JEREMIA 12
12
Jeremianü Atungpuh ki Keokhikhi
1O Atungpuh küyimki inü nü azhihde athabanü nü alim labah;
tüshe thiyuro dünkheak inü nü ki keokhianü:
Tümüde amütsürü limro müngühmühicho?
Tümüde mihyu manirübo tsüshihcho?
2Nünü arü khimkheah, tüsho arü aying chinyuk;
arü asürü tüsho sangaso aso;
nü a arü münbo thüninde lah
tütüshe arü mulong kheaknü limshulah.
3O Atungpuh , tüshe nünü I mükheahlah;
nünü I ngülah tüsho I rükakia kheahchoh,
I lümkhi nü kilim lah.
Namfimihnu nangde alaksahpü arübo züngkhitang,
tüsho alaksahpü nimung thsungkheaknü bemuwuhang.
4Külokhüh alonü tüzhoba tüsho thulu sangrungbo mukuhba?
Ju ching larü mihbukmuyuk lakhinü shiwüh tüsho wuhnubo shekhamdo,
tümütüsho mihtsürübonü tha,
“ Isanü arhimokhi Thrünpuhnü müngü.”
5Nünü jingnü alihrü lung alihbah keaksho,
küde thsah nünü khorabo lung azhihba?
Tüsho müsürikhi mükeak ching nü angaksho,
Jordan mütüm ching nünü küde athsüpü?
6Tümüde nü keoniorü tüsho nü yamkhünnü she nü kheak mihyu manide rhimodo;
arünü nü azhihde azhikhi lah;
arünü nü ki müyamrü yu thatha she arü kheak akin düla.
Atungpuh Mulong Rozhakkhi
7Inü I yam mihabahdo,
inü I yamrüplurüp bahyukdo;
inü I menü amuzhokhi anihbe riri khah ching jihdo.
8I yamrüplurüp I ki murung ching kekhüzü nangde kamabahdo;
anihbenü I azhihde anihbe düsheak shuhkihdo
jumonü inü anihbe thraneankheah.
9I yamrüplurüp ju I ki shihtsüh wuhnubonü zündokhi wuhnubo ruk yung de?
yüang, mütüm shiwüh alala kitmukhungang;
tsühabahshihpü arü bedarang.
10Namfimihnu neakrü ahihdonü I yo kurungasolu thsümünimdo,
arünü I shihcham junakdo,
arünü inü asühkhi shihcham azhikkhi sunglo kamshihdo.
11Arünü ju abahkhi lo kamshih;
azhikmonü, I mitripchoh.
Alomi alala loshelo kamdo tüshe shenü müküm.
12Loshelo ching awung achangbo alala kheak athsümünimrü arüdo;
tümüde Atungpuh nukshangnü alomi akheamnü thripkhüh khiungde muyuchoh;
sheshe akhimahe ching müla.
13Arünü wheat hi yang tüshe ayangbo yimludo,
arü keakzungdo tüshe tümü alü müla.
Atungpuh bukakhiukkhi hode arü yimlukhi ching arü achihbah.
Israelrü Phünirü ki Atungpuhnü Alokhikhi
14 Atungpuhnü ha thachoh: Inü I mihtsürü Israel kilim jihkhi yamrüplurüp jangkhirü I phünirü mihbukmuyuk alala inü arü lomi chingnü arukkhitbah tüsho arü bolungnü inü Judarü khümkhitbah. 15Tüsho inü arü rukkhita bahshu kheaküshe inü arü ki mihmuzho labah, tüsho arü mihbüm abande arü lo tüsho arü yamrüplurüp lim belodarübah. 16Tüsho arünü I mihtsürü limrobo düshihde amükheahbah, I mung tamde thiyuchihchimbah, “Atungpuh lale,” arünü khülang ki Baal tamde thiyuchihchimpü I mihtsürü ki thsangyua lalashe, arübo I mihtsürü bolung laabahbah. 17Tüshe trükshih khürünü manisho, inü shahde arukkhitbah, tüsho athsümünimbah, Atungpuhnü thachoh.
Currently Selected:
JEREMIA 12: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
