JEREMIA 44
44
Ijip ching Israelrü kilim Atungpuh Yusheak
1Jihudarü Ijip lomi ching larü, Migdol ching, Tapanhes ching, Memphis tüsho Pathros ching larü alala thsungkheak Jeremia kilim thiyu arü, 2Wuto Atungpuh , Israel Thrünpuhnü ha thachoh: Inü Jirusalem tüsho Juda kiutobo alala kheak handarükhi thsümütsü alala nüsanü ngüdo. Jurübo kheak kheahang; ha nimung jurübo mihtsürü mülade zhikrangkhündo lah, 3tümütüsho arünü amütsü rhimodo. Arünü arü yungsho nü yungsho nüsa jipürübonü küyimkishe mümükheahkhi thrünpuhbo ki rhümthüneabe takde tüsho kingaünde I bukakhiukshih. 4Judüalalashe, inü I yamlarübo wukihrübo alochode thiyia arüshihde tha, “ Inü athraneankhi ha athraneanbe dürhimo!” 5Tüshe arünü arü amütsü chingnü arholopü tüsho püpürü thrünpuhbo ki mükingaünpü thsüde mani yungsho arü nükhün manguh. 6Jumonü Juda kiutobo tüsho Jirusalem kiudunglimrobo ching I bukakhiukkhi dungkih tüsho trushih; tüsho jurübo athsümünim tüsho zhikrangkhündo kamabah, jurübo khihni khiungde lah. 7Tüsho kheakü Wuto Atungpuh Israel Thrünpuhnü ha thachoh: Tümüde nüsanü nüsa yuripü, Juda bolungnü nüsa maningde athrürü tüsho aliberü, azürü tüsho khungarü dükheakpü rhimocho? 8Tümüde nüsa lapü arükhi Ijip ching nüsa khahnü arhimokhi püpürü thrünpuhbo ki kingaünkhinü I bukakhiukshihcho? Nüsa thsümünimba de tüsho lomi trükshih alala bolung muthrumünean tüsho münedung kamba de? 9Nüsa jipürü, Juda kiulongthsürübo, arü niuberü tüsho nüsa le nüsanü alakmihkhibo, Juda lomi tüsho Jirusalem kiudunglimrobo ching arünü ayihbeakkhibo nüsanü mihabahdo de? 10Arünü azhihayihkhi yungsho atrekhi khihni khiungde muhuh, yungsho inü nüsa le nüsa jipürü miki zojihkhi I yakzan tüsho I yuzüngbo ching arünü mütsah.
11Jumonü Wuto Atungpuh , Israel Thrünpuhnü ha thachoh: Inü Juda alala kheamshihpü, nüsa kheak thsümütsü handarüpü lümkihlah. 12Ijip lomi ching lapü lümkihbah ayürü Juda aningkhi inü lude atsobah, tüsho arü mihbüm abannü adükheakbah; Ijip lomi ching arübo keambah; nukshang tüsho khümzungnü arübo dükheakbah; anikhühnü ato khiungde, arübo nukshang tüsho khümzungnü ashebah; tüsho arübo athruaji tüsho atrebe, muthrumünean tüsho münedung kambah. 13Inü Jirusalem thsümüchikhi nangde, Ijip lomi ching larü nukshang, khümzung tüsho arümtukthsünü thsümüchibah, 14junangde Juda aningkhi, Ijip lomi ching lapü arürü mutsokhi yungsho rhangdung müla yungsho Juda lomi ching malodarü. Arünü ju ching lapü yünede lümlüm she tsokhia larü khürü kheak hode, arü alode müyü.
