JEREMIA 39
39
Jirusalem Lungkhi
1Juda kiulongthsüpuh Zedekia kam tuku, khinu thürüpü ching, Babilon kiulongthsüpuh Nebukednezar tüsho api bonungrü alala Jirusalem azhihde arü tüsho yanabah; 2Zedekia kiulongthsü kam thürükheak khülang, khinu phüyi, nimung tuku nipü, kiuto chipi rhümashunga lakheah. 3Küyimki yanabahkhea, Babilon kiulongthsüpuh atorübo alala arü tüsho aphulungbe chipiripit ching bin: atobuh Nergalsharezer, atobuh Nebo- Sarsekim, püpürü torü Nergal-sharezer, ju lung Babilon kiulongthsüpuh torübo alala. 4Küyimki Juda kiulongthsüpuh tüsho bonungrü alalanü arü ngükhea, arünü azhing ching kiuto chingnü wukhiukbah kiulongthsüpuh shahwün limronü chipi mahne dükeak ripit chingnü shanyukbah tso; tüsho arübonü Araba limpeang yü. 5Tüshe Kaldearü bonungrübonü arü yande müsham, tüsho Jirikho dükhün ching Zedekia yanphuh; tüsho küyimki arünü api ramlokhea, arünü api Hamath lomi, Ribla ching Babilon kiulongthsüpuh Nebukednezar ki bedarü; tüsho apinü anihbuh sheshihpü thiyu jih. 6Babilon kiulongthsüpuhnü Ribla ching Zedekia tsührübo amük kinü laksah; Babilon kiulongthsüpuhnü Juda torübo she laksah. 7Apinü Zedekia mükji yihkhit, tüsho Babilon lim lude ayüpü yinchiliunü rhük. 8Kaldearünü kiulongthsüpuh yam tüsho mihtsürübo yam tak tüsho Jirusalem chipi yihmülünjih. 9Judüki aheangrü wühkenobuh Nebuzaradan nü kiuto ching aninga lakhi mihtsürü alala, api kilim shande arürübo Babilon ching rama lubah tso. 10Aheangrü wühkenobuh Nebuzaradannü tümü mülarü zhochihrü mihtsürü khürü Juda lomi ching lashih, tüsho judüchoki arü kilim kurungasolu le thulubo jih.
Jeremia Dükhekhi
11Babilon kiulongthsüpuh Nebukednezarnü aheangrü wühkenobuh Nebuzaradan hode Jeremia dünkheak thiyukhüm jihde tha, 12“Api bea lubah tsüde kheahang tüsho api ki amütsü düthsü, tüshe apinü akeokhikhi nangde api thsungkheak rhimoang.” 13Jumonü aheangrü wühkenobuh Nebuzaradan, atobuh Nebushazban, atobuh Nergal-sharezer tüsho Babilon kiulongthsüpuh torü alalanü 14aheangrü mahkhappung chingnü Jeremia bekhita lu. Arünü api ju anihbuh yam lim bede ayüshihpü thsüde Shaphan tsührü Ahikam tsührü Gedalia kilim jih. Junangde api nihbuh mihtsürü bolung lakheah.
Ebedmelek thsungkheak Mulonglam
15Jeremia aheangrü mahkhappung ching lachoki Atungpuh yu arü: 16Ethiopiarü Ebedmelek kilim yüang tüsho thaang: Wuto Atungpuh , Israel Thrünpuhnü ha thachoh: Inü ha kiuto azhihde amütsü thakhi dünjipü lah tüsho atsü thsungkheak yung, tüsho ju nimung nü lade adünjibah. 17Tüshe ju nimung inü nü khümkhitbah, Atungpuhnü thachoh, tüsho nünü trede alarü khah ching nü müjih. 18Tümüde tsükjide inü nü khümkhitbah, tüsho nukshang hode nü mükeam; tüshe thirithsü thsambah nangde nü rhangdung labah, tümütüsho nünü I kheak kindo, Atungpuhnü thachoh.
Currently Selected:
JEREMIA 39: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
