JEREMIA 17
17
Juda Neak tüsho Thsümüchi
1Juda neak ju yinchi dosangnü thrütlah; shotolung-müküp müzheannü arü mulong beak kheak tüsho arü kingaün sadam juhbo kheak thrütkihlah, 2arü tsührübonü she arü kingaün sadam tüsho Ashera sangthsübo lümkhitchoh, sangdung phüyak aban ki tüsho awung achangbo kheak, 3mükeak ching awungbo kheak. Nüsa lomi alala ching nüsa lakhit tüsho rahpungbo nüsa neak dün nüsa riribonü alushihbah. 4Nüsa nihbuhnü arhimokhi hode inü nüsa kilim jihkhi yamrüplurüp dükheakbah, tüsho nüsanü mümükheahkhi lomi ching inü nüsabo nüsa riribo tankihshihbah, tümüde I bukakhiukkhi ching lünnü atakpü mo khülang takkih-a lah.
5 Atungpuhnü ha thachoh:
Shepünü mihtsürü kheak kinchonü muthrumünean,
shepünü nihbuh sühmüh thsungkheak shih kheak angükihcho tüsho shepü mulong Atungpuh kheaknü chamkhicho.
6Api ju loshelo ching rim nangde lah tüsho atsü arükhi müngü,
tüshe tümü masürüpung thimi lo ching she mülapung labah.
Api kheak atsü tümü müdünjichoh.
7Shepünü Atungpuh kheak kinchonü müngühmühi,
shepü akin Atungpuh la.
8Api a keyean khimkhi sangdung nangde ayingbo keyung ching chinde yüchoh.
Alamlam arüchoki mütre;
ayübo kamruhroro phüyaklah.
Tsüng marüchoki atrepü müla,
aso asodü lang lachoh.
9Mulong ju alala kheaknü mülapmüjikhi lah tüsho athsüngupü münchi holah,
shepünü ju anikhitkhukba?
10I Atungpuhnü alala kilim arü limrobo ayannü,
arü rhimobo ayannü ajihpü rükakichoh tüsho mulong yimchoh.
11Patridge wuhnunü mühüpkhitde püpürü jipjipbo bemukhungkhi nangde
thiyuro mülakhi lakhit hanmukhungrü ju ruk ah;
api rhangdung murochoki anihbuh lakhitbo dükheakbah,
tüsho akheam ching api makhakhi mütsanbah.
12O müretahkhi kiulongthsü-binkiu,
atankih chingnü ashuhkihkhi,
ju isa arüngyam dangpung ah!
13O Israel mulonglam! O Atungpuh !
Nü bahyukrü alala achih ngübah;
sherü nü kheaknü rholode tsochonü alo ching thrütyukbah,
tümüde arünü rhangdung ke-bukpung, Atungpuh bahyukdo.
Jeremianü Arung Kheangkhi
14I thsüngujang, thsüngujang, O Atungpuh , tüsho I athsüngubah; I khümkhitang, tümüde nü a inü mungshipü lah.
15Kheahang küruk arünü I ki thacho, “Atungpuh yu küching la? Ju arüshang!”
16Inü nü mihnu neakde nü yankhi chingnü mutso, yungsho inü adükheakpü nimung mükün. I münküp chingnü tümü akhiukkheanü nünü mükheahlah; ha nü miki lakheah. 17I ki atrebe düla; nü a thsümütsü nimung ching I tsoyukpung ah; 18I thsümüchirü achih ngüshang, tüshe I achih düngüshih; arü müyinsahshang tüshe I a dümüyinsahshih; arü kheak thsümütsü nimung handarang; alochode athsümüchinü arü dükheakshang!
Amunimung Mukhi
19 Atungpuhnü I ki ha tha: Yüang tüsho Juda kiulongthsürübo le mihtsürübo yüzahla akhiukla düpung chipiripitbo, tüsho Jirusalem chipiripitbo alala kheak zhipang, 20tüsho arü ki thaang: Nüsa Juda kiulongthsürübo, Juda alala, tüsho Jirusalem ching larü alala, harü chipiripitbo chingnü yüzahrü, Atungpuh yu aniang. 21Atungpuhnü ha thachoh: Nüsa rhangdung thsungkheaknü amunimung hah mühanpü kümkangang yungsho Jirusalem chipiripitbo chingnü hande düyüzah. 22Tüsho amunimung nüsa yam chingnü hah dühankhit yungsho rhimo tümü düthsü, tüshe inü nüsa jipürü ki thiyukhüm jihkhi nangde, amunimung müsühde zoang. 23Tütüshe arünü mani yungsho arü nükhün mumupho; arünü arü hungbo chungthülang tüsho mani yungsho thsangdan müleangkhi.
24Tüshe Atungpuhnü thachoh, nüsanü I ki anisho, tüsho amunimung ha kiuto chipiripit hode hah tümü hande mazahsho, tüshe amunimung müsühde zosho tüsho rhimo müthsüsho, 25ha kiuto chipiripit hode David kiulongthsübinkiu kheak binrü kiulongthsürübo, arü torübo, Juda mihtsürü tüsho Jirusalem ching larü khora-lolungbe tüsho khorabo kheak binbah yüzahbah tüsho ha kiuto lünnü alabah. 26Tüsho mihtsürübo Juda kiutobo tüsho Jirusalem mühi dangpungbo, Benjamin lomi, Shephela, awung lomi, tüsho Negeb chingnü taka kingaünkhi tüsho laksah-a kingaünkhi, hi kingaün tüsho rhümthüneabe, tüsho Atungpuh yam ching makshe jihkhi kingaünbo lubah arübah. 27Tüshe nüsanü amunimung müsühde azopü tüsho amunimung Jirusalem chipiripitbo ching hah mühanyukpü I ki manisho, ha chipiripitbo ching inü mo takkihbah; hanü Jirusalem dangpung aniuabahbah tüsho shenü müzünmütkhuk.
Currently Selected:
JEREMIA 17: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
