JEREMIA 37
37
Zedekianü Jeremia ki Mushukhi
1Josia tsührü Zedekia, Babilon kiulongthsüpuh Nebukednezarnü Juda lomi ching kiulongthsürü thsüshihbuhnü Jehoiakim tsührü Konia müthri kiulongthsü. 2Tüshe api yungsho api yamlarü yungsho lomi mihtsürünü Atungpuhnü wukihbuh Jeremia hode asukkhi yubo mani.
3Kiulongthsüpuh Zedekianü Shelemia tsührü Jehukal tüsho Maaseia tsührü amükeambuh Zephania wukihbuh Jeremia kilim yüshihde tha, “Muzhobah Atungpuh isa Thrünpuh ki isa thsungkheak tamkhüntamnüjang.” 4Kheakü Jeremianü mihtsürü bolung judü lang yüla arüla de alakheah, tümüde api rihyam ching muyukyide alakheah. 5Ju dükeak ching, Pharao bonungrü Ijip chingnü akhiuk; tüsho küyimki Jirusalem yanrü Kaldearünü arü yusheak sokhea, arübo Jirusalem chingnü tsoabah.
6Judüki wukihbuh Jeremia kilim Atungpuh yu arü: 7Atungpuh , Israel Thrünpuhnü ha thachoh: I ki keokhishihpü nü kilim thiyibuh Juda kiulongthsüpuh ki thaang, Nü rungpü Pharao bonungrü tsahmusukhi ju arü lomi Ijip lim alode ayübah. 8Tüsho Kaldearü alodarübah tüsho ha kiuto bede thirithsübah; arünü ju lubah tüsho monü atakbah. 9Atungpuhnü ha thachoh: Nü zangrü mülapyukde dütha, “Tsükjide Kaldearü isa kheaknü atsobah,” tümüde arübo tsoamübah. 10Nüsanü nüsa bede keochihrü Kaldearü bonungrü alala kukkuk she tüsho arü khimyambo ching yurirü lang aninga lalashe, arünü asürübah tüsho ha kiuto monü atakbah.
Jeremia Rihyam ching Zokhi
11Kheakü küyimki Pharao bonungrü arükhi hode Kaldearü Jirusalem chingnü atsokhea, 12Jeremianü ju ching mihtsürü bolung nihbuh shihcham lakhit-kukruk lupü Jirusalem ching yü. 13Küyimki api Benjamin Chipiripit khiungkhea, ju ching aheangrü khülang Hanania tsührü Shelemia tsührü amung Irija nü wukihbuh rambah tha, “ Nü Kaldearü kilim tsokhide yüchoh.” 14Tüsho Jeremianü tha, “Ju akeangyu ah; I Kaldearü kilim tsode müyü.” Tüshe Irijanü api ki mani, tüsho Jeremia rambah atorübo kilim bedarü. 15Atorübonü Jeremia kheak bukakhiuk tüsho api lakbah athrütbuh Jonathan yam ching ramyuka zo, tümüde ju rihyam thsüa lakheah. 16Junangde Jeremia alokhün ching yuka zo, tüsho ju ching nimung ahihdo lakheah.
17Judüki kiulongthsüpuh Zedekianü I bepü arüshihbah api yam ching bede yü, tüsho ramde keokhi, “Thiyu khürü Atungpuh kilimnü la shi?” Jeremianü alo, “ Lah!” Judüki apinü tha, “ Nü Babilon kiulongthsüpuh khah ching jihbah.” 18Jeremianü kheaküshe kiulongthsüpuh Zedekia ki tha, “ Inü nü yungsho nü yamlarübo yungsho ha mihtsürübo ki tümü amülim rhimokhi nünü I rihyam ching zokhea? 19Nü yo wukihrübo küching la, sherünü nü ki müchitde, ‘ Nü tüsho ha lomi azhihde Babilon kiulongthsüpuh marü’ de athakhea? 20Kheakü muzhobah I ki aniang, I tungpuh kiulongthsüpuh: Inü amushukhi tsüde anijang, tüsho ju ching shepü thsüde athrütbuh Jonathan yam ching I alode düyüshih.” 21Jumonü kiulongthsüpuh Zedekianü thiyukhümbo jih, tüsho arünü Jeremia ju aheangrü mahkhappung ching jih; tüsho kiuto chingnü yikhap alala mükheamyi khiungde yikhapthsüpungbo chingnü nimung abande I kilim yikhap khülang jih. Junangde Jeremia ju aheangrü mahkhappung ching lakheah.
Currently Selected:
JEREMIA 37: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
