JEREMIA 32
32
Jeremianü Thulu Thulokhi
1Juda kiulongthsüpuh Zedekia kam thürüpü, Babilon kiulongthsüpuh Nebukednezar kam thürükheak tizheahpü ching A TU N GPU H yu Jeremia kilim arü. 2Judüki Babilon kiulongthsüpuh bonungrünü Jirusalem yande alakheah, tüsho Juda kiulongthsüpuh yam ching aheangrü rihyam ching wukihbuh Jeremia rihdoa zo. 3Tümüde Juda kiulongthsüpuh Zedekianü api rihdoa zobah tha, “Tümü thsükhi nünü müchitcho tüsho thacho: Atungpuh nü ha thachoh: Inü ha kiuto Babilon kiulongthsüpuh khah ching jihbah, tüsho apinü ju lubah; 4Juda kiulongthsüpuh Zedekia Kaldearü khah chingnü mutsokhit, tüshe tsükjide api Babilon kiulongthsüpuh khah ching jihbah, tüsho apinü anihbuh ki mironü miro asukachihbah tüsho müknü mük kheahachihbah; 5tüsho apinü Zedekia Babilon lim bede ayübah, tüsho I anihbuh ki müyüyi khiungde api ju ching labah, Atungpuhnü thachoh; nünü Kaldearü bede keochihchih she mukuk?”
6Jeremianü tha, Atungpuh yu I kilim arü: 7Nü buhdo Shallum tsührü Hanamel nü kilim arübah athabah, “Anathoth ching lakhi I lu thuloang, tümüde thulode arhokhitpü alim nü yo ah.” 8Judüki Atungpuh yu yande I buhdo tsührü Hanamel I kilim aheangpung rihyam ching arü, tüsho I ki tha, “Benjamin lomi Anathoth ching lakhi I lu thuloang, tümüde alakukruk tüsho rhokhitpü alim nü yo ah; ju nü thsungkheak thuloang.” Judüki ha Atungpuh yu ah de inü mükheah.
9Tüsho inü I buhdo tsührü Hanamel kheaknü Anathoth ching lakhi thulu ju thulo, tüsho api kilim shotoyinchi 17 adüna jih. 10Inü münrünhüm mütsan dokihbah yihdo, thiyumütsan lu, tüsho wuhzhin kheak sho adün. 11Jushu inü shothsühüm–banthsangyu zahkhi ayümhüm tüsho amüyümhüm chido lu; 12tüsho shothsühüm ju I kü Hanamel mikinü shothsühüm kheak dokihrü thiyumütsan thsürübo mikinü, tüsho aheangrü mahkhappung ching binrü Jihudarü mikinü, inü shothsühüm ju Maseia tsührü Neria tsührü Baruk kilim jih. 13Arü mikinü inü Baruk ki tha, 14Wuto Atungpuh , Israel Thrünpuhnü ha thachoh: harü ayümkhi tüsho amüyümkhi shothsühüm luang, tüsho ruhde atsüpshihpü thsüde jurübo alophüh ching yukang. 15Tümüde Wuto Atungpuh , Israel Thrünpuhnü ha thachoh: Thüyambo, thulubo tüsho kurungasolubo kheaküshe ha lomi ching thulobah.
Jeremia Tamkhüntamnü
16Inü shothsühüm Neria tsührü Baruk kilim jihshu, inü Atungpuh ki tamkhüntamnü: 17Ah, Atungpuh T H RÜ NPU H ! Nünü nü wu ato tüsho nü khah chungkhitkhinü thüningbo tüsho alomi thrün! Nü thsungkheak tümü she achak müla. 18Nünü chithürü lün ki muzhodakde huh, tüshe berübuhrü neakbo arü tsührübo khüh kheak zojih, O ato tüsho Wuto Thrünpuh, shepü mung Wuto Atungpuh la, 19lümthiyan ching ato tüsho rhimo ching wuto; tümüde arü limro alala tüsho arü rhimokhi sangaso yande thsambah jihpü mihtsürü limro alala lim nü mükbo khimshuhlah. 20Nünü amütsanbo tüsho khinthiyinbebo Ijip lomi ching tüsho khihni nimung ching Israel tüsho mihtsürü alala ki huhdo, tüsho khihni nimung khiungde nü mung lashihlah. 21Nünü nü mihtsürü Israel Ijip lomi chingnü amütsanbo tüsho khinthiyinbebo, amüküp khah, tüsho atrebe atonü bekhit; 22tüsho nünü arü jipürü kilim niuhke tüsho mukhuke bukkhi lomi jihpü thiyuchihchimkhi arü kilim ha alomi jih; 23arünü yüzah tüsho alakukruk lu. Tüshe arünü nü düsheak mani yungsho nü yakzan ching mütsah; nünü arü ki thiyukhüm jihkhi alala arünü tümü mürhimo. Jumonü nünü harü thsümütsü alala arü kheak arüshih. 24Kheahang, kiuto yanpü tankih-a lah, tüsho nukshang, khümzung tüsho arüm-tukthsü hode kiuto Kaldearü khah ching jihdo. Nünü tümü asukkheanü dünjido, nünü ngülah. 25Tütüshe, O Atungpuh T H RÜ NPU H , nünü I ki thado, “Shonü thulu thuloang tüsho thiyumütsanbo luang”–tütüshe kiuto ju Kaldearü khah ching jih.
