JEREMIA 31
31
Israel Thüyam lim Alodarükhi
1 Atungpuhnü thachoh, ju kim ching I Israel yamkhün alala Thrünpuh thsübah, tüsho arübo I mihtsürü thsübah. 2Atungpuhnü ha thachoh: Mihtsürü sherü nukshang chingnü tsokhidünü sunglo ching mihmüthsüm ngüdo; küyimki Israelnü sühakhim yimkhea, 3Atungpuhnü adüsonü api ki akhiuka huh. Inü akheam müla amuzhonü nü muzhokheah; jumonü mutuklode inü nü ki amuzho huh. 4Kheaküshe inü nü bemusubah, tüsho nü thsülobah, O atsangkhit Israel! Kheaküshe nünü züpzüppü lubah tüsho asühde tsünde ayübah. 5Kheaküshe nünü Samaria wungbo kheak kurungasolu thsübah; ayangrünü ayangbah tüsho aso tsühbah. 6Tümüde judüki nimung khülang aheangrünü Ephraim lomi wung ching jikhi labah: “Arang, isanü Atungpuh isa Thrünpuh kilim Zion ching wutuanü.”
7Tümüde Atungpuhnü ha thachoh:
Jakob thsungkheaknü asühde achangnü khün thsüang,
tüsho trükshih yo atobe thsungkheak zhiang;
zhiyukang, mungshi jihang, tüsho thaang,
“ O Atungpuh , nü mihtsürü aningkhi Israel khümkhitang.”
8Kheahang, inü dukulim lomi chingnü arübo bedarüpü lah,
tüsho limshu lomi chingnü arü bolung müktukrü tüsho jingkikrü,
berünü khungarü hanbah tüsho thsünüde,
rukhühnü bemukhungbah;
boto ato, arübo ha ching alodarübah.
9Tripde arübo arübah tüsho shukheamde inü arü belodarübah,
inü arübo yungzü ke yeande atsahshihbah,
limro mukhiungkhi ching arü jing mümükhe;
tümüde I Israel abuh kamdo tüsho Ephraim ju I tsührü adüjibuh.
10 Atungpuh yu aniang, O trükshihbo,
tüsho limshu ching keyean lomibo ching zhiyukang;
thaang, “Shepünü Israel müzütshihkheanü apinü arü bemukhungbah,
tüsho mihnu neakrü nangde api mihnu boto neakbah.”
11Tümüde Atungpuhnü Jakob mah shakjih,
tüsho khah amüküp chingnü api rhokhit.
12Arünü arübah tüsho Zion wung kheak achangnü khün thsübah,
tüsho Atungpuh tsükhi–
hi, yukhu, tüsho müdangke,
namfimihnu tüsho moshi dünkheaknü arübonü asühachihbah;
arü rhangdung ju ke tsüde aduhkhi ayündo nangde akambah tüsho arübo kheaküa mulong murozhak.
13Judüki anünürübonü asühde atsünbah,
tüsho athrününgtsüng le azobuhrünü asüharabah.
Inü arü tüzhokhi asühpü kamshihbah,
inü arü shukheambah tüsho mulong rozhak thsungkheak arü ki asühpü jihbah.
14Tsühyungpü akebenü inü amükeamrübo bukthsüshihbah,
tüsho I mihtsürübonü I muzhomopungkhi ching reangkeambah,
Atungpuhnü thachoh.
Israel kheak Atungpuh Mihmüthsüm
15 Atungpuhnü ha thachoh:
Rama ching düsheak khülang,
atüzhokhi tüsho düsüknimde atripkhi sochoh.
Rachelnü anihbe tsührü thsungkheak tripchoh;
alibenü anihbe tsührübo thsungkheak shukheamkhi thsunglochoh,
tümütüsho kheaküa arü müla.
16 Atungpuhnü ha thachoh:
Nü atripkhi düsheak chingnü tüsho mük ching chike bukkhi chingnü tukloang;
tümüde nü rhimo dünkheak thsambah khülang lah,
Atungpuhnü thachoh:
arü riri lomi chingnü arü alodarübah;
17Nü arübe-kuhi thsungkheak mulonglam lah,
Atungpuhnü thachoh:
nü tsührübo arü lomi ching belodarübah.
18Atsütsü Ephraimnü mushukhi inü sodo:
“ Nünü I danyuk, tüsho inü adanyukkhi lu;
I a müthsangmuyukhi moshi nunu khülang ruk lakheah.
I belodarang, I alode arüshang,
tümüde nü a Atungpuh I Thrünpuh.
19Tümüde I rholode atso dunglim I mulong müthri;
inü anikhit dunglim inü I khüh yüm.
I achih ngü tüsho mi müdünkhit tümütüsho I athunuchoki achihbe inü han.”
