JEREMIA 18
18
Phühdamrü Yam ching
1 Atungpuh yu Jeremia kilim arü: 2“Asürang, phühdamrü yam ching yükiang, tüsho ju ching nü ki I yubo soshihbah.” 3Jumonü inü phühdamrü yam ching yüki, tüsho ju ching api aheanbe ching rhimode alakheah. 4Phühdamrü khah ching thsüde alakhi phüh ju thsümünim tüsho junü api tsükhi püpü phüh thsülo.
5Judüki Atungpuh yu I kilim arü: 6O Israel yamkhün, ha phühdamrünü athsükhi nangde inü nü kheak rhimopü mukukba de? Atungpuhnü thachoh. Phühdamrü khah ching dujunglo lakhi nangde, nü I khah ching lah, O Israel yamkhün. 7Kim khülang ching trükshih yungsho kiulongthsü khülang dünkheak zükshaka bahpü tüsho kingkheampü tüsho thsümünimpü inü athapü lah, 8tüshe inü athakhi trükshihnü amütsü chingnü rholosho, inü thsümütsü handarüpü lakhi chingnü I lümkhi müthribah. 9Tüsho püpü kim ching trükshih khülang yungsho kiulongthsü khülang dünkheak athsüpü tüsho akhimpü inü athapü lah, 10tüshe I yu manide I miki amütsü rhimosho, judüki inü atsü rhimopü lümkhi müthribah. 11Kheakü, jumonü Juda mihtsürü tüsho Jirusalem ching larü ki thaang: Atungpuhnü ha thachoh: Kheahang, nüsa azhihde inü thsümütsü thsüchoh tüsho rük amütsü thsüchoh. Nüsa alala limro amütsü chingnü kheakü rholoang, tüsho nüsa limrobo le nüsa rhimobo müthriang.
12Tüshe arünü tha, “Ju rhimo müla! Isanü isa nihbuh lümkhi yanbah, tüsho isa mihbüm abannü isa lümkhi amütsü yande arhimobah.”
Mihtsürübonü Atungpuh Bahyuk
13Jumonü Atungpuhnü ha thachoh:
Trükshih bolung keoang:
Ha ruk shenü sode?
Atsangkhit Israelnü khide atrebe rhimodo.
14Lebanon lungku achang kheak phürüm mülacho de?
Awung kerüng bukkhi ngahcho de?
15Tüshe I mihtsürübonü I mihabahdo,
arünü sangthsübo ki rhümthüneabe takchoh;
arü jipü limrobo ching arü jing mükhedo,
tüsho arübo limto ching yungde limkeanganu ching tsodo,
16arü lomi atrebe kamshihde, lünnü ish thsüpü lah.
Ha ki horü alala trechoh tüsho arü kubo lukchoh.
17Aniakhiuklim pung nangde,
inü arübo thiriri müngüh hiumüzütshihbah.
Arü thsümütsü nimung inü I miro yungde I düthsün arü ki huhbah.
Jeremia azhihkhi
18Judüki arünü tha, “Arang, isanü Jeremia azhihde rhimoanü tümüde amükeamrü kilimnü thsangdan yungsho lümlung larü kilimnü lümthiyan, yungsho wukihrü kilimnü thiyu müdükheak. Arang, isanü api azhihde athabebo handaranü, tüsho isanü api yu tümü she maninü.”
19I kilim anguhang, O Atungpuh , tüsho I azhihrübonü athakhi anijang! 20Atsü ju amütsünü ashakloba de? Tütüshe arünü I rhangdung thsungkheak alokhün khülang kiudo. Künangde I nü miki zhipkheanü, arü thsungkheak asukpü, arü kheaknü nü bukakhiukkhi rholode atsopü lümkhitjang. 21Jumonü arü tsührübo khümzungnü sheshang; arübo nukshang wu kilim jihang, arü niuberübo tsührü mülade tüsho khimoberü kamshang. Arü niubuhrübo tukthsünü sheshang, athunurübo keochih ching nukshangnü laksahshang. 22Nünü mihjimrü arü azhihde handarüchoki, arü yambo chingnü azhikhi soshang! Tümüde arünü I tholopü alokhün kiua lah, tüsho I jing phuhpü qimürip zolah. 23Tütüshe O Atungpuh , arünü I laksahpü lümkhi nünü mükheahlah. Arü mülimkhi neak dübahjih, nü mikinü arü neak nankhita dübah. Arübo nü miki jipkhia bahang; nü bukakhiukchoki arü ki keoang.
Currently Selected:
JEREMIA 18: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
