JEREMIA 19
19
Atrükhi Phüh
1 Atungpuhnü tha: Yüang tüsho phühdamrü yo alopung khülang thuloang. Nü lung azothsürü mihtsürü tüsho azorü amükeamrü khürü beang, 2tüsho phühdamkhi Ripit ching Hinnom Tsührü Jindükhün lim wukhiukang, tüsho ju ching inü nü ki thakhi yu zhiyukang. 3Nünü athabah: Atungpuh yu aniang, O Juda kiulongthsürübo tüsho Jirusalem ching larübo. Wuto Atungpuh , Israel Thrünpuhnü ha thachoh: Inü ha dangpung kheak thsümütsü handarübah, junangde sherübonü ha sobanü nükhün peangbah, 4tümütüsho mihtsürübonü I bahyuk, tüsho arü le jipürü yungsho Juda kiulongthsürübonü mümükheahkhi püpü thrünpuhbo ha ching kingaünkhinü ha dangpung müneanjih; tüsho arünü ha dangpung ching amülimmülarü thiyihnü mishih, 5tüsho arünü arü tsührübo Baal kilim taka kingaünpü Baal thsungkheak awung achang dangpungbo thsü, küpünü thiyukhüm müjih yungsho yakzan müthsü, yungsho I lüm ching müzahkhi la. 6Jumonü Atungpuhnü thachoh, ha dangpung ki Topheth yungsho Hinnom Tsührü Jindükhün müjide Mihkhuk Jindükhün de ajipü nimung tsükjide arado. 7Tüsho ha dangpung ching inü Juda tüsho Jirusalem lümkhibo akeangkeang kamshihbah, tüsho arübo arü riri müngüh nukshang tüsho arü rhangdung yimrü khah hode akeamshihbah. Inü arü ashemibo thüning wuhnubo tüsho alomi shiwühbo kilim jim thsüpü jihbah. 8Tüsho inü ha kiuto atrebe, ish thsübe khülang kamshihbah; ha chingnü ahorü abannü ha thsümütsü dünkheaknü atrebah tüsho ish thsübah. 9Tüsho inü arü ki arü tsührübo tüsho tsührübebo shih tsühshihbah, tüsho arü rhangdung yimrünü zündobahle arü lümthsünüde lachoki arünü yamhingrü shih tsühachihbah.
10Judüki nünü nü lung yürü mikinü phüh yihrüpbah, 11tüsho arü ki thabah: Wuto Atungpuhnü ha thachoh: Khürünü phühdamrü phüh yihrüpkhi nangde inü ha mihtsürü tüsho ha kiuto yihrüpbah, junangde ha küyimkishe müthsülokhuk. Topheth ching arünü dangpung mülayi khiungde kiuyuka bahbah. 12Hanangde ha dangpung, ha ching larü tüsho ha kiuto Topheth nangde akamshihpü Atungpuhnü thachoh. 13Tüsho Jirusalem yambo le Juda kiulongthsürü yambo ju Topheth nangde müneanshihbah–thüyam kumung kheaknü rhümthüneabe takde chining kingaünkhi tüsho püpü thrünpuhbo kilim yukhu buka bahkhi yambo alala.
14Küyimki Jeremianü Atungpuhnü müchitpü yüshihpung Topheth chingnü arükhea, apinü Atungpuh yam mahkhappung ching zhip tüsho mihtsürü alala ki tha: 15Wuto Atungpuh , Israel Thrünpuhnü ha thachoh: Kheakü inü ha kiuto tüsho kiutobo kheak inü azhihde athakhi thsümütsü alala handarüchoh, tümütüsho arünü I yubo anipü reanglode arü hung chungthülangdo.
Currently Selected:
JEREMIA 19: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