15Judüki arü niuberübonü püpürü thrünpuhbo kilim rhümthüneabe takchoh de mükheahrü, athrürü alala, tüsho amukhungrü ato miki zhiprü aliberübo alala, Ijip lomi Pathros ching larü mihtsürü alalanü Jeremia ki alo: 16“Atungpuh mung chingnü nünü isa ki asukkhi yu isanü nü ki mani. 17Ju müthri, isa le isa jipürübo, isa kiulongthsürübo tüsho atorübonü Juda kiutobo tüsho Jirusalem kiudunglimrobo ching rhimokhi nangde, yinmi kiulongthsübe ki rhümthüneabe kingaünde tüsho anihbe ki yukhu bukkihde lüpdükhi isanü athakhi rhimobah. Junangde isa tsühyungpü suhde, tüsho lalim tsüde alakheah, tüsho kuhi amütsü tümü müngü. 18Tüshe isanü yinmi kiulongthsübe ki kingaünpü tüsho yukhu dungpü tuklokhi kimnü rünbah, isa tümü müla tüsho nukshang le khümzungnü dükheakdo.” 19Tüsho aliberübonü tha, “ Isanü yinmi kiulongthsübe ki judü lang kingaünbah tüsho yukhu dungkihbah; isa niubuhrübo ki mükeode isanü anihbe jak yande yikhap thsüchoh, tüsho anihbe ki yukhu dungchoh de nünü lümcho de?”
20Judüki Jeremianü mihtsürü alala, athrürü tüsho aliberü, api ki alorü mihtsürü alala ki tha: 21“ Nüsanü Juda kiutobo tüsho Jirusalem kiudunglimrobo ching rhümthüneabe takkhi ju, nüsa tüsho nüsa jipürübo, nüsa kiulongthsürübo tüsho atorübo, tüsho lomi mihtsürübo, Atungpuhnü arü mülümkhit de, ha api lüm ching marüba de? 22Nüsanü amütsü rhimokhibo tüsho nüsanü athraneanbe yihbeakkhi Atungpuhnü marümkhuk; jumonü nüsa lomi azhikkhi tüsho athsümünim tüsho muthrumünean, mihtsürü mülade, khihni ha nangde kamshihbah. 23Ha tümütüsho nüsanü kingaünbo tak, tüsho nüsanü A TU N GPU H azhihde neak yihbeak tüsho Atungpuh düsheak mani yungsho api yakzan tüsho thiyuzüngbo ching mütsah, hanü khihni amütsan lakhi nangde ha thsümütsü nüsa kheak arükheah.”
24Jeremianü mihtsürü alala tüsho aliberübo ki tha, “Atungpuh yu aniang, nüsa Ijip ching larü Judarü alala, 25Wuto Atungpuh , Israel Thrünpuhnü ha thachoh: Nüsanü athakhi yu rhimo ching akuk ngüdo, ‘ Isanü thiyuchihchimkhi rhimopü isanü lümkihlah, yinmi kiulongthsübe ki rhümthüneabe takpü tüsho anihbe ki yukhu bukpü.’ Nüsa thiyuchihchimkhi dükde zoang! 26Jumonü Atungpuh yu aniang, Ijip lomi ching larü nüsa Judarü alala: Kheahang, I mung ato hode inü thiyuchihchimchoh, Atungpuhnü thachoh, Ijip lomi alala ching Juda mihtsürü shepü münküp kheak she ‘ Atungpuh T H RÜ NPU H lah’ de dütha. 27Inü arü kurungkheak athsümünimpü kheahbah tüsho atsü thsungkheak yung; Ijip ching lakhi Juda mihtsürü alala nukshang tüsho khümzungnü, khülang she maningyi khiungde dükheakshihbah. 28Tüsho nukshang chingnü atsokhitrü akhekhi nükde Ijip lomi chingnü Juda lomi lim alodarübah; tüsho aningkhi Juda Ijip lomi ching lapü arürübonü I yu a shi arü yu zhipbanü amükheahbah! 29Ha nüsa ki amütsan labah, Atungpuhnü thachoh, inü nüsa ha dangpung chingnü thsümüchibah, ju hode nüsa azhihde I yubo tsükjide arhimobah de nüsanü mükheahbah: 30Atungpuhnü ha thachoh, inü Juda kiulongthsüpuh Zedekia, api rhangdung yimrü Babilon kiulongthsüpuh Nebukednezar khah ching jihkhi nangde, inü Ijip kiulongthsüpuh Pharao Hophra, api rhangdung yimrü ariribo khah ching jihbah.”
Currently Selected:
JEREMIA 44: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