20Ephraim a inü amuzhokhi tsührü a de?
Api ju inü asühkhi tsührü a de?
Alochode inü api azhihde asuksuk she,
judü lang inü api lümkhitchoh.
Jumonü api thsungkheak I mulong niuthünaka lah;
tsükjide inü api kheak mihmüthsüm labah,
Atungpuhnü thachoh.
21Nü thsungkheak limro-mütsan khimang,
nünü lim-huhdung zhipshang;
nü yükhi limro küpü limtoanü mütsanang.
Rholoang, O atsangkhit Israel,
nü kiutobo harü ching alodarang.
22Külokhüh nü rümde atsahba,
O akin mülakhi tsührübe?
Tümüde Atungpuhnü alomi kheak kukruk aso khülang thründo;
aliberü khülangnü athrürü kümdopü lah.
Thrünpuh Mihtsürü Arübe Kuhi-atsü
23Wuto Atungpuh , Israel Thrünpuhnü ha thachoh: Khülang ki arünü inü arü kilim kuhi jihlokhi, Juda lomi tüsho kiutobo ching harü yubo ahoribah:
“Atungpuhnü nü müngühjang,
O thiyuro lapung,
O amüsüh wung!”
24Tüsho Juda le kiutobo alala ju ching rukhüh labah, tüsho thulu thsürü le tsotsahrümtsahrü arü mihnubo bebah alabah. 25Keakzungrü inü reangkeamshihbah tüsho ayiuhyiuhrü phü yinde kamshihbah. 26I ha kheaknü asürükheah tüsho kheahang, ayapkhinü I sühakhimdo.
27 Atungpuhnü thachoh, Israel yamkhün tüsho Juda yamkhün kheak mihtsürü tüsho shiwüh müjihbo hiupü nimung tsükjide arado. 28Tüsho inü arü zükshakpü tüsho thokheampü, jipa bahpü, athsümünimpü, tüsho amütsü handarüpü kheahkhi nangde inü arü thsülopü tüsho ayangpü kheahbah, Atungpuhnü thachoh. 29Ju nimungbo ching arünü mütha:
“Berübuhrünü kurungaso asan tsühdo,
tüsho tsührübo hü mütramlah.”
30Tüshe alala arü nihbuh neak dünkheak shebah; kurungaso asan tsührü aban hü mütrambah.
31 Atungpuhnü thachoh, Israel yamkhün tüsho Juda yamkhün kheak inü tangzüng aso thsüpü nimungbo tsükjide arado. 32Ha inü arü jipürü Ijip lomi chingnü khah kheaknü thokhitchoki tangzüng nangde yung, tümüde I arü aputungrü thsüthsü she, arünü I tangzüng thsümünim, Atungpuhnü thachoh. 33Tüshe ju nimungbo dunglim inü Israel yamkhün ki tangzüngpü ju ha, Atungpuhnü thachoh: Inü arü kheak I yakzan yukbah, tüsho inü ju arü mulong kheak thrütbah; tüsho I arü Thrünpuh thsübah, tüsho arübo I mihtsürü thsübah. 34Arünü kheaküa khülangnü khülang müthsangyuachih, yungsho müthaachih, “A TU N GPU H mükheahang,” tümüde arü aninikhühnü atobe khiungde alalanü I mükheahbah, Atungpuhnü thachoh; tümüde inü arü mülimkhi neak bahjihbah, tüsho arü neak mülümkhitlo.
35 Atungpuhnü ha thachoh,
Shepünü animung yinshihpü ani jihcho tüsho azhing ching yinshihpü khinu tüsho chining zojihla,
shepünü keto rhucho, junangde arungde abükcho–
Wuto Atungpuh ju api mung lah:
36Ha akhinashubo I mikinü chamkhisho,
Atungpuhnü thachoh,
Israel tsührü lünnü I miki trükshih khülang thsüpü kheambah.
37 Atungpuhnü ha thachoh:
Akulim yinmibo akekhuksho
tüsho abolim alomi khimtanbo yimkhuksho lang
arünü arhimokhi alala dünkheaknü inü
Israel tsührübo alala bahyukbah,
Atungpuhnü thachoh.
38 Atungpuh thsungkheak Hananel Aheangsadam kheaknü Amühit Chipiripit khiungde kiuto thsülopü nimung tsükjide arado, Atungpuhnü thachoh. 39Tüsho akekhi khuh ju limshude Gareb wung lim langakindo ayübah, tüsho Goa lim alodarübah. 40Ashemi tüsho awah jindükhün alala, tüsho Kidron ayung khiungde thulubo alala, aniakhiuklim thrip Khora Chipiripit khiungde, Atungpuh kilim amüsüh labah. Ha küyimkishe murukkhit yungsho mükeamshih.
Currently Selected:
JEREMIA 31: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
