim tüsho arü kheak sheak müla.
18Arübo müthülünkhi, thiyuro mülakhi rhimo ah;
arü thsümüchi kim ching arübo dükheakbah.
19Jakob Thrünpuh a harü ruk yung,
tümüde kukruk alala kamkhitshihkhi ju api ah,
tüsho Israel ju api yamrüplurüp trük lah;
Wuto Atungpuh ju api mung.
20Nü a I yo thirithsü yümlung, I yo keochih thsühnuk;
nü shuhbah inü trükshihbo yümnakchoh;
nü shuhbah inü kiulongthsübo thsümünimchoh;
21nü hode inü khorabo tüsho ju kheak binrü yümnakchoh;
nü hode inü khora-lolungbe tüsho aberü yümnakchoh;
22nü hode inü athrürü tüsho aliberü yümnakchoh;
nü hode inü ashinbuhrü mihtsürü tüsho athunu yümnakchoh;
nü hode inü athrününgtsüng tüsho anünürü yümnakchoh;
23nü hode inü namfimihnu neakrü tüsho mihnu boto yümnakchoh;
nü hode inü thulu-thsürü tüsho moshipungbo yümnakchoh;
nü hode inü kovünorbo tüsho atorübo yümnakchoh.
24Zion ching arünü nüsa kheak amülim rhimokhi alala dünkheaknü nüsa mük kinü inü Babilon tüsho Kaldearü ki jihlobah, Atungpuhnü thachoh. 25Inü nü azhihde lah, O athsümünimrü wung, Atungpuhnü thachoh, küpü hode alomi abümnü thsümünimcho; inü nü azhihde I khah chungkihbah, tüsho inü nü lungku chingnü lungde yükishihbah, tüsho takabahkhi wung kamshihbah. 26Amühit lung yungsho khimtan lung nü kheaknü mulu, tüshe nü a kamruhroro abahkhi labah, Atungpuhnü thachoh.
27Lomi ching riphin khülang shuhkihang, trükshih bolung hulipungpung mütang; anihbe azhihde thirithsüpü trükshihbo thsakhamang, anihbe azhihde kiulongthsübo, Ararat, Minni, tüsho Ashkenaz jimukhungang; anihbe azhihde limthorü mokhitang, tangkho boto nangde khorabo hande akhiukang. 28Anihbe azhihde thirithsüpü trükshihbo, Midia kiulongthsübo, arü lung kovünorbo tüsho atorübo, tüsho arü yukhüm khüp lakhi lomi aban thsakhamang. 29Alomi ajanchoh tüsho niukchoh, tümüde Babilon azhihde Atungpuh lümkhi, Babilon lomi mihtsürü mülade azhikkhi kamshihpü lah. 30Babilon thirithsürübonü keochihpü tuklodo, arübo chipi ayünkhi ching lah; arü sühmüh keaka lah, arübo azoberü kamdo; anihbe yambo keak mo takkihdo, akhrihbebo zhaka lah. 31Alihrü khülangnü püpürü shorupü tüsho yunithsürü khülangnü püpürü shorupü, api kiuto akheamnü akheam khiungde alukhi Babilon kiulongthsüpuh ki thapü alihchoh: 32Kedükihhopung yandoa lah, khiukbo monü takdo, tüsho bonungrübo atrekhi ching lah. 33Tümüde Wuto Atungpuh , Israel Thrünpuhnü ha thachoh: Tsührübe Babilon a hinitpung ching nitkhi nangde lah, anihbe yimlupü kim nahde arübah. 34Babilon kiulongthsüpuh Nebukednezarnü I muyudo, apinü I zünakdo; apinü I akeangkeang sangdan kamshih, phuruto khülangnü nangde apinü I muyuabah; I shih-akebenü api bukthsüshih, apinü I muliuhkhita bah.
35Zion ching larünü athabah,
“ I shih thsümünimkhi ju Babilon kheak yükihshang.”
Jirusalemnü athabah,
“ I thiyih ju Kaldea ching larü kheak yükihshang.”
36Jumonü Atungpuhnü ha thachoh: Inü nü tsunglobah tüsho nü thsungkheak royimbah. Inü anihbe kebo ngahshihbah tüsho kenü kungshihbah; 37tüsho Babilon ju athsümünim mujung, shirungbo yam, mihtrebe kukruk tüsho ish thsübe, mihtsürü mülade akambah. 38Kekhüzübo nangde arü rukhüh arungbah; arünü kekhüzü nunu nangde ahukbah. 39Küyimki arü mulong phurubanü, inü arü yungbe zojihbah tüsho arübo masühyi khiungde müshangshihbah tüsho kamruhroro yapshihbah tüsho küyimkishe müyihmusu, Atungpuhnü thachoh. 40Inü arübo namfimihnunubo nangde, namfimihnupungbo tüsho mihnubo nangde alaksahpü bedakibah.
