JEREMIA 30
30
Atungpuhnü Api Mihtsürübo ki Alokhikhi
1 Atungpuh kilimnü Jeremia kilim thiyu arü: 2Atungpuh , Israel Thrünpuhnü ha thachoh: Inü nü ki asukkhi yubo alala hüm khülang ching thrütang. 3Tümüde I mihtsürü Israel tüsho Juda kuhi ngülopü nimungbo tsükjide arüchoh, Atungpuhnü thachoh, tüsho inü arü jipürü kilim jihkhi lomi ching arübo belodarübah tüsho arünü ju yamalo lubah.
4 Atungpuhnü Israel tüsho Juda dünkheak asukkhi yubo:
5 Atungpuhnü ha thachoh:
Isanü atrebe, atrekhi zhikhi sodo, mungtsü yung.
6Kheakü keokhiang, tüsho kheahang,
athrürünü tsührü zübekhukba de?
Dale tümüde aliberü thsünüchoki nangde athrürü abannü chim kheak khah nimbah inü ngücho?
Tümüde mihbüm abannü pheakmulukdo kama la?
7Aha! ju nimung küde atrebe,
ju ruk püpü müla;
ha Jakob thsungkheak lümthsünü kim lah;
tütüshe api ju chingnü abekhitbah.
8Wuto Atungpuhnü thachoh, ju nimung, inü api hung kheaknü sangkaplak yihshakbah, tüsho api yinchiliu yihkhitjihbah, tüsho khiungkerübonü kheaküa api azhorü mükamshih. 9Tüshe arünü A TU N GPU H arü Thrünpuh tankihbah tüsho inü arü thsungkheak asürüshihkhi David kiulongthsüpuh tankihbah.
10Tüshe nü thsungkheak a, dütre, I yamlarü Jakob,
Atungpuhnü thachoh,
tüsho mulong dübah, O Israel;
tümüde inü nü limshu chingnü akhümkhitbah,
tüsho nü tsührübo arübo ramde ayükhi lomi chingnü akhümkhitbah.
Jakob alodarübah tüsho mungtsü le keamramkhi labah,
tüshe shenü api mümüyinsahshih.
11Tümüde nü khümkhitpü I nü lung lah,
Atungpuhnü thachoh,
inü nüsa hiumüzütshihpung trükshihbo alala kheamshihbah,
tüshe nü a inü mükheamshih.
Thiyuronü inü nü danbah,
tüsho nü shahde müthsümüchidüa mutsoshih.
12Tümüde Atungpuhnü ha thachoh:
Nü mü müthsüngukhukbe lah,
nü yurikhi mungukhukbe lah.
13Nü kümpü she müla,
nü mü thsungkheak moli müla,
nü thsüngupü müla.
14Nü muzhorü alalanü nü mihabahdo;
arünü nü müküm;
tümüde thiririnü nangde inü nü shikdo,
bukmükerü khülangnü nangde thsümüchido,
tümütüsho nü mülimkhi tolah,
tümütüsho nü neakbo hihdaklah.
15Tümüde nü yurikhi thsungkheak zhicho?
Nü thsünükhi müthsüngukhukbe ah.
Tümütüsho nü mülimkhi tolah,
tümütüsho nü neakbo hihdaklah,
inü harü nü ki rhimodo.
16Tüshe sherünü nü tsühabahchonü alala tsühabahbah,
tüsho nü riri alala, mihbüm abannü ramtso ching yübah;
sherünü nü yankhia luchonü arübo yankhia lubah,
tüsho sherünü nü shih tsühchonü nü arübo ju shih kamshihbah.
17Tümüde inü nü shihphü tsüloshihbah,
tüsho nü mübo inü athsüngubah, Atungpuhnü thachoh,
tümütüsho arünü nüsa ki ayankhitkhi de jido:
“Ha Zion; shenü anihbe thsungkheak mükümchoh!”
18 Atungpuhnü ha thachoh:
Inü Jakob khimyam kuhibo jihlopü thsüchoh,
tüsho api lapung kheak mihmuzho labah;
kiuto ju amujuk kheak thsülobah,
tüsho alungki dangpung kheak kiulongthsürü-yam thsübah.
19Jurü chingnü makshe jihkhi arübah tüsho asühachihrü düsheak sobah.
Inü arübo hihde akamshihbah tüsho arü nükde müla;
inü arü müretahde kamshihbah tüsho arü khenoa müla.
20Arü tsührübo adüso nimung ching nangde alabah,
I miki arü boto tankih-a labah;
tüsho arü junorü alala inü thsümüchibah.
21Arü kovünor arü bolung chingnü alabah,
arü yakzanshuhrü arü bolungnü arübah;
inü api phünide bedarübah, tüsho api I ki arübah tümüde shepünü müjide I ki arükhukpü?
Atungpuhnü thachoh.
22Tüsho nüsa I mihtsürü thsübah
tüsho I nüsa Thrünpuh thsübah.
23Kheahang, Atungpuh tsüngpungtsüngpung, bukakhiukkhi chinthrüm tsodo, ha mihbukmuyuk ku kheak keamkihbah! 24Api lüm ching lümkhi mürhimoyiki tüsho mukukyiki Atungpuh buk mükede akhiukkhi mutuklo. Arübe nimungbo ching nüsanü ha anikhitbah.
Currently Selected:
JEREMIA 30: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
