JEREMIA 41
41
1Khinu thünepü ching Elishama tsührü Nethania tsührü Ishmael, kiulongthsü yamkhün chingnü, kiulongthsüpuh atorü bolung khülang, apinü mihtsürü 10 bebah Mizpa ching Ahikam tsührü Gedalia kilim arü. Arübo Mizpa ching rukhühnü yikhap tsühde alachoki, 2Nethania tsührü Ishmael tüsho api lung mihtsürü 10 wusu tüsho Shaphan tsührü Ahikam tsührü Gedalia nukshangnü laksah, tümütüsho Babilon kiulongthsüpuhnü api lomi ching kovünor mokhita lakheah. 3Ishmaelnü Mizpa ching Gedalia lung lakhi Jihudarü alala tüsho ju ching larü Kaldea bonungrübo she laksah.
4Gedalia laksahkhi nimung ashidopü, shenü mümükheahyide, 5Shekem le Shilo tüsho Samaria chingnü mihtsürü 80 arü mükhühnam hüt tüsho khimmihbo rukrüp, tüsho arü pangbo tsüthünakbah, hi kingaün tüsho rhümthüneabe Atungpuh arüngyam ching jihpü lubah arü. 6Tüsho Nethania tsührü Ishmaelnü Mizpa chingnü arü shorupü tripde wukhiuk. Apinü arü shorubah arü ki tha, “Ahikam tsührü Gedalia kilim arang.” 7Küyimki arübo kiuto phulung khiungkhea, Nethania tsührü Ishmael tüsho api mihtsürübonü arü laksah, tüsho arübo kekung ching bah. 8Tüshe arü bolung ching mihtsürü 10nü Ishmael ki tha, “ Isa dülaksah, tümüde isa lubo ching wheat hi, barli hi, müdangke, tüsho mukhuke rama zokhi lah.” Jumonü apinü arü bemuwuh tüsho arü borü lungnü mülaksah.
9Kheakü Ishmaelnü mihtsürü laksahkhi pangbo alala yukkhi kekung ju kiulongthsüpuh Asanü Israel kiulongthsüpuh Baasha azhihkhi tsunglode athsükhi atobe lakheah; Nethania tsührü Ishmael nü kekung ju apinü alaksahkhinü mishih. 10Judüki Ishmaelnü Mizpa ching aninga lakhi mihtsürü alala, kiulongthsüpuh tsührübe tüsho aheangrü wühkenobuh Nebuzaradannü Ahikam tsührü Gedalia kilim jihkhi mihtsürü alala rama lubah yü. Nethania tsührü Ishmaelnü arübo rama lu tüsho Amonrü hode ayüpü tsahmusu.
11Tüshe küyimki Karea tsührü Johanan tüsho thirithsürü limberü alalanü Nethania tsührü Ishmaelnü yakzan thsümünimkhi alala sokhea, 12arünü arü mihtsürü alala bea lu tüsho Nethania tsührü Ishmael bede keochihpü yü. Arübo api kilim Gibeon ching kekhip ato ki arü. 13Tüsho küyimki Ishmael lung larü mihtsürü alalanü Karea tsührü Johanan tüsho api lung thirithsürü limberübo alala ngükhea arünü asüh. 14Jumonü Ishmaelnü Mizpa chingnü ramde atsokhi mihtsürü alala rholode arü, tüsho Karea tsührü Johanan kilim yü. 15Tüshe Nethania tsührü Ishmael a Johanan lung mihtsürü 8 bebah tsokhit, tüsho Amonrü kilim yü. 16Judüki Karea tsührü Johanan tüsho api lung thirithsürü limberübo alalanü Nethania tsührü Ishmaelnü Ahikam tsührü Gedalia laksah dunglim Mizpa chingnü rama lubah atsokhi mihtsürü aningkhibo alala bea lu–bonungrübo, azoberü, azürübo, dukhabo, Johanannü Gibeon ching belode arü. 17Arünü tsahmusu, tüsho Ijip lim yüpü lümbah Bethlehem phünide Geruth Kimham ching tuklo, 18ju Kaldearü dünkheaknü ah; tümüde arübonü arü trede alakheah, tümütüsho Babilon kiulongthsüpuhnü lomi kurungkheak kovünor mokhitkhi Ahikam tsührü Gedalia ju Nethania tsührü Ishmaelnü laksah.
Currently Selected:
JEREMIA 41: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
