JEREMIA 52
52
Jirusalem Keamkhi
(2 Kiu 24.18—25.7)
1Zedekia kiulongthsüpü tankihchoki api kam 21 lakheah; apinü Jirusalem ching kam thürükheak khülang kiulongthsü. Abe mung ju Lebnarü Jeremia tsührübe Hamutal lakheah. 2Apinü Jehoiakimnü arhimokhi nangde, Atungpuh miki amütsübe rhimo. 3Atsütsü, Jirusalem tüsho Judanü Atungpuh khide bukakhiukshih, junangde apinü arübo amikinü yankhitabah.
Zedekianü Babilon kiulongthsüpuh azhih. 4Tüsho api kiulongthsü kam tukupü, khinu thürü, nimung thürü nipü, Babilon kiulongthsüpuh Nebukednezarnü api bonungrü alala bebah Jirusalem azhihde arü, tüsho arünü kiuto aleanglim binpung thsü; arünü ju mühide aheangyünbo thsü. 5Jumonü kiulongthsüpuh Zedekia kam thürükheak khülang khiungde kiuto ju yandoa lakheah. 6Khinu phüyi nimung tuku nipü ju kiuto ching khümzung muthsukde arükhi hode lomi mihtsürü thsungkheak tsühyungpü mülade alakheah. 7Judüki kiuto chipi ching rhümashung; tüsho kiuto mühide Kaldearü lalashe bonungrübonü shan tüsho kiulongthsüpuh shahwün ki chipi mahne dükeak khuhto-ripit chingnü azhing ching kiuto chingnü wukhiuk. Arünü Araba limpeang yü. 8Tüshe Kaldearü bonungrübonü kiulongthsüpuh Zedekia yande müsham tüsho Jirikho dükhün chingnü Zedekia yanphuh; tüsho api bonungrü alalanü api bahbah hiumüzüt. 9Judüki arünü kiulongthsüpuh tholo, tüsho api ju Hamath lomi Ribla ching Babilon kiulongthsüpuh kilim hande atu, tüsho apinü anihbuh sheshihpü thaa jih. 10Babilon kiulongthsüpuhnü Zedekia tsührübo api mük kinü laksah, tüsho Juda torübo she alala Ribla ching laksah. 11Apinü Zedekia mükjibo khünkhit, tüsho yinchiliunü api rhük, tüsho Babilon kiulongthsüpuhnü api Babilon ching bede yü, tüsho api shekhi nimung khiungde rihyam ching yuka zo.
Arüngyam Thsümünimkhi
(2 Kiu 25.8-17)
12Khinu phüngü, nimung thürü nipü–küpü Babilon kiulongthsüpuh Nebukednezar kam thürükheak tukupü lakhea–Babilon kiulongthsüpuh tankihrü, aheangrü wühkenobuh Nebuzaradannü Jirusalem ching yüzah. 13Apinü Atungpuh yam, kiulongthsüpuh yam, tüsho Jirusalem yambo alala tak; atorü yambo alala takabah. 14Aheangrü wühkenobuh lung yürü Kaldearü bonungrü alalanü Jirusalem mühide chipi yihkheamabah. 15Aheangrü wühkenobuh Nebuzaradannü zhochih traktrak mihtsürü khürü tüsho kiuto ching aninga larü mihtsürübo tüsho Babilon kiulongthsüpuh kilim tsorü, ju lung keaklahrü bebah ramtso ching yü. 16Tüshe aheangrü wühkenobuh Nebuzaradannü lomi ching zhochihrü mihtsürü khürü kurungaso-nitrü tüsho alo kiurü thsüpü aninga lashih.
