JEREMIA 25
25
Dukulimnü Thiriri
1Juda mihtsürü alala dünkheak, Josia tsührü Juda kiulongthsüpuh Jehoiakim kiulongthsükhi kam phüyipü ching Jeremia kilim thiyu arükhi (ju Babilon kiulongthsüpuh Nebukednezar kam khülangpü lakheah,) 2küpü wukihbuh Jeremianü Juda mihtsürü tüsho Jirusalem ching larü alala ki asuk: 3Amon tsührü Juda kiulongthsüpuh Josia kiulongthsükhi kam thürükheak mahsampü chingnü khihni khiungde, kam mukukheak mahsam, Atungpuh yu I kilim arü, tüsho inü nüsa ki alochode asukdo, tüshe nüsanü mani. 4Tüsho Atungpuhnü api yamlarü wukihrübo alala alochode nüsa kilim arüshihshih she, nüsanü mani yungsho nüsa nükhün mumupho, 5küyimki arünü tha, “ Nüsa mihbüm abannü nüsa amütsü limro tüsho amütsü rhimobo chingnü kheakü rholoang, tüsho Atungpuhnü nüsa le nüsa jipürü kilim jihkhi lomi ching lünnü nüsa aninga labah; 6püpü thrünpuhbo tankihpü düyü tüsho arü dükingaün, tüsho nüsa khah rhimobonü I bukdakhiukshih. Junangde inü nüsa ki athsümünim mürhimo.” 7Tütüshe nüsanü I ki mani, Atungpuhnü thachoh, tüsho junangde nüsa khah rhimonü nüsa nihbuh thsümünimpü nüsanü I bukakhiukshih.
8Jumonü Wuto Atungpuhnü ha thachoh: Tümütüsho nüsanü I yu mani, 9Atungpuhnü thachoh, Inü dukulim trükbo tüsho I yamlarü Babilon kiulongthsüpuh Nebukednezar, ha lomi le mihtsürübo tüsho mühi trükshih alala azhihde handarübah; inü arü shahde thsümünimbah tüsho arübo atrebe tüsho ish thsübe, tüsho akheam müla mihmüthsüm mülakhi kamshihbah. 10Tüsho inü arü kheaknü asühachih tüsho asühkhi düsheak, yamkhünkambuh tüsho yamkhün-kambe düsheak, hi-chukhi düsheak tüsho tsünpung ching ayin keamabahshihbah. 11Ha lomi abümnü thsümünimbah tüsho akeangkeang kambah, tüsho harü trükshihbonü kam nerü Babilon kiulongthsüpuh tankihbah. 12Jushu kam nerü dunglim, Babilon kiulongthsüpuh, ju trükshih tüsho Kaldearü lomi arü mülimkhi dün alomi ju lünnü zhikrangkhündo akamshihbah, Atungpuhnü thachoh. 13Inü azhihde athakhi yubo alala ha hüm ching thrütkhi lüpdükhi, trükshih alala azhihde Jeremianü müchitkhi, ju lomi kheak handarübah. 14Tümüde trükshih ahihdo tüsho kiulongthsürü atobo she arü azhorü kamshihbah; tüsho arü khah rhimobo yande arü ki jihlobah.
Trükshihbo kheak Mahkhap
15Tümüde Atungpuh , Israel Thrünpuhnü I ki ha thachoh: I khah chingnü ha bukakhiuk yukhu pung luang, tüsho inü nü yüshihpung trükshihbo alalanü ha yungshang. 16Inü arü bolung thirithsü yüshihkhinü arübonü ayungbah tüsho ayingyingbah.
