JEREMIA 33
33
Mulonglam Alokhikhi Püpü
1 Atungpuh yu Jeremia kilim, api rihyam mahkhappung ching lachoki mahne kipü arü: 2Alomi thrünrü Atungpuhnü ha thachoh, Atungpuh shepünü ha kamkhitpü thsü–Atungpuh ju api mung: 3I ki jiang tüsho inü nü ki alobah, tüsho nünü mümükheahkhi ato tüsho aramyu nü ki thabah. 4Tümüde Atungpuh , Israel Thrünpuhnü ha kiuto yambo tüsho Juda kiulongthsürü yambo ayanpü thsükhi tüsho nukshang leanglode thokheamkhi dünkheak ha thachoh: 5Kaldearübo keochihpü arüchoh tüsho I bukakhiukde alaksahkhi ashemibonü arü mibah, tümüde arü mihbukmuyuk hode ha kiuto chingnü I miro jikabahdo. 6Tütüshe inü shihphü jihlobah tüsho thsüngubah; inü arü thsüngubah tüsho lalim atsü tüsho kurampung suhdahde inü arü ki huhbah. 7Inü Juda kuhi tüsho Israel kuhi jihlobah, tüsho arü atankih nangde thsülojihbah. 8Arübonü I azhihkhi amülim neak alala ching inü arü müsühkhitbah, tüsho arü mülimkhi neak tüsho I azhihkhi alala inü arü neak bahjihbah. 9Tüsho inü arü thsungkheak atsü rhimokhi alala sopü larü lomi trükshihbo alala miki ha kiuto I ki asühkhi mung, mungshi tüsho müretahkhi labah; inü ha thsungkheak atsü tüsho lalim atsü alala jihkhi dünkheak arünü atrebah tüsho ajanbah.
10 Atungpuhnü ha thachoh: Ha dangpung ching küpü nüsanü thacho, “Ha mihtsürü yungsho shiwüh mülade abahkhi lah,” Juda kiutobo ching tüsho azhikkhi Jirusalem kiudunglimrobo ching, mihtsürü yungsho shiwüh mülakhi ching khülang ki solobah, 11asühkhi düsheak tüsho asühara düsheak, yamkhün-kambuh düsheak tüsho yamkhün-kambe düsheak, khün thsürü düsheak, arünü makshe kingaün Atungpuh yam ching handarübah:
“ Wuto Atungpuh kilim makshe jihang,
tümüde Atungpuh tsülah,
tümüde api muzhodakkhi lünnü lah!”
Tümüde lomi kuhibo atankih nangde ajihlobah, Atungpuhnü thachoh.
12Wuto Atungpuhnü ha thachoh: Mihtsürü tüsho shiwüh mülakhi ha dangpung ching, tüsho kiuto alala ching kheaküshe mihnu neakrübonü arü mihnubo yimkippung rimlopung labah. 13Awung lomi kiutobo ching, Shephela, Negeb, Benjamin lomi, Jirusalem mühi dangpung tüsho Juda kiutobo ching, kheaküshe mihnubo arü kherü khah khüp tsahbah, Atungpuhnü thachoh.
14 Atungpuhnü thachoh, inü Israel yamkhün tüsho Juda yamkhün ki alokhikhi dünjipü nimungbo tsükjide arüchoh. 15Ju nimungbo tüsho ju kim ching inü David thsungkheak thiyuro-lungki sangkhah akhiukshihbah; tüsho apinü lomi ching thiyuro tüsho thiyuro-lungki rhimobah. 16Ju nimungbo ching Juda khümkhitbah tüsho Jirusalem sühakhim ching labah. Tüsho arünü tamde ajipü mung ha: “Atungpuh ju isa thiyuro-lungki.”
17Tümüde Atungpuhnü ha thachoh: David thsungkheak Israel yamkhün kiulongthsü-binkiu kheak binpü mihtsürü müladüa müla, 18tüsho I miki taka kingaünpü, hi kingaünpü, tüsho kim alala ching shuhmülanga jihpü thsüde Levirü amükeamrübo thsungkheak mihtsürü khülang müladüa müla.
19 Atungpuh yu Jeremia kilim arü: 20Atungpuhnü ha thachoh: Khürünü I nimung tüsho I tangzüng tsüngre thsümünimkhuksho, junangde nimung tüsho tsüngre akheahmünchi ching malodarüsho, 21jushu lang I yamlarü David kheak tangzüngkhi thsümünimkhukbah, junangde api kiulongthsü-binkiu kheak kiulongthsüpü tsührü tüsho I tankihrü Levirü ki I tangzüng mülade alabah. 22Thüning ching chiningbo mükhekhamkhi nangde tüsho keto loyi madünkhukkhi nangde, inü I yamlarü David tsührü, tüsho I tankihrü Levirü bushihbah.
23 Atungpuh yu Jeremia kilim arü: 24Nünü mihtsürübonü harü thakhi manikhit de, “Atungpuhnü mokhitkhi yamkhün mahne apinü bahyukdo,” tüsho trükshih khülang mükhejihde künangde arünü I mihtsürü bahyukcho? 25Atungpuhnü ha thachoh: Inü nimung tüsho tsüngre tüsho yinmi le alomi yuzüngbo kheak tangzüng müthsükhülaa, 26inü Jakob tsührü tüsho I yamlarü David bahyukbah tüsho api tsührü sheshe Abraham, Isak tüsho Jakob tsührü kurungkheak yakzanshuhrü mumokhit. Tümüde inü arü kuhibo jihlobah, tüsho arü kheak mihmüthsüm labah.
Currently Selected:
JEREMIA 33: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
