JEREMIA 36
36
Arüngyam ching Küpqiu Khekhi
1Josia tsührü Juda kiulongthsüpuh Jehoiakim kam phüyipü ching Atungpuh yu ha Jeremia kilim arü: 2Küpqiu khülang luang tüsho inü Israel le Juda tüsho trükshih alala azhihde, Josia kiulongthsüchoki inü nü ki asukpü tankihkhinü kheakü khiungde nü ki asukkhi yubo ju kheak thrütang. 3Khükia inü arü kheak rhimopü lümkhi thsümütsü alala Juda yamkhünnü sobah arü alala arü amütsü limrobo chingnü rholobah, junangde inü arü mülimkhi tüsho arü neak bahjihbah.
4Judüki Jeremianü Neria tsührü Baruk ji tüsho Atungpuhnü Jeremia ki asukkhi yubo alala apinü thade Baruknü küpqiu kheak thrütkih. 5Tüsho Jeremianü Baruk ki thiyukhüm jihde tha, “ I Atungpuh yam ching yüzahpü mümülü; 6jumonü nü yüang, tüsho khümkeak thsü nimung inü thade nünü athrütkhi Atungpuh yu küpqiu chingnü mihtsürübonü sode kheang. Nünü jurübo Juda mihtsürü arü kiutobo chingnü arürünü she sode kheang. 7Khükia arünü mushukhi Atungpuh miki arübah, tüsho arü alala arü amütsü limrobo chingnü rholobah, tümüde ato ju Atungpuhnü ha mihtsürü azhihde athakhi bukakhiukkhi tüsho mulong zhipzhip lah.” 8Tüsho Neria tsührü Baruknü Atungpuh yu küpqiu chingnü Atungpuh yam ching khepü wukihbuh Jeremianü thiyukhüm jihkhi alala rhimo.
9Josia tsührü Juda kiulongthsüpuh Jehoiakim kam phüngü, khinu tukupü ching Jirusalem ching mihtsürü alala tüsho Juda kiutobo ching Jirusalem ching arürü mihtsürü alalanü Atungpuh miki khümkeak thsüpü zhiyuk. 10Judüki Baruknü Atungpuh yam ching yüzahpung chipiripit aso kheak achangbe yamkhuh ching, Shaphan tsührü athrütbuh Gemaria khiungshak chingnü, Atungpuh yam ching mihtsürü alalanü sode küpqiu chingnü Jeremia yubo khe.
Atorübo ki Küpqiu Khekhi
11Küyimki Shaphan tsührü Gemaria tsührü Mikaianü küpqiu chingnü Atungpuh yu alala sokhea, 12apinü kiulongthsüpuh yam lim, athrütbuh khiungshak ching yüki, tüsho ju ching atorübo alala binde alakheah: athrütbuh Elishama, Shemaia tsührü Delaia, Akbor tsührü Elnathan, Shaphan tsührü Gemaria, Hanania tsührü Zedekia, tüsho atorü alala. 13Tüsho Baruknü mihtsürübonü sode alachoki, Mikaianü asokhi yubo alala arü ki tha. 14Judüki atorü alalanü Baruk ki thashihpü, Kushi tsührü Shelemia tsührü Nethania tsührü Jehudi yüshih, “ Nünü mihtsürübonü sode akhekhi küpqiu lubah arang.” Jumonü Neria tsührü Baruknü küpqiu akhah ching lu tüsho arübo kilim arü. 15Tüsho arünü api ki tha, “Binang tüsho ju isa ki kheang.” Jumonü Baruknü ju arü ki khea huh. 16Küyimki arünü thiyubo alala sokhea, arünü alanachihde khülangnü khülang kilim anguh, tüsho Baruk ki tha, “ Isanü tsükjide harü yubo alala kiulongthsüpuh kilim jihbah.” 17Judüki arünü Baruk ki keokhi, “ Kheakü isa ki thaang, küde thsah nünü harü yubo alala thrütkhea? Ha Jeremianü thaa thrütshihkhea de?” 18Baruknü arü ki alo, “Apinü harü yubo alala I ki thaa thrütshih, tüsho inü jurübo dokenü küpqiu kheak thrütkih.” 19Judüki atorübonü Baruk ki tha, “ Nü tüsho Jeremia, yüang tüsho jikang, tüsho nüke küching lanü shenü she dümükheahshih.”
Kiulongthsüpuhnü Küpqiu Takkhi
20Athrütbuh Elishama khiungshak ching küpqiu zojihbahle arünü kiulongthsüpuh mahkhappung ching yü; tüsho thiyu alala kiulongthsüpuh ki thaa huh. 21Judüki kiulongthsüpuhnü küpqiu lupü Jehudi yüshih, tüsho apinü athrütbuh Elishama khiungshak chingnü ju lu; tüsho Jehudinü kiulongthsüpuh tüsho api ki zhiprü atorü alala ki ju khea huh. 22Kheakü khinu tukupü ching kiulongthsüpuh ju tsüngkam binpung-yam ching binde alakheah, tüsho api miki mothsüpung ching mo takde alakheah. 23Jehudinü aphu mahsam yungsho phüyi kheshu kiulongthsüpuhnü nukjipnü nipnak tüsho küpqiu abümnü mütakkhamyi khiungde mothsüpung ching yuka tak. 24Tütüshe kiulongthsüpuh yungsho api yamlarü harü yu sorü shenü she mütre, yungsho arü khimmih muthonak. 25Elnathan, Delaia tüsho Gemaria arünü kiulongthsüpuh ki küpqiu mütakpü mushushu she, apinü arü ki mani. 26Tüsho kiulongthsüpuhnü kiulongthsürü tsührü Jerameel, Azriel tsührü Seraia tüsho Abdeel tsührü Shelemia, athrütbuh Baruk tüsho wukihbuh Jeremia rampü thiyukhüm jih. Tüshe Atungpuhnü ane ramabah.
Jeremianü Küpqiu Thrütlokhi
27Kheakü, Jeremianü Baruk ki thaa thrütshihkhi yubo bede kiulongthsüpuhnü küpqiu takshu, Atungpuh yu Jeremia kilim arü: 28Küpqiu püpü luang tüsho Juda kiulongthsüpuhnü takabahkhi akhuhbe küpqiu ching lakhi yubo ju kheak thrütang. 29Tüsho Juda kiulongthsüpuh Jehoiakim dünkheak nünü athabah: Atungpuhnü thachoh, Nünü ha küpqiu takpü tha, “Tsükjide Babilon kiulongthsüpuh arübah tüsho ha lomi, mihtsürü tüsho shiwühbo thsümünimpü tümüde nünü ha ching thrütkhea?” 30Jumonü Juda kiulongthsüpuh Jehoiakim dünkheak Atungpuhnü ha thachoh: David kiulongthsü-binkiu kheak binpü api a she müla, tüsho api ashemi animuro atak ching bahbah tüsho azhing ching thüwün ching bahbah. 31Tüsho inü arü mülimkhi dün api le atsührü tüsho ayamlarübo thsümüchibah; inü arü le Jirusalem ching larü tüsho Juda mihtsürü kheak inü arü azhihde athakhi thsümütsü alala handarübah, tümütüsho arünü mani.
32Judüki Jeremianü küpqiu püpü lu tüsho Neria tsührü Baruk kilim jihbah, Juda kiulongthsüpuh Jehoiakimnü mo ching takabahkhi Jeremianü thaa thrütshihkhi küpqiu yubo alala thrütkih; tüsho akiphahkhi yubo ahihdo yukajak.
Currently Selected:
JEREMIA 36: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
