JEREMIA 24
24
Khubaso Muluk Mahne
1 Atungpuhnü khubaso muluk mahne Atungpuh arüngyam miki zokhi I ki huh. Ha Babilon kiulongthsüpuh Nebukednezarnü Jehoiakim tsührü Juda kiulongthsüpuh Jehoiakin, api lung Juda torübo, keaklahrü, yingkingrü, Babilon ramtso ching hande ayü dunglim lakheah. 2Muluk khülang ching akhuh münkhi khubaso nangde, khide atsü lakheah, tüshe püpü muluk ching a mütsühkhukpü thsüde khide amütsü khubaso lakheah. 3Tüsho Atungpuhnü I ki tha, “ Nünü tümü ngüla, Jeremia?” Inü tha, “ Khubasobo, khubasobo atsü a khide tsülah, tüsho khubaso amütsübo a mütsühkhukpü thsüde khide mütsü.”
4Judüki Atungpuh yu I kilim arü: 5Atungpuh Israel Thrünpuhnü ha thachoh: Harü khubaso atsü nangde, inü ha dangpung chingnü Kaldearü lomi ching yüshihrü Juda ching ramtsorü atsü khejihbah. 6Atsü thsungkheaknü arü kheak I mük zobah, tüsho ha lomi ching inü arü belodarübah. Inü arü thsükihbah, tüsho arü müthokheam; inü arü khimbah, tüsho arü mürukkhit. 7Inü arü kilim I Atungpuh de mükheahpü mulong jihbah; tüsho arübo I mihtsürü thsübah tüsho I arü Thrünpuh thsübah, tümüde arü mulong athrünkhinü arübo I kilim rholobah.
8Tüshe Atungpuhnü ha thachoh: Khubaso amütsü mütsühkhukpü lakhi nangde, inü Juda kiulongthsüpuh Zedekia, api yo atorübo, ha lomi ching lakhi Jirusalem ching aningkhibo tüsho Ijip lomi ching larübo ki rhimobah. 9Inü arübo alomi kiulongthsü alala ki atrebe, amütsübe, mihmüthsüm mülakhi, mührü münedung, mulong yuribe, tüsho inü arü yana yüshihkhi dangpungbo alala ching muthrumünean lashihbah. 10Tüshe inü nukshang, khümzung, tüsho arüm-tukthsü, inü arü tüsho arü jipürü kilim jihkhi lomi chingnü arübo shahde müdükheakshihyi khiungde arü kheak yüshihbah.
Currently Selected:
JEREMIA 24: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
