JEREMIA 43
43
Ijip ching Jeremia Bede Ayükhi
1Küyimki Jeremianü Atungpuh arü Thrünpuhnü arü kilim thiyia yüshihkhi Atungpuh arü Thrünpuh yubo alala mihtsürübo ki thakhamkhea, 2Hoshaia tsührü Azaria le Karea tsührü Johanan tüsho püpürü bukmüke mihtsürübo alalanü Jeremia ki tha, “ Nünü akeangyu thachoh. Atungpuh isa Thrünpuhnü hade athashihpü nü müthiyi, ‘ Ijip ching lapü düyü’; 3tüshe Neria tsührü Baruknü isabo Kaldearü khah ching jihshihpü isa azhihde nü thurumusuchoh, junangde arünü isa laksahbah yungsho Babilon ching rama lubah ayübah.” 4Jumonü Karea tsührü Johanan tüsho thirithsü limberübo alala tüsho mihtsürü alalanü Juda lomi ching lapü Atungpuh yu mani. 5Tüshe Karea tsührü Johanan tüsho thirithsürü limberü alalanü arü müzütpung trükshihbo alala chingnü Juda lomi ching lapü arülokhi aningkhi Juda alala bea lu– 6athrürübo, aliberübo, azürübo, kiulongthsürü tsührübo, tüsho aheangrü wühkenobuh Nebuzaradannü Shaphan tsührü Ahikam tsührü Gedalia lung lashihrü alala; kheaküshe wukihbuh Jeremia tüsho Neria tsührü Baruk. 7Tüsho arübo Ijip lomi ching yüzah, tümüde arünü Atungpuh yu mani. Tüsho arübo Tapanhes ching arü.
8Judüki Tapanhes ching A TU N GPU H yu Jeremia kilim arü: 9Nü khah ching lung khürü luang, tüsho Tapanhes ching Pharao yam ching yüzah limro kheak alo-jingtsahpung ching kiua ramang. Nünü ju rhimokhi Judarünü ngüshang, 10tüsho arü ki thaang, Wuto Atungpuh , Israel Thrünpuhnü ha thachoh: Inü Babilon kiulongthsüpuh I yamlarü Nebukednezar bedarübah, tüsho inü ayangkhi lungbo kheak api kiulongthsü zobah, tüsho apinü jurü kheak kiulongthsü-khim phukihbah. 11Apinü arübah Ijip lomi kukbah, ashepü akhua larü kilim ashepü, arampü akhua larü kilim arampü tüsho nukshang akhua larü kilim nukshang handarübah. 12Apinü Ijip thrünpuhbo arüngyambo ching mo thsahkihbah; tüsho apinü jurü takbah tüsho rama lubah atsobah; tüsho namfimihnu neakrünü düthre dütrünkhia bahde nihbuh khimmih zünga lukhi nangde, apinü Ijip lomi zünga lubah; tüsho ju chingnü api tümü müthsüde awukhiukbah. 13Apinü Ijip lomi Heliopoli ching lakhi amüsüh dungjingbo thsümünimbah; tüsho Ijip thrünpuhbo arüngyambo monü atakbah.
Currently Selected:
JEREMIA 43: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
