JEREMIA 26
26
Jeremia Müzünkhi
1Josia tsührü Juda kiulongthsüpuh Jehoiakim kiulongthsü atankih ching, ha yu Atungpuh kilimnü arü: 2Atungpuhnü ha thachoh: Atungpuh yam mahkhappung ching zhipang, tüsho Atungpuh yam ching kingaünpü arükhi Juda kiutobo alala ki asukang; inü nü ki thiyukhüm jihkhi yubo alala arü ki asukang; thiyubüm khülang she düwuhlo. 3Khükia arü alalanü anibah tüsho arü amütsü limro chingnü rholobah, junangde arünü amütsü rhimokhi hode thsümütsü handarüpü lakhi dünkheak I lümkhi müthribah. 4Nünü arü ki thabah: Atungpuhnü ha thachoh: Inü nüsa miki zojihkhi yakzan ching tsahpü nüsanü I ki manisho, 5tüsho nüsanü mania lalashe inü I yamlarü wukihrübo niokheamde nüsa kilim arüshihkhi yubo manisho, 6inü ha yam Shilo nangde akamshihbah, tüsho alomi trükshih alala bolung ha kiuto muthrumünean kamshihbah.
7Amükeamrübo le wukihrübo tüsho mihtsürü alalanü Jeremianü harü thakhi yubo so. 8Tüsho küyimki Atungpuhnü mihtsürübo alala ki asukpü Jeremia ki thiyukhüm jihkhi alala bankhea, amükeamrü le wukihrü tüsho mihtsürü alalanü api ramlobah tha, “ Nü ashepü tsütsü! 9Tümüde nünü Atungpuh mung chingnü, ‘ Ha yam Shilo ruk kambah, tüsho ha kiuto mihtsürü mülade zhikrangkhündo alabah’ de müchitcho?” Tüsho mihtsürü alalanü Atungpuh yam ching Jeremia mükamde mukhung.
10Küyimki Juda torübonü harü sokhea, arünü kiulongthsüpuh yam chingnü Atungpuh yam lim atu tüsho Atungpuh yam ching yüzahpung chipiripit aso kheak arübah bin. 11Judüki amükeamrü tüsho wukihrübonü atorü tüsho mihtsürü alala ki tha, “Ha mihtsürü asheshihpü thülünlah, tümütüsho nüsa nükhünnü asokhi nangde, apinü ha kiuto azhihde müchitdo.”
12Judüki Jeremia nü atorü tüsho mihtsürü alala ki tha, “ Nüsanü asokhi yubo alala, ha yam tüsho ha kiuto azhihde müchitpü Atungpuhnü I thiyikheah. 13Kheakü jumonü nüsa limrobo tüsho nüsa rhimobo thsüphuloang, tüsho Atungpuh nüsa Thrünpuh yu aniang, tüsho Atungpuhnü nüsa azhihde athakhi thsümütsü alala dünkheak api lümkhi müthribah. 14Tüshe I thsungkheak a, I ha kheak nüsa khah ching lah. Nüsanü atsükhi tüsho alungki lakhinü I kheak rhimoang. 15Ha lang nüsanü khürü mükheahpü ju, nüsanü I sheshihsho, nüsanü nüsa le ha kiuto tüsho ha ching larübo kheak mülimkhi thiyih handarübah, tümüde thiyuro ching harü yubo nüsa nükhün ching arüshihpü Atungpuhnü I thiyikheah.”
16Judüki atorü tüsho mihtsürü alalanü amükeamrü tüsho wukihrübo ki tha, “Ha mihtsürü asheshihpü müthülün, tümüde apinü Atungpuh isa Thrünpuh mung chingnü isa ki asukdo.” 17Tüsho lomi ching azothsürü khürünü asürübahle mukhunga lakhi mihtsürü alala ki tha, 18“Juda kiulongthsüpuh Hezekia nimungbo ching müchitbuh Moreshethrü Mikanü Juda mihtsürü alala ki tha:
‘ Wuto Atungpuhnü ha thachoh,
Zion ju thulu nangde wochakbah;
Jirusalem athsümünim mujung kambah,
tüsho thüyam wung ju murung kambah.’
19Juda kiulongthsüpuh Hezekia tüsho Juda alalanü atsütsü api sheshihkhea de? Apinü Atungpuh mütrekhea de tüsho Atungpuh amuzho thsungkheak mumushu de, tüsho apinü arü azhihde athakhi thsümütsü dünkheak Atungpuh lümkhi mümüthrikhea de? Tüshe isa a isa kheak thsümütsü ato handarüpü thsüchoh!”
20 Atungpuh mung ching müchitpü püpü mihtsürü, Shemaia tsührü Uria, Kiriath-jearim chingnü alakheah. Apinü Jeremianü müchitkhi nangde ha kiuto tüsho ha lomi azhihde müchit. 21Tüsho küyimki kiulongthsüpuh Jehoiakim, api yo thirithsürübo tüsho atorü alalanü api yubo sokhea, kiulongthsüpuhnü api sheshihpü yim; tüsho küyimki Urianü ju sokhea, api trede kam tüsho Ijip ching tsokhide yü. 22Kiulongthsüpuh Jehoiakimnü Akbor tsührü Elnathan tüsho api lung mihtsürübo Ijip ching yüshih, 23tüsho arünü Ijip chingnü Uria bea lu tüsho kiulongthsüpuh Jehoiakim ki api bedarü, shepünü api nukshangnü kiua keamshih tüsho ashemi ju mihtsürü boto mibahpung jipa bah,
24Tüshe Shaphan tsührü Ahikam khah Jeremia kheak lakheah, junangde api sheshihpü mihtsürübo khah ching muyukjih.
Currently Selected:
JEREMIA 26: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