17 Atungpuh yam ching lakhi müwayinchi dungjingbo, tüsho dubopungbo tüsho müwayinchi kekung, Kaldearünü adütre kamde yihthünak, tüsho müwayinchi alala Babilon ching hanbah yü. 18Arünü phühbo, mokhih-müjipbe, phühshuhbe, müsühmüra-phuru, jakobo, tüsho arüngyam mukhungmüdan ching ahoribe müwayinchi pungphurubo alala lubah tso. 19Aheangrü wühkenobuhnü phurusük aninibo, mophuru, müsühmüra-phuru, phühbo, tsünpung zopung, jakobo, tüsho pungbo she suna tüsho shotoyinchinü athsükhi lu. 20Dungjing 2, kekung 1, kekung khüp lakhi müwayinchi moshi 12 tüsho dubopungbo, küpü kiulongthsüpuh Solomon nü A TU N GPU H yam thsungkheak thsükhea, müwayinchi pungphurubo alala madünbinbe lakheah. 21Dungjingbo ju, dungjing khülang achanglim limthrip 8, atolim limthrip 5.3 lakheah; ju alung ching akeangkeang lakheah tüsho akheahlim yingkhing 4 lakheah. 22Ju kheak müwayinchi düthrün lakheah; düthrün khülang ju achanglim limthrip 2.2 lakheah; yakthsükhi tüsho tsarümkiubo, alala müwayinchi adüthrün mükamde thsü. Tüsho mahnepü dungjing she ju ruk tsarümkiubo lakheah. 23Arheanglimbo kheak tsarümkiu 96 lakheah; yakthsükhi mükamkhi tsarümkiu alala thsürubah 100 lakheah.
Judarü Babilon lim Bede Ayükhi
(2 Kiu 25.18-21,27-30)
24Aheangrü wühkenobuhnü akube amükeambuh Seraia bea lu, mahnepü amükeambuh Zephania tüsho ripit neakrü 3; 25tüsho kiuto chingnü apinü bonungrü limthorü atorü 1, tüsho kiuto ching lakhi kiulongthsüpuh lümthiyan-jihrü mihtsürü 7 bea lu; bonungrü limthobuh yo athrütbuh shepünü lomi mihtsürü trüngmukhungkhea; tüsho kiuto alunglim lakhi lomi mihtsürü 60. 26Judüki aheangrü wühkenobuh Nebuzaradannü arübo bea lu, tüsho Ribla ching Babilon kiulongthsüpuh kilim bebah arü. 27Tüsho Babilon kiulongthsüpuhnü Hamath lomi Ribla ching arübo kingsahabah. Jumonü Judarü ju nihbuh lomi chingnü ramtso ching yükheah.
28Ha Nebukednezarnü ramtso ching bede ayükhi mihtsürü khekhi: kam thünepü ching Judarü 3023; 29Nebukednezar kam thürükheak tizheahpü ching apinü Jirusalem chingnü mihtsürü 832 ramtso ching bede yü; 30Nebukednezar kam mukukheak mahsampü ching, aheangrü wühkenobuh Nebuzaradannü Juda mihtsürü 754 ramtso ching bede yü; mihtsürü alalanü 4600 lakheah.
31Juda kiulongthsüpuh Jehoiakin ramtso ching lakhi kam samrükheak thünepü, khinu thürükheak mahne, nimung mukukheak phüngü nipü, Babilon kiulongthsüpuh Evil-merodaknü api kiulongthsü atankih kam, Juda kiulongthsüpuh Jehoiakin ki amuzho huh tüsho rihyam chingnü api bekhit; 32apinü anihbuh ki muzhode asuk, tüsho Babilon ching api lung lakhi kiulongthsürü püpürü binkiubo kumung kheak api kilim wüntre jihkhi binkiu khülang jih. 33Jumonü Jehoiakinnü api rihyam khimmihbo müthri, tüsho api rhangdung ching nimung aban kiulongthsüpuh dükhüm kheak yimtsüh. 34Nimung abande Babilon kiulongthsüpuhnü Jehoiakin kilim, api rhangdung lakhi amuyung, api shekhi nimung khiungde api mihkhahmo mutukzhakde jih.
Currently Selected:
JEREMIA 52: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
