JEREMIA 42
42
Jeremia ki Tamkhüntamnüpü Thakhi
1Judüki thirithsürü limberü alala, Karea tsührü Johanan tüsho Hoshaia tsührü Azaria tüsho mihtsürü anikhühnü ato khiungde arübah 2wukihbuh Jeremia ki tha, “ Isanü mushukhi tsüde anijang, tüsho isa thsungkheak Atungpuh nü Thrünpuh ki tamkhüntamnüjang– harü aningkhi alala thsungkheak. Tümüde nü müknü ngülah, ahihdo chingnü isa anükhüh lang aningdo. 3Isa küching yüba tüsho isa tümü rhimobeanü Atungpuh nü Thrünpuhnü isa ki huhshang.” 4Wukihbuh Jeremianü arü ki tha, “ Khide tsülah: Nüsanü mushukhi nangde Atungpuh nüsa Thrünpuh ki inü tamkhüntamnübah, tüsho Atungpuhnü tümüpürü nüsa ki alobanü inü nüsa ki thabah; inü tümü she nüsa kheaknü müram.” 5Arünü alode Jeremia ki tha, “Atungpuh nü Thrünpuhnü isa thsungkheak nü hode thiyukhüm jihkhi yande lüpdükhi isanü mürhimosho Atungpuh thiyuro lashang tüsho isa azhihde athülünkhi thiyumütsan thsüshang. 6Atsü yungsho amütsü thsüthsü, isanü shepü kilim nü yüshihchonü Atungpuh yu isanü anibah, ju yande isanü Atungpuh isa Thrünpuh yu anichoki isa tsüde ayübah.”
Atungpuhnü Jeremia Tamkhüntamnü Alojihkhi
7Nimung thürü dunglim A TU N GPU H yu Jeremia kilim arü. 8Judüki apinü Karea tsührü Johanan tüsho api lung lakhi thirithsürü limberübo alala, tüsho mihtsürü alala anikhühnü ato khiungde jimukhung, 9tüsho arü ki tha, Nüsanü mushukhi jihshihpü nüsanü shepü kilim I yüshihkhea, Atungpuh Israel Thrünpuhnü ha thachoh: 10Nüsanü lang ha lomi ching lasho, inü nüsa bemusubah tüsho nüsa muthokheam; inü nüsa khimbah, tüsho nüsa murukkhit; tümüde inü nüsa kheak thsümütsü handarükhi dünkheak I mulong ashilah. 11Babilon kiulongthsüpuh ki kheaküa dütre; api dütre, Atungpuhnü thachoh, tümüde api khah chingnü nüsa khümkhitpü tüsho bekhitpü I nüsa lung lah. 12Inü nüsa ki mihmüthsüm mülüjihbah, tüsho apinü nüsa kheak mihmüthsüm labah tüsho nüsa asürüpung lomi ching nüsa yülobah. 13Tüshe nüsanü mutuklode, “ Isa ha lomi ching müla,” de thasho, hanü Atungpuh nüsa Thrünpuh yu manide 14thachoh, “Muh, isa Ijip lomi ching yübah, küching isanü thirithsü müngüpü la, yungsho hulipungpung düsheak muso yungsho yikhap mülakhinü khümsahde müla, tüsho ju ching isa labah,” 15dale Atungpuh yu aniang, O aningkhi, Juda. Wuto Atungpuh , Israel Thrünpuhnü ha thachoh: Nüsanü Ijip ching yüzahpü tüsho ju ching lapü lümkihlasho, 16dale nüsanü atrekhi nukshangnü Ijip lomi ching nüsa yanphuhbah; tüsho nüsanü atrekhi khümzungnü Ijip ching nüsa dunglim yankihbah; tüsho ju ching nüsa shebah. 17Ijip ching yüpü lümkihrü mihtsürü alala nukshang, khümzung tüsho arüm-tukthsünü ashebah; inü arü kheak handarükhi thsümütsü chingnü arü aningkhi yungsho rhangdung larü mülade alabah.
18Tümüde Wuto Atungpuh , Israel Thrünpuhnü ha thachoh: I bukakhiukkhi tüsho I mulong zhipzhipkhi Jirusalem ching larü kheak dungkihkhi nangde, nüsa Ijip ching yüchoki nüsa kheak I bukakhiukkhi dungkihbah. Nüsa muthrumünean tüsho atrebe, abahyukpü tüsho münedung kambah; nüsanü ha dangpung küyimkishe müngülo. 19Atungpuhnü nüsa ki thado, O aningkhi Juda, Ijip lim düyü. Inü khihni nüsa ki thakhi tsüde lümrhangang, 20junangde nüsa ashepü lakmihpü lah. Tümüde nüsa zangrünü Atungpuh nüsa Thrünpuh kilim I thaa yüshih, “ Isa thsungkheak Atungpuh isa Thrünpuh ki tamkhüntamnüjang, tüsho Atungpuh isa Thrünpuhnü tümüpürü thabanü isa ki thaang tüsho isanü ju rhimobah.” 21Jumonü inü nüsa ki khihni thado, tüshe nüsa ki thashihpü apinü I thiyikhi tümü ching she nüsanü Atungpuh nüsa Thrünpuh yu mani. 22Tsüde mükheahang, junangde nüsanü küching yünela tüsho alapü künlanü ju dangpung ching nukshang, khümzung, tüsho arüm-tukthsünü nüsa shebah.
Currently Selected:
JEREMIA 42: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
