JEREMIA 38
38
Kekung ching Jeremia Zokhi
1Kheakü Mattan tsührü Shephatia, Pashhur tsührü Gedalia, Shelemia tsührü Jukal tüsho Malkia tsührü Pashhurnü Jeremianü mihtsürübo alala ki thakhi yubo so, 2Atungpuhnü ha thachoh, Sherü ha kiuto ching labanü nukshang, khümzung tüsho arüm-tukthsünü ashebah; tüshe sherü Kaldearü kilim wukhiukbanü alabah; arü rhangdungbo thirithsü thsambah nangde rhangdung labah. 3Atungpuhnü ha thachoh, Tsükjide ha kiuto Babilon kiulongthsüpuh bonungrü khah ching jihbah tüsho alubah. 4Judüki atorübonü kiulongthsüpuh ki tha, “Ha mihtsürü asheshihpü lah, tümütüsho apinü ha kiuto ching aninga larü bonungrü tüsho mihtsürü alala arü ki hadürü yu thakhinü mulong ninishihchoh. Tümüde ha mihtsürünü mihtsürübo arung thsungkheak yungde arü thsümünimpü yimchoh.” 5Kiulongthsüpuh Zedekianü tha, “ Kheahang api nü khah ching lah; tümüde kiulongthsüpuhnü nüsa müzhipdokhuk.” 6Jumonü arünü Jeremia bea lu tüsho kiulongthsüpuh tsührü Malkia kekung, aheangrü mahkhappung lakhi ching Jeremia ju shungliunü chingbah yüzahshih. Kheakü kekung ching ke mülade akhimniuhniuh lang alakheah, tüsho akhimniuhniuh ching Jeremia yüzah.
7Ethiopiarü Ebedmelek, kiulongthsüpuh yam ching lakhi dukhanü Jeremia kekung ching yuka zokhi so. Kiulongthsüpuh ju Benjamin Chipiripit kheak binde alakheah, 8jumonü Ebedmeleknü kiulongthsüpuh yam chingnü yübah kiulongthsüpuh ki tha, 9I tungpuh kiulongthsüpuh, harü mihtsürünü akhümnü asheshihpü thsüde kekung ching bahkhi, wukihbuh Jeremia kheak mütsüde rhimodo, tümüde kiuto ching yikhap aninga müla. 10Judüki kiulongthsüpuhnü Ethiopiarü Ebedmelek ki thiyukhüm jih, “Ha chingnü mihtsürü mahsam nü lung beang, tüsho kekung chingnü api müsheyide thokhitang.” 11Jumonü Ebedmeleknü api lung mihtsürübo bea lu tüsho kiulongthsüpuh yam kukruk zopung ching yü, tüsho ju chingnü khimmürhütbo lubah shungliu kheaknü Jeremia kilim kekung ching yüzahshih. 12Ethiopiarü Ebedmeleknü Jeremia ki tha, “ Nü muyurishihpü khimmürhütbo nü khülük le shungliu dükeak yukang.” Jeremianü jude thsü. 13Jushu arünü Jeremia shungliunü kekung chingnü thokhit. Tüsho Jeremia ju aheangrü mahkhappung ching lakheah.
Zedekianü Jeremia ki Keokhia Lukhi
14Kiulongthsüpuh Zedekianü wukihbuh Jeremia thsungkheak yüshih tüsho api Atungpuh arüngyam yüzahpung mahsampü kheak bedarü. Kiulongthsüpuhnü Jeremia ki tha, “ Inü tümükhüh nü ki keopü lah; tümü she I kinü düram.” 15Jeremianü Zedekia ki tha, “ Inü nü ki thachoh, tsükjide nünü I müsheshihba de? Tüsho inü nü ki athsunganah jihjih she, nünü I ki anipü yung.” 16Jumonü kiulongthsüpuh Zedekianü ramde Jeremia ki thiyuchihchim thsü, “Atungpuh lale, Shepünü isa rhangdung jihkhea, inü nü müsheshih yungsho nü yimrü mihtsürübo khah ching müjih.”
17Judüki Jeremianü Zedekia ki tha, “Atungpuh , Wuto Thrünpuh, Israel Thrünpuhnü ha thachoh, Nünü lang Babilon kiulongthsüpuh atorü ki shuhmülanga jihsho, nü rhangdung labah, tüsho ha kiuto monü mütak, tüsho nü le nü yamkhün rhangdung labah. 18Tüshe nünü Babilon kiulongthsüpuh torü ki shuhmülanga müjihsho, ha kiuto Kaldearü kilim jihbah, tüsho arünü monü atakbah, tüsho nü she arü khah chingnü mutsokhi.” 19Kiulongthsüpuh Zedekianü Jeremia ki tha, “ Inü Kaldearü kilim tsode ayükhi Jihudarü trelah, tümüde I arü kilim jihpü labah tüsho arünü I thsümüchibah.” 20Jeremianü alo, “ Nü arü kilim müjih. Inü tümü nü ki thachonü Atungpuh düsheak lang aniang, tüsho nü tsüde alabah tüsho nü rhangdung aninga labah. 21Tüshe nünü shuhmülanga müjihpü lümkihlasho, Atungpuhnü I ki huhkhi ha lah– 22Juda kiulongthsüpuh yam ching aninga larü azoberü alala Babilon kiulongthsüpuh torü kilim bede wukhiukbah arünü nü ki thabah,
‘ Nü müyamrübonü nü bephülapdo tüsho nü zhidoabahdo;
kheakü nü jing akhimniuhniuh ching jungrama lah,
arünü nü bahkhido.’
23Nü niubebo alala tüsho nü tsührübo Kaldearü kilim bede wukhiukbah, tüsho nü she arü khah chingnü mutsokhi, tüshe Babilon kiulongthsüpuhnü arambah; tüsho ha kiuto monü atakbah.”
24Judüki Zedekianü Jeremia ki tha, “Ha asukachihkhi shenü dümükheahshih, jude yungsho nü ashebah. 25Inü nü ki asukkhi atorübonü sosho, arünü nü ki arübah athabah, ‘ Nünü kiulongthsüpuh ki tümü thakheanü kheakü isa ki thaang; isa ki düram, jude yungsho isanü nü sheshihbah. Kiulongthsüpuhnü nü ki tümü thakhea?’ 26Jüdüki nünü arü ki thabah, ‘ I ashepü thsüde Jonathan yam lim müyüloshihpü kiulongthsüpuh ki mushude alakheah.’” 27Atorü alala Jeremia kilim arü tüsho api ki keokhi; tüsho kiulongthsüpuhnü thiyukhüm jihkhi yubo lang apinü arü ki alo. Jumonü arünü api ki keokhipü tuklo, tümüde asukachihkhi musode alakheah. 28Tüsho Jeremia ju Jirusalem yankhi nimung khiungde aheangrü mahkhappung ching lakheah.
Currently Selected:
JEREMIA 38: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
