JEREMIA 14
14
Atrebe Khümzung
1Akungkhi dünkheak Atungpuh yu Jeremia kilim arü:
2Juda tüzhochoh tüsho anihbe chipiripitbo keamchoh;
arübo masühde alo kheak yaplah,
tüsho Jirusalemnü azhikhi yükihchoh.
3Atorübonü arü yamlarübo ke thsungkheak yüshihchoh,
arübo kekhip ching arüchoh,
arünü ke müngü, arübo kesopung akeangkeang tsolochoh.
Arübo achih ngüdo tüsho mulong thsümünimdo tüsho arü ku muhiuchoh,
4tümütüsho alo jukrüpa lah.
Tümütüsho alo kheak tsüng mülamonü thulu thsürübo mulong thsümünim;
arünü arü ku muhiuchoh.
5Thulu ching shihmüchinü she anunu aso adrekhi bahkhichoh tümütüsho rim müla.
6Mütüm khorabonü awung achangbo kheak zhipchoh,
arünü shirungbo nangde sheak suaneanchoh;
rimlopung mülakhinü arü mük mürheakkhuk.
7Isa mülimkhibonü isa azhihde thiyumütsan thsüthsü she,
O Atungpuh , nü mung chingnü rhimoang;
tümüde isa ashitlokhi tode lah tüsho isanü nü azhihde neak yihbeakdo.
8O nü Israel mulonglam,
küpkhuk kim ching khümkhitbuh,
tümüde nü a isa lomi ching hanrü ruk,
hantsahrü tsüngrekhüh thsungkheak lakhi ruk a le?
9Tümüde nü a mihtsürü nangde müyinnima,
akhümkhitkhukpü wumülakhi thirithsürü nangde alaba?
Tütüshe, O Atungpuh , nü isa bolung lah,
tüsho nü mung chingnü isa jikheah, isa dübahyuk!
10Ha mihtsürü dünkheaknü Atungpuhnü ha thachoh: Tsükjide arünü rümde atsahpü muzhodo, arünü arü jing mutuklo; jumonü Atungpuhnü arü müleangkhi, kheakü apinü arü mülimkhibo lümkhitbah tüsho arü neakbo dünkheak thsümüchibah.
11 Atungpuhnü I ki tha: Harü mihtsürü arung thsungkheak dütamkhüntamnü. 12Arünü khümkeak thsüthsü she, arünü azhikhi inü muso, tüsho arünü taka kingaünkhi tüsho hi kingaün jihjih she, inü arü müleangkhi; tüshe nukshangnü, khümzungnü, tüsho arüm-tukthsünü arü sheshihbah.
13Judüki inü tha: “Ah, Atungpuh T H RÜ NPU H ! Ha ching wukihrübonü arü ki thachoh, ‘ Nüsanü nukshang müngü, yungsho nüsa khümzung müla, tüshe ha dangpung thiyuro mungtsü inü nüsa kilim jihbah.’ ” 14Tüsho Atungpuhnü I ki tha: Wukihrübonü I mung ching akeangyu müchitchoh; inü arü müthiyi, yungsho arü ki thiyukhüm müjih yungsho arü ki masuk. Arünü nü ki akeangyu michih, müthülünkhi müchityu, tüsho arü nihbuh akeangyu lümkhi müchitchoh. 15Jumonü inü arü müthiyide I mung ching müchitrü wukihrü dünkheak Atungpuhnü ha thachoh, tüsho sherübonü tha, “ Nukshang tüsho khümzung ha lomi ching marü.” Nukshang tüsho khümzungnü arü dükheakshihbah. 16Tüsho arünü sherü mihtsürü ki müchitkheanü, khümzung tüsho nukshangnü ashekhi hode Jirusalem wungdo phulung ching jipa bahbah. Arü kiuyuka bahrü she mülade alabah–arü, arü niuberübo, arü tsührü, tüsho tsührübebo. Arü mihbukmuyuk inü arü kheak dungkihbah.
17Nünü arü ki ha yu thaang:
Azhing tüsho ayin I mükbo ching chike bukkhishang,
tüsho jurü dükheamshih,
tümüde atsangkhit tsührübe – I mihtsürü–
mülangde dama kinga yapshihlah,
khide sükde yurijihdo.
18I thulu ching wukhiuksho,
nukshangnü alaksahkhibo inü ngüchoh;
I kiuto ching yüzahsho,
khümzungnü tukthsürübo inü ngüchoh.
Wukihrü tüsho amükeamrü chido arünü mümükheahkhi ching yüdo.
Mihtsürübonü Atungpuh ki Mushukhi
19Nünü shahde Juda bahyukdo de?
Nü mulongnü Zion thraneanabahdo de?
Isa thsungkheak athsüngu mülapü thsüde tümüde nünü isa shika lungshihkhea?
Isanü mungtsü thsungkheak kheahchoh, tüshe atsü müngü;
athsüngupü kim kheahchoh tüshe ju müthri atrebe lah.
20O Atungpuh , isanü isa yo mihbukmuyuk,
isa jipürü mülimkhibo thakhitchoh,
tümüde isanü nü azhihde neak yihbeakdo.
21Nü mung chingnü, isa düthranean;
nü müretah kiulongthsü-binkiu wüntre müjihde düla;
lümkhitang tüsho isa kheak trükshih tangzüng düthsümünim.
22Sangthsübo khürünü tsüng arüshihkhukba de?
Yungsho thüningbonü wungpütsüng akishihkhukba de?
O Atungpuh isa Thrünpuh, ha nü yung de?
Isanü nü kheak isa mulonglam zojihchoh,
tümüde ha alala nünü rhimochoh.
Currently Selected:
JEREMIA 14: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