26 Atungpuh yu Jeremia kilim arü: 27Kheahang, I Atungpuh , mihtsürü alala Thrünpuh; tümükhüh I thsungkheaknü khide chakla shi? 28Jumonü, Atungpuhnü ha thachoh: Inü ha kiuto Kaldearü khah ching tüsho Babilon kiulongthsüpuh Nebukednezar khah ching jihbah tüsho apinü ju lubah. 29Kaldearünü arübah ha kiuto kheak mo thsahkihbah, tüsho thüyambo küpü kheak I bukakhiukshihde Baal kilim kingaünkhea tüsho püpü thrünpuhbo kheak rhümthüneabe bukkihkheanü ju bede atakbah. 30Tümüde Israel mihtsürü tüsho Juda mihtsürünü arü athunuchokinü I miki amütsü lang rhimodo; Israel mihtsürünü tümü mürhimo tüshe arü khah rhimobonü I bukakhiukshihdo, Atungpuhnü thachoh. 31Ha kiutonü athsükhi nimungnü khihni khiungde I bukakhiukshihdo tüsho mulong zhipzhipshihdo, junangde ha I mikinü lahkhita bahbah, 32Israel mihtsürü tüsho Juda mihtsürünü amütsü rhimode I bukakhiukshihkhi alala dünkheaknü– arü, arü kiulongthsürübo, arü torübo, arü amükeamrü tüsho wukihrübo, Juda mihkhungbo tüsho Jirusalem ching larübo. 33Arünü arü düthsün I ki anguhdo, arü mirobo yung; inü arü ki alochode thsangyuyu she, arünü mani tüsho thsülangkhi mulu. 34Arünü I mung kihkhi thüyambo kheak athraneanbebo zhipshih, tüsho ju müneanjih. 35Inü arü ki thiyukhüm müjihjih she, yungsho Juda neak yihbeakshihpü arünü ha athraneanbe rhimopü I lüm ching mülalashe arü tsührübo tüsho tsührübebo Molek kilim jihpü arünü Hinnom Tsührü Jindükhün ching Baal achang dangpungbo thsü.
Mulonglam Alokhikhi
36Kheakü jumonü Atungpuh , Israel Thrünpuhnü nünü athakhi kiuto dünkheak ha thachoh, “Ha nukshang, khümzung tüsho arümtukthsü hode, Babilon kiulongthsüpuh khah ching jihbah”; 37kheahang, I bukakhiukde amüzütshihpungnü inü arü bemukhungbah; inü arübo ha dangpung ching belodarübah tüsho inü arü sühakhim ching lashihbah. 38Arübo I mihtsürü thsübah, tüsho I arü Thrünpuh thsübah. 39Inü arü kilim mulong khülang tüsho limro khülang jihbah, junangde arü tsükhi tüsho arü dunglim arü tsührübo tsükhi dünkheak lünnü arünü I trebah. 40Inü arü ki küyimkishe atsü rhimokhi mutuklopü akheam müla tangzüng khülang thsübah; tüsho arü mulong ching I trepü inü ayukjihbah, junangde arübo I kheaknü müchamachih. 41Inü arü kheak atsü rhimokhinü asühbah, tüsho thülünde, I mulong alala tüsho I me alalanü inü arü ha lomi ching lashihbah.
42Tümüde Atungpuhnü ha thachoh: Inü ha mihtsürü kheak thsümütsü ato handarükhi nangde, inü kheakü arü ki alokhikhi, kuhi atsü alala arü kheak handarübah. 43Ha lomi ching thulubo thulobah, küpü nüsanü thacho, “Ha abahyukkhi lah, mihtsürü yungsho shiwüh müla; ha Kaldearü khah ching jihkheah.” 44Benjamin lomi ching, Jirusalem mühi dangpungbo ching, tüsho Juda kiutobo ching, awungbo le lokeamlo kiutobo ching tüsho düjinglim kiutobo ching shonü thulubo thulobah, tüsho shothsühümbo mütsan dokihbah tüsho thiyumütsanbo labah; tümüde inü arü kuhi jihlobah, Atungpuhnü thachoh.
Currently Selected:
JEREMIA 32: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
