JEREMIA 15
15
Juda Mihtsürü Ashepü-kuhi
1Judüki Atungpuhnü I ki tha: Mosa tüsho Samuel I miki zhipzhip she, I mulong ha mihtsürü kilim murholo. I mikinü arü wukhiukshang, tüsho arübo tsoshang! 2Tüsho küyimki arünü nü ki thaba, “ Isa külim peang yüba?” nünü arü ki thabah: Atungpuhnü ha thachoh:
Sherü arüm-tukthsü akhulanü, arüm-tukthsü lim,
tüsho sherü nukshang akhulanü, nukshang lim;
sherü khümzung lim akhulanü, khümzung lim,
tüsho sherü arampü akhulanü arampü lim.
3Tüsho inü arü kurungkheak thsümünimrü mungji phüyi zojihbah, Atungpuhnü thachoh: alaksahpü nukshang, adütrünpü khihnubo, thüning wuhnubo tüsho alomi shiwühbo amuyupü tüsho athsümünimpü labah. 4Hezekia tsührü Juda kiulongthsüpuh Manasenü Jirusalem ching rhimokhi hode lomi kiulongthsü alala ki inü arübo mihtrebe kamshihbah.
5Shenü nü ki amuzho laba, O Jirusalem,
yungsho shenü nü kheak tüzhojihba?
Shepünü nü tsüde lanah de akeopü rholoba?
6Nünü I bahyukdo, Atungpuhnü thachoh,
nü dunglim peang yüchoh;
jumonü nü azhihde I khah chungkhitkheah tüsho nü thsümünim–
tümütüsho I bukakhiukkhi danlopü keaka lakheah.
7Inü arübo phürünü lomi chipiripitbo ching yüna bahdo;
inü arü tüzhoshihdo,
inü I mihtsürü thsümünimdo;
arünü arü limrobo ching murholo.
8Arü khimoberübo keto loyi kheaknü hihdakde kamdo;
animuro inü athunu mihtsürü berübo azhihde athsümünim handarübah;
zukleangnü inü arü kheak thsünü tüsho atrebe handarübah.
9Alibe shepünü thüne zübekheanü sheabahdo.
Animungnü anihbe ni yüzahbah;
anihbe achih ngübah tüsho wüntre mülade alabah.
Tüsho aningkhi inü arü riri miki nukshang kilim jihbah, Atungpuhnü thachoh.
Jeremianü Atungpuh ki Atsangkhi
10I are aba, nünü I zübea lah, lomi ching mihtsürü ki inü rukachihde tüsho atsangachihde lah. Inü sho tümü müzüng yungsho münip, tütüshe alalanü I athruchoh. 11Atungpuhnü tha: Tsükjide nüsa asheaningrü lung tsüde alabah, tsükjide inü thsümütsü tüsho küpkhuk kim ching nü riribonü nü ki mushushihbah. 12Dukulim yo shotolung ju yinchi khürünü ayihshakkhukba de?
13Nüsa lakhit tüsho nüsa rahpungbo lomi alala ching nüsa münean dün adün müjihde yankhia lushihbah. 14Nüsanü mümükheahkhi lomi ching inü nüsa riri tankihshihbah, tümüde I bukakhiukkhi ching lünnü aniupü thsüde mo khülang takkih-a lah.
15O Atungpuh nünü mükheahlah; I lümkhitang tüsho rhuakheahang, tüsho I thsümüchirü kheak I royimpü hande akijang. Nü arümkheamkhi ching I hande dütsoshih; nü dünkheaknü I mükhemükim ludo de mükheahjang. 16Nü yubo ngüdo, tüsho inü tsüh, tüsho nü yubo I asühkhi kam tüsho I mulong asühkhi kam; tümüde nü mung chingnü I jia lah, O Atungpuh , Wuto Thrünpuh. 17Kithsükilangrü bolung inü mübin, yungsho inü masühachih; nü khah khüp I langzü bin, tümüde nünü I bukakhiuknü mishih. 18Tümüde I thsünükhi mükheam le, I mü müngu le, athsüngupü thsunglocho? Tsükjide, nü a I ki mülapyukkhi keyung nangde, buksapke ngahkhi nangde lah.
19Jumonü Atungpuhnü ha thachoh: Nünü rholosho, inü nü beloa lubah, tüsho nü I miki zhipbah. Shoto küpüanü nünü thasho tüsho müthülünkhi müthasho, nü I yu tharü thsübah. Arünü nü kilim rholode arübah, nünü arü kilim rholode müyü. 20Tüsho harü mihtsürü ki inü nü müwayinchi chipi nangde akamshihbah; arünü nü bede keochihbah tüshe arünü nü mukuk, tümüde nü khümkhitpü tüsho nü bekhitpü I nü lung lah, Atungpuhnü thachoh. 21Inü nü mihbukmuyuk khah chingnü bekhitbah, tüsho mihmukhiuh khah chingnü rhokhitbah.
Currently Selected:
JEREMIA 15: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