17Jumonü inü Atungpuh khah chingnü pung lu, tüsho Atungpuhnü I thiyia yüshihpung trükshih alala yungshih: 18Jirusalem tüsho Juda kiutobo, kiulongthsürübo tüsho atorübo, arübo zhikrangkhündo thsümünimshihpü, arübo khihni lakhi nangde ish thsüpü tüsho muthrumüneanpü; 19Ijip kiulongthsüpuh Pharao, api yamlarübo, atorübo, tüsho api mihtsürü alala; 20khiungkerü larü alala; Uz lomi ching kiulongthsürü alala; Filistia lomi ching kiulongthsürü alala– Ashkelon, Gaza, Ekron, tüsho Ashdod ching aningkhi; 21Edom, Moab, tüsho Amonrü; 22Tair kiulongthsürü alala, Sidon kiulongthsürü alala, tüsho keto hobah keyean lomi kiulongthsürü alala; 23Dedan, Tema, Buz, tüsho kuyü khihde ahütrü alala;#Limshu dangpungbo ching larü. 24Arabia kiulongthsürü alala tüsho loshelo ching lakhi khiungkerü larü yo kiulongthsürü alala; 25Zimri kiulongthsürü alala, Elam kiulongthsürü alala, tüsho Midia kiulongthsürü alala; 26dukulim kiulongthsürü alala, limshu tüsho aphüni, akhinashu thsüde, tüsho alomi kheak lakhi alomiküp kiulongthsübo alala. Tüsho arübo dunglim Babilon kiulongthsüpuhnü ayungbah.
27Judüki nünü arü ki thabah, Wuto Atungpuh , Israel Thrünpuhnü ha thachoh: Inü nüsa bolung nukshang arüshihkhi hode yungang, müshangang tüsho mülümang, lungang tüsho dasürülo.
28Tüsho nü khah ching yo pung leangkhipü thsunglosho, nünü arü ki thabah: Wuto Atungpuhnü ha thachoh: Nüsanü ayungbeah! 29Kheahang, I mung tamde ajikhi kiuto kheak inü thsümütsü handarüpü tankihchoh, tüsho küde thsah nüsanü thsümüchi tsokhikhukpü? Nüsa müthsümüchidüa müyü, tümüde lomi ching larü alala azhihde inü nukshang jihchoh, Wuto Atungpuhnü thachoh.
30Jumonü nünü arü azhihde harü yubo alala müchitbah:
Alomi ching larü alala azhihde Atungpuhnü achang kheaknü ahukbah,
tüsho api amüsüh lapung chingnü api düsheak thsübah;
apinü api lomi azhihde todakde ahukbah,
tüsho kurungaso-nitrü nangde ahobah.
31Achangnü azhikhi düsheak alomi akheam ching alankihbah,
tümüde Atungpuhnü trükshihbo azhihde amüneahkhibo handarübah;
apinü mihtsürü alala kheak mahkhap handarübah tüsho mihbukmuyuk ju nukshang kheak yihkihbah,
Atungpuhnü thachoh.
32Wuto Atungpuhnü ha thachoh: Kheahang, thsümütsü ju trükshih chingnü trükshih ching buchoh, tüsho alomi akheam chingnü chitmühean akihchoh! 33Ju nimung ching Atungpuhnü alaksahkhi ju alomi akheam kheaknü akheam khülim khiungde alabah. Arübo mütüzho, yungsho mushuhmukhung, yungsho kiuyuka mübah; arübo ju alo kheak sünitmujung kambah. 34Tüzhoang, nüsa mihnu neakrübo, tüsho zhiang; awahbo ching lungphülapang, nüsa mihnu boto atungrübo, tümüde nüsa laksahpü nimung arüdo, tüsho nüsa shoto phüh nangde ayokhia adannakbah. 35Mihnu neakrübo mutsokhukde alabah, tüsho mihnu putungrübo tsopung mülade alabah. 36Mihnu neakrübonü azhikhi, tüsho mihnu boto putungrübonü atripkhi aniang! Tümüde Atungpuhnü arü shiwüh akampung thsümünimjihchoh, 37tüsho mungtsü lomibo thsümünimdo, tümütüsho Atungpuh buk müshakde akhiukkhinü ah. 38Kekhüzü nangde apinü lapung bahbah tsodo; tümütüsho bukmüke nukshang tüsho api bukmükede akhiukkhinü arü lomi thsümünima lah.
Currently Selected:
JEREMIA 25: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
