JEREMIA 13
13
Khimthünak Amütsan
1 Atungpuhnü I ki ha tha, “ Yüang tüsho nünü khimthünak thuloang, tüsho nü chim kheak rümang, tüshe ke ching düthsam.” 2Jumonü Atungpuh yu yande inü chimrümbe khim thulo, tüsho I chim kheak rüm. 3Tüsho mahne kipü Atungpuh yu I kilim arü, 4“ Nünü thuloa yihkhi chimrüm khim luang, tüsho kheakü Euphrarü kilim yüang, tüsho ju lungkhün ching rama zoang.” 5Jumonü inü yü, tüsho Atungpuhnü I ki thiyukhüm jihkhi nangde Euphra ki rama zo. 6Tüsho nimung ahihdo dunglim Atungpuhnü I ki tha, “ Kheakü Euphra lim yüang, tüsho inü ju ching rampü thiyukhüm jihkhi chimrüm khim luang.” 7Judüki inü Euphrarü kilim yü, tüsho kiu tüsho inü rama lakhi dangpung chingnü chimrüm khim lu. Tüshe chimrüm khim ju thsümünima lakheah; ju tümü atsü mülade alakheah.
8Judüki Atungpuh yu I kilim arü: 9Atungpuhnü ha thachoh: Hanangde inü Juda kükheangkhi tüsho Jirusalem tode kükheangkhi thsümünimbah. 10Ha amütsü mihtsürü, sherünü I yu anipü thsunglocho, sherünü nihnihde arü lümkhi ching yancho tüsho püpürü thrünpuhbo dunglim arü tankihpü tüsho kingaünpü yüdünü, atsü thsungkheak tümü mülakhi ha chimrüm khim nangde alabah. 11Tümütüsho chimrüm khimnü khürü chim kheak kapkihkhi nangde, inü Israel yamkhün abümnü tüsho Juda yamkhün abümnü I kheak kapkihshihbah, Atungpuhnü thachoh, jude athsükhinü arübo I thsungkheaknü mihtsürü khülang, mung khülang, mungshi khülang, tüsho müretahkhi khülang labah. Tüshe arünü mani.
Yukhu Phüh
12Nünü arü ki ha yu asukbah: Atungpuh , Israel Thrünpuhnü ha thachoh: Yukhu phüh abande yukhu yukbah. Tüsho arünü nü ki thabah, “ Yukhu phüh aban ching yukhu yukpü isanü mümükheah de nünü lümla de?” 13Judüki nünü arü ki thabah: Atungpuhnü ha thachoh: Ha lomi ching larü, David kiulongthsübinkiu kheak binrü kiulongthsürübo, amükeamrübo, wukihrübo tüsho Jirusalem ching larü alala inü amüshangshihbah. 14Tüsho inü arü khülangnü khülang, berübuhrü tüsho tsührübo rukhühnü mütrütachihshihbah, Atungpuhnü thachoh. Inü arü thsümünimchoki amuzho yungsho aningshihpü yungsho mihmuzho mülade alabah.
Kükheangkhi azhihde Jeremianü Athakhi
15Aniang tüsho nükhün muphoang; dükükheang,
tümüde Atungpuhnü asukdo.
16 Atungpuh nüsa Thrünpuh kilim apinü amiting mühandarüyide,
tüsho shuhyini ching awungbo kheak nüsa jing mümükheyide müretahshang;
nüsanü ayin kheahchoki,
apinü ju bünangdo kamshihchoh tüsho mükjikhünkhit thsüde mitingshihchoh.
17Tüshe nüsanü manisho,
nüsa kükheangkhi thsungkheak I menü jikde atripbah;
inü düsüknimde atripbah tüsho chikebo bukbah,
tümütüsho Atungpuh namfimihnubo rammüzütdo.
18Kiulongthsüpuh tüsho kiulongthsüberü ki thaang, “Abobe binkiu luang, tümüde nü ku kheaknü akheahakhamkhi kuthran ayokhido.” 19Negeb kiutobo shenü mükhimshuhpü thsüde rihdoa lah; Juda alala ramtso ching lude tsodo, abümnü ramtso ching lude tsodo.
20Nü mük rheakbah sherü dukulimnü arüchonü kheahang. Nü kilim jihkhi akheahakham namfimihnu boto kükheak la? 21Nünü nü müyamrü thsüpü lümkhi nü kurungkheak lachoki nünü tümü thaba? Azoberü thsünükhi nangde, thsününü nü müramloba de? 22Tüsho nü mulong ching, “Tümüde hadürü I kheak arücho?” de thasho, ha nü mülimkhi ato hode nü rungthsün lahkih, tüsho nü thsümünim. 23Ethiopiarünü arü küp müthrikhukba de, yungsho sangtsungbonü arü yak müthrikhukba de? Jushu lang nünü she amütsü rhimode alakhi atsü rhimobah. 24Inü nüsa loshelo ching apungnü hitsüt yünde atsokhi nangde hiumüzütshihbah. 25Ha nü shihcham, inü nü kilim akhukhitkhi shihcham, Atungpuhnü thachoh, “Tümütüsho nünü I mihabah tüsho akeangkeang ching kin. 26Inü nü rungthsün nü miro kheak lahkihbah, tüsho nü achih ngübah. 27Inü nü athraneanbebo, nü müzammüram, shihkünde alankhi awungbo tüsho mükeakbo ching machihde shihyinkhi ngüdo. Nü are, O Jirusalem! Külokhüh nü mümüsühde alaba?”
Currently Selected:
JEREMIA 13: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
