JEREMIA 50
50
Babilon tüsho ju Mihtsürü Mahkhapkhi
1Babilon tüsho Kaldea lomi dünkheak wukihbuh Jeremia hode Atungpuhnü asukkhi yu:
2Trükshih bolung thaang tüsho zhiyukang,
riphin khimang tüsho zhiyukang, ha düram, thaang:
Babilon dümdo, Bel achih ngüdo, Merodak mulong ninido.
Anihbe mejak achih ngüdo, anihbe sangthsü mulong ninido.
3Tümüde dukulimnü trükshih khülang anihbe azhihde arübah; junü anihbe lomi zhikshihbah, tüsho ju ching she müla; mihtsürü tüsho shiwühbo chido tsoabahbah.
4 Atungpuhnü thachoh, ju nimung ching, ju kim ching, Israel mihtsürü tüsho Juda mihtsürü rukhüh arübah; arünü Atungpuh arü Thrünpuh yimde tripde arübah.
5Arünü Zion limro keokhibah, tüsho ju lim arü miro anguhbah tüsho arünü küyimkishe mümihbe akheam müla tangzüng hode A TU N GPU H kilim arübah tüsho arihbah.
6I mihtsürübo adükheakkhi namfimihnu lakheah; arü namfimihnu neakrübonü awungbo lim rholoshihde bephülapdo; awungbo chingnü müzüngbo ching rümde yü, arünü arü lapung yam mihdo. 7Arü ngürü alalanü arü tsühabahdo, tüsho arü riribonü tha, “ Isa amülim müla, tümütüsho arünü thiyuro rimlopung, Atungpuh , arü jipürü mulonglam Atungpuh azhihde neak yihbeakdo.”
8Babilon chingnü tsoang, tüsho Kaldearü lomi chingnü wukhiukang, tüsho mihnu boto bekhi mihnu pungbo nangde thsang. 9Tümüde inü thurumusubah tüsho dukulim lomi chingnü trükshih boto ato Babilon azhihde handarüpü lah; tüsho arünü anihbe azhihde aduklangbah; arü hühzobo ju khah keangkeang malodarükhi ayeanzo thirithsürü hühzobo nangde lah. 10Kaldearü yankhia lubah; anihbe yankhia lurü alala reangkeambah, Atungpuhnü thachoh.
11Nü asühachihchih she, nü asüharara she, O I yamrüplurüp yankhia lurübo, moshinü hi jungkhi nangde tüsho khoranü akhungkhi nangde, 12nü be lümchihyuk ngübah, tüsho nü zübebe mungchih ngübah. Kheahang, anihbe trükshih bolung akheambe labah, sunglo, akunglo, tüsho ke-mülakhi loshelo labah. 13Atungpuh bukakhiukkhinü Babilon ching she mülade zhikrangkhündo alabah; Babilon horü abannü müyinsahbah tüsho anihbe mübo alala thsungkheaknü ish thsübah.
14Babilon mükamde nüsa sanglüh hünkihrü alala zhippung thsakhamang; anihbe kheak kipang, hühzobo daningshih, tümüde anihbenü Atungpuh azhihde neak yihbeakdo. 15Thrip alala chingnü anihbe azhihde ahoang, “Anihbenü khah shuhkihabahdo; anihbe khimtanbo keamdo, anihbe chipibo thokheamdo.” Tümüde ha Atungpuh royimkhi lah: anihbe kheak royimang, anihbenü rhimokhi nangde anihbe ki rhimoang. 16Babilon chingnü müjih-hiurü tüsho yimlu kim ching hirhüpbe dükheakshang; tümütüsho athsümünimbe nukshang trekhinü arü mihbüm aban nihbuh mihtsürü kilim rholobah, tüsho nihbuh lomi lim shande ayübah.
Israel Alodarü
17Israel a kekhüzünü namfimihnu yanmüzütkhi nangde lah. Akhuhde Asiria kiulongthsüpuhnü api muyu, tüsho kheakü akheam ching Babilon kiulongthsüpuh Nebukednezarnü arobo mutro. 18Jumonü, Wuto Atungpuh , Israel Thrünpuhnü ha thachoh: Inü Asiria kiulongthsüpuh thsümüchikhi nangde Babilon kiulongthsüpuh tüsho api lomi thsümüchibah. 19Inü rimlopung ching Israel belodarübah tüsho Karmel kheak le Bashan ching yimtsühshihbah, tüsho Ephraim wungbo kheak Gilead ching apinü akünkhi reangkeambah. 20Atungpuhnü thachoh, ju nimungbo ching tüsho ju kim ching Israel mülimkhi yimbah, tüshe mülade alabah; tüsho Juda neakbo yimbah, tüshe müngü; tümüde inü aninga lashihkhi neak bahjihbah.
