JEREMIA 21
21
Jirusalem Kukpü Müchitkhi
1Ha Atungpuh yu kiulongthsüpuh Zedekianü Malkia tsührü Pashhur tüsho Maaseia tsührü amükeambuh Zephania api kilim yüshihchoki Jeremia kilim arü. Arünü tha: 2“Muzhobah isa thsung thsüde Atungpuh ki keojang, tümüde Babilon kiulongthsüpuh Nebukednezarnü isa azhihde thirithsüchoh; khükia apinü rhimode alakhi nangde Atungpuhnü amüyinsahbe isa thsungkheak rhimobah, tüsho isa kheaknü api tsoloshihbah.”
3Judüki Jeremianü arü ki tha: 4Nüsanü Zedekia ki ha thabah: Atungpuh Israel Thrünpuhnü ha thachoh: Nüsa khah ching lakhi thirithsü thsühnukbo küpünü chipi aleanglim nüsa yanrü Babilon kiulongthsüpuh tüsho Kaldearü bede keochihchonü inü luloabahbah; tüsho inü arübo ha kiuto phulung ching rukhüh bemukhungbah. 5Inü she nüsa azhihde khah ato chungkhitbah, bukakhiukde, mulong zhipzhipde, tüsho bukmükede keochihbah. 6Tüsho inü ha kiuto ching larü, mihtsürü tüsho shiwüh chido laksahbah; arübo tukthsü amütsünü ashebah. 7Atungpuhnü thachoh, ju dunglim inü Juda kiulongthsüpuh Zedekia, api yamlarübo, tüsho ha kiuto ching larü mihtsürübo–arümtukthsü, nukshang tüsho khümzung chingnü rhangdung larü–Babilon kiulongthsüpuh Nebukednezar khah ching, arü rhangdung yimrü arü riri khah ching jihbah. Apinü arübo nukshang müzheannü alaksahbah; apinü arü amuzho müla, maningshih, yungsho mihmuzho müla.
8Tüsho harü mihtsürü ki nüsanü athabah: Atungpuhnü ha thachoh: Kheahang, inü nüsa miki rhangdung limro tüsho ashepü limro zojihchoh. 9Sherü ha kiuto ching lanü nukshang, khümzung, tüsho tukthsünü ashebah; tüshe sherü wukhiukba tüsho nüsa yanrü Kaldearü ki jihabahbanü nüsa rhangdung labah tüsho thirithsü thsambah khülang nangde arü rhangdung labah. 10Tümüde inü ha kiuto azhihde amütsü thsungkheak I miro anguhdo tüsho atsü thsungkheak yung, Atungpuhnü thachoh: Ha Babilon kiulongthsüpuh khah ching jihbah, tüsho apinü monü atakbah.
Juda kheak Mahkhap
11Juda kiulongthsüpuh yamkhün ki thaang: Atungpuh yu aniang, 12O David yamkhün! Atungpuhnü ha thachoh: Yapsu aban thiyuro rhimoang, tüsho khürü rükyuka larü ajunorü khah chingnü bekhitang, jude yungsho I bukakhiukkhi mo nangde ayübah, tüsho shenü müyihmütde nüsa rhimo amütsübo thsungkheaknü atakbah. 13Kheahang, inü nüsa azhihchoh, O jindükhün ching larübo, O adükhün lungto, Atungpuhnü thachoh; nüsa sherünü tha, “Shenü isa azhihde akikhukpü, yungsho shenü isa jikpung azahkhukpü?” 14Nüsanü rhimokhi sangaso nangde inü nüsa thsümüchibah, Atungpuhnü thachoh; inü ha murung ching mo takkihbah, tüsho ju mükamde alala aniuabahbah.
Currently Selected:
JEREMIA 21: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
