JEREMIA 20
20
Jeremia tüsho Pashhur
1Kheakü Immer tsührü amükeambuh Pashhur, shepü Atungpuh yam ching atobuh lakhea, Jeremianü harü müchitkhibo so. 2Judüki Pashhurnü wukihbuh Jeremia shik, tüsho Atungpuh yam Benjamin Chipiripit akube ching lakhi rihyam ching zo. 3Ashido yapsu küyimki Pashhurnü Jeremia rihyam chingnü dükhekhea, Jeremianü api ki tha, Atungpuhnü nü mung Pashhur de müji tüshe “Alalamükamde-atrebe.” 4Tümüde Atungpuhnü ha thachoh: Inü nü tüsho nü müyamrü alala ki nü atrebe kamshihchoh; tüsho nünü kheahde alachoki arübo arü riri nukshangnü akeambah. Tüsho inü Juda alala Babilon kiulongthsüpuh khah ching jihbah; apinü arübo rama lubah Babilon ching tsobah, tüsho nukshangnü arü laksahbah. 5Inü ha kiuto lakhit alala, hi alala, shoto kukrukbo, tüsho Juda kiulongthsüpuh rahpungbo arü riri khah ching jihbah, arünü ju yankhia lubah, tüsho rama lubah, tüsho Babilon ching hande ayübah. 6Tüsho nü, Pashhur, tüsho nü yam ching larü alala, rama hanbah atsobah, tüsho nü Babilon ching yübah; nü ju ching shebah tüsho nü le nünü sherü kheak akeangyu müchitkheanü nü müyamrü alala ju ching kiuyuka bahbah.
Jeremianü Atsanglokhi
7O Atungpuh , nünü I mülapyukdo tüsho I mülapyuka lakheah,
nünü I zhihodo tüsho nünü kukdo.
I nimung amuyung münedung kamdo;
alalanü I ki münejihchoh.
8Tümüde küyimki inü asukkheanü, inü zhikhit,
inü zhi, “ Khahleakleak tüsho athsümünim!”
Tümüde I thsungkheaknü Atungpuh yu nimung amuyung mükhemükim tüsho keangrümüne kamdo.
9Inü tha, “ Inü api mütam,
yungsho kheaküa api mung ching masuk,”
judüki I mulong ching mo nangde takchoh,
I robo ching mükhipchoh;
ju ching ramlokhinü I khilah, tüsho inü mukuk.
10Tümüde jikjikyu ahihdo inü solah,
“Atrebe alala mükamde lah!
Api yusheak jihang! Isanü api yusheak jihanü!”
I müyamrükhung alalanü I jing mükhelim kheahchoh.
“ Khükia api mülapyukbah,
tüsho isanü api kukbah tüsho api kheak isa royimbah.”
11Tüshe Atungpuh ju atrebe thirithsürü nangde I lung lah;
jumonü I thsümüchirü jing mükhebah tüsho arünü mukuk.
Arü tode achih ngübah,tümüde arünü akuk müngü.
Arü akheam müla achihkhi küyimkishe mümih.
12O Wuto Atungpuh , nünü thiyuro-lungkirü rükakia kheahchoh,
nünü mulong tüsho lümkhi ngülah;
nünü arü kheak royimkhi inü kheahanü,
tümüde I lümkhilümduh inü nü ki jihdo.
13 Atungpuh ki khün thsüang;
Atungpuh shiang!
Tümüde apinü müthsümülarü rhangdung ju amütsü-rhimorü khah chingnü bekhitdo.
14I zübekhi nimung muthrumünean thsang!
I benü I zübekhi nimung müngühmühi düla!
15I buh ki thiyusheak atsü jihbuh mihtsürü muthrumünean thsang,
shepünü api khide asühshihde tha,
“ Khungarü, athrürü nü kilim zübejih-a lah.”
16Ju mihtsürü Atungpuhnü amuzho mülade lahyuka bahkhi kiuto nangde thsang;
apinü yapsu azhikhi khülang tüsho animuro arhunganim soshang,
17tümütüsho apinü I nuyam chingnü mülaksah;
junangde I be ju I kiuyuk lapü lakheah,
tüsho anihbe nuyam lünnü ato lapü lakheah.
18Küpkhuk tüsho mulong rozhak kheahpü tüsho I nimungbo achihpü ching kheampü tümü thsüpü I nuyam chingnü arükhea?
Currently Selected:
JEREMIA 20: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