21Merathaim lomi lim wutuang; anihbe azhihde wutuang, tüsho Pekod ching larü yanang tüsho shahde arü dükheakshang, Atungpuhnü thachoh; inü nü ki thiyukhüm jihkhi alala rhimoang. 22Lomi ching keochih düsheak tüsho athsümünim ato lah! 23Lomi athrünkhi yümlung küdükhüh lang adütre kamde thsümünima la! Trükshih bolung Babilon küdükhüh she yingyingbe khunga la! 24O Babilon, nünü nü thsungkheak azheang zo tüshe ju nünü mümükheahde nü phuhdo; nü a yimkhit tüsho tholo, tümütüsho nünü Atungpuh azhihdo. 25Atungpuhnü api thsühnuk zopung khimshuhdo, tüsho api bukakhiukkhi thsühnuk yihkhitdo, tümüde Wuto Atungpuh Thrünpuhnü Kaldearü lomi ching rhimopü khülang lah. 26Thrip aban chingnü anihbe azhihde arang; anihbe jakambo khimshuhang; hi wumujungkhi nangde anihbe mujungshang, tüsho shahde anihbe thsümünimang; anihbe yo tümü she daningshih. 27Anihbe moshi alala laksahang. Arü thsungkheak aha, arü nimung, arü thsümüchipü kim arüdo!
28Aniang! Babilon lomi chingnü tsotsahrümtsahrübo Atungpuh isa Thrünpuh royimkhi, api arüngyam royimkhi Zion ching zhiyukpü arüchoh.
29Babilon azhihde hühzo-kiprü, sanglüh hünrü alala jimukhungang. Anihbe mükamde alala binang; sheshe dütsokhishih. Anihbe rhimobo yande anihbe ki jihloang; anihbenü arhimokhi nangde, anihbe ki rhimoang–tümüde anihbenü bukakhiukde Atungpuh , Israel Amüsühbuh ki keochihdo. 30Jumonü anihbe yo athrününgtsüngbo anihbe kiudunglimrobo ching keambah, tüsho anihbe bonungrü alala ju nimung dükheakbah, Atungpuhnü thachoh.
31Inü nü azhihlah, O kükheangküyangbuh, Wuto Atungpuh Thrünpuhnü thachoh; tümüde nü nimung, inü nü thsümüchipü kim arüdo. 32Akükheangbuh jing mükhebah tüsho alungbah, shenü api müyihmusu tüsho inü api kiutobo ching mo takkihbah, tüsho api mühide alala inü aniukhambah.
33Wuto Atungpuhnü ha thachoh: Israel mihtsürü tüsho Juda mihtsürü junoa lah; arü ramrü alalanü arü düngde tholodo tüsho mütsoshih. 34Arü Rhokhitbuh sühmüh lah; Wuto Atungpuh ju api mung. Apinü tsükjide arü dünkheak müküpde azhipbah, junangde apinü aningkhi lomi kilim sühakhim jihbah, tüshe Babilon ching larü kilim sühakhim mülakhi jihbah.
35Kaldearü tüsho Babilon ching larü azhihde,
tüsho anihbe torübo tüsho lümlung larü azhihde nukshang khülang lah, Atungpuhnü thachoh!
36Müchitrü azhihde nukshang lah,
junangde arübo makharü kambah!
Anihbe thirithsürü azhihde nukshang lah,
junangde arübo niuknimbah!
37Anihbe khorabo tüsho khora-lolungbebo azhihde nukshang lah,
tüsho anihbe bolung khiungkerü thirithsürübo azhihde lah,
junangde arübo azoberü kamabah!
Anihbe rahpungbo alala azhihde nukshang lah,
junangde jurübo yankhia lubah!
38Kebo azhihde akung lah, junangde jurübo angahbah!
Tümüde ha mejakbo lomi khülang tüsho arünü sangthsübo dunglim bünde yüchoh.
39Jumonü mütüm shiwühbo tüsho wuyihbo Babilon ching labah, tüsho kewühtopübo ju ching labah; ha küyimkishe mihtsürü mülalo, yungsho lün alala thsungkheak müla. 40Atungpuhnü thachoh, Thrünpuhnü Sodom tüsho Gomorra thsümünimchoki nangde sheshe ju ching müla, yungsho she mihtsürü ju ching müla.
41Kheahang, mihtsürü khülang dukulimnü arüchoh;
trükshih ato tüsho kiulongthsürü ahihdo limshu lomi chingnü thurumusuchoh.
42Arünü sanglüh tüsho thsüh shuhlah,
arübo bukmüke tüsho mihmüthsüm müla.
Arü düsheak ju keto arungkhi nangde lah;
arübo khorabo kheak binlah,
keochihpü thirithsürü nangde duklanglah,
nü azhihde, O tsührübe Babilon!
43Babilon kiulongthsüpuhnü arü yusheak sodo,
tüsho api khah keahkhia lah;
thsününü api ramlodo,
azoberü zübechoki thsünükhi nangde lah.
44Kekhüzü khülang Jordan rim akheah chingnü rimlopung aphüyak azhihde atukhi nangde, inü nahde arübo anihbe kheaknü yanyuka bahbah; tüsho inü mokhitkhi sherüanü anihbe kurungkheak zojihbah. Tümüde shepü I ruk la? Shenü I münitkhukla? I miki zhipkhukpü thsüde shepü namfimihnu neakrü a? 45Jumonü Atungpuhnü Babilon tüsho Kaldearü lomi azhihde apinü lümkhi thsükhi aniang: Tsükjide mihnu nunubo yanyuka bahbah; apinü arü dünkheaknü arü rimlopung shahde thsümünimbah. 46Babilon keamkhi düsheaknü alomi ajanbah, tüsho anihbenü azhikhi düsheak trükshih bolung sobah.
Currently Selected:
JEREMIA 50: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