41Küde alomi lüpdükhi kükheangkhi Sheshak rama lude! Küde Babilon trükshih bolung mihtrebe kama la! 42Ketonü Babilon kurungkheak zünkihdo; anihbe ju düchi ke-abükkhinü zündoa lah. 43Anihbe kiutobo zhikrangkhündo, akung lomi, tüsho loshelo, she mülakhi lomi, tüsho mihtsürünü muhokhi kamdo. 44Inü Babilon thrünpuh Bel thsümüchibah, tüsho apinü amuyukhi mülümkhitshihbah. Trükshihbonü kheaküa api ki shode müyü; Babilon chipi keamdo.
45Anihbe kheaknü akhiukang, I mihtsürü! Atungpuh bukakhiukkhi chingnü nüsa mihbüm aban rhangdung khümkhitang! 46Lomi ching arhunganimkhi sobah mulong dünini yungsho trede düla–kam khülang ching arhunganim khülang arüchoh, ashikampü püpü arüchoh, lomi ching athsümünim düsheak tüsho yakzanshuhrünü yakzanshuhrü azhihkhi lah. 47Tsükjide inü Babilon mejakbo thsümüchipü kim arüchoh; anihbe lomi abümnü achih ngübah, tüsho alaksahkhi alala anihbe bolung labah. 48Jüdüki thüningbo tüsho alomi, tüsho jurü ching lakhi alalanü Babilon kurungkheak asühde ahobah; tümüde arü azhihde athsümünimrü dukulimnü arübah, Atungpuhnü thachoh. 49Babilon a lomi alala laksahkhi nangde Israel laksahkhi dünkheaknü akeambah.
50Nüsa nukshang chingnü atsokhitrübo, yüang, daleang! Limshu lomi ching Atungpuh lümkhitang, tüsho nüsa lüm ching Jirusalem arüshang. 51Isa achih ngüdo, tümüde mükhemürangkhi isanü sodo; achihkhinü isa miro lüpdolah, tümüde khiungkerübo Atungpuh yam amüsüh dangpungbo ching azahdo. 52Jumonü inü anihbe sangthsübo thsümüchipü kim tsükjide arüchoh, tüsho anihbe lomi alala ching yurirünü ashearabah. 53Babilonnü thüning lim yükihkih she, tüsho anihbenü chipi changde ayünyün she, I kilimnü athsümünimrü anihbe kheak arübah, Atungpuhnü thachoh.
54Babilon chingnü azhikhi,
Kaldearü lomi chingnü alanajikhi ato aniang!
55Tümüde Atungpuhnü Babilon thsümünima yapshihlah,
tüsho anihbenü changde alankhi zhikshihdo.
Arü riribo apheankhi ju ke ato arungkhi nangde,
arü alanajikhi düsheak alankihchoh;
56tümüde athsümünimrü khülang Babilon azhihde arüdo;
anihbe thirithsürübo luabahdo,
arü sanglühbo zhaka lah;
tümüde Atungpuh ju ashaklo Thrünpuh ah,
apinü mide ajihlobah.
57Inü anihbe torübo tüsho lümlung larübo müshangshihbah,
kovünorbo she, atorübo tüsho thirithsürübo;
arünü kamruhroro yapbah tüsho küyimkishe masürü,
kiulongthsüpuhnü thachoh, shepü mung Wuto Atungpuh la.
58Wuto Atungpuhnü ha thachoh:
Babilon chipi ato ju alo arihde akambah,
tüsho anihbe chipiripit achangbo monü atakbah.
Mihtsürübo akeangkeang ching khichoh,
tüsho trükshihbonü mo thsungkheak lang rhimochoh.
Jeremia Yusheak Babilon ching Yüshihkhi
59Juda kiulongthsüpuh Zedekia kiulongthsükhi kam phüyipü ching, api lung Maseia tsührü Neria tsührü Seraia yüchoki wukihbuh Jeremianü thiyukhüm jihkhi yu. Seraia ju kukruk-putungrü lakheah. 60Babilon kheak arüpü lakhi thsümütsü alala, Babilon dünkheak thrütkhi yubo alala Jeremianü küpqiu kheak thrüt. 61Tüsho Jeremianü Seraia ki tha: “ Küyimki nü Babilon ching arübanü, harü yubo alala achangnü kheang, 62tüsho thaang, ‘ O Atungpuh , nünü ha dangpung ching mihtsürü yungsho shiwüh mülapü thsüde athsümünimpü müzündo, tüsho ha lünnü azhikkhi labah.’ 63Küyimki nünü ha küpqiu khekhambanü, ju kheak lung rhükkihang, tüsho Euphra ayung ching jipyukang, 64tüsho thaang, ‘ Hanangde inü anihbe kheak thsümütsü handarükhi dünkheak Babilon keamyukbah, masürülo.’ ”
Ha khiungde Jeremia yubo lah.
Currently Selected:
JEREMIA 51: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
