MAHKHAPRÜ 9
9
Abimelek
1Kheakü Jerubbaal tsührü Abimelek ju abe keoniorü kilim yü tüsho abe guk yamkhün alala ki tha, 2“Shekem mihtsürü alala ki keoang, ‘ Jerubbaal tsührü 70 alalanü nüsa kurungkheak yakzan shuhshihnela shi, dashi khülangnü lang nüsa kurungkheak yakzan shuhshihnela?’ Kheaküshe I nüsa shih tüsho thiyih de lümkhitang.” 3Tüsho abe keoniorübonü harü yubo alala Shekem mihtsürübonü sode api dünkheaknü tha; tüsho Abimelek yanpü arü mulong pungkhi, tümüde arünü tha, “ Api isa keoniorü ah.” 4Arünü api kilim Baal-berith arüngyam chingnü shotoyinchi 70 jih, junü Abimeleknü api jingyanrü thsüshihpü mudukmükerübo muloa lu. 5Tüsho apinü Ophra ching abuh yam ching yü, tüsho Jerubbaal tsührü 70 api keoniorübo ju lung khülang kheaknü laksah; tüshe Jerubbaal tsührü akheambuh Jotham aning, tümüde apinü jikabah. 6Shekem mihtsürübo tüsho Beth-millo alala mukhungde arü, tüsho arünü Shekem ching thülamdung kinü Abimelek ju kiulongthsüpuh kamshih.
7Küyimki ha Jotham ki thakhea, apinü yübah Gerizim wung kheak zhip, tüsho achangnü zhide arü ki tha, “I ki aniang, nüsa Shekem mihtsürübo, junangde Thrünpuhnü nüsa ki anibah. 8Kim khülang ching sangdungbonü arü kurungkheak kiulongthsürü mujude-mokhitpü yü; tüsho arünü oliv sangdung ki tha, ‘Isa kurungkheak kiulongthsüang.’ 9Tüshe oliv sangdungnü arü ki tha, ‘Inü thrünpuhbo tüsho mihtsürübo wüntreshihkhi amüdang bahbah sangdungbo kurungkheak yakzan shuhpü yüba shi?’ 10Tüsho sangdungbonü khubasodung ki tha, ‘Nü arang, tüsho isa kurungkheak kiulongthsüang.’ 11Tüshe khubasodungnü arü ki tha, ‘Inü aniung tüsho sangaso atsü bahbah sangdungbo kurungkheak yakzan shuhpü yüba shi?’ 12Tüsho sangdungbonü kurungasoliu ki tha, ‘Nü arang, tüsho isa kurungkheak kiulongthsüang.’ 13Tüshe kurungasoliunü arü ki tha, ‘ Thrünpuhbo tüsho mihtsürübo asühshihkhi I yukhu bahbah inü sangdungbo kurungkheak yakzan shuhpü yüba shi?’ 14Judüki sangdungbo alalanü ayangrung ki tha, ‘Nü arang, tüsho isa kurungkheak kiulongthsüang.’ 15Tüsho ayangrungnü sangdungbo ki tha, ‘Nüsanü atsütsünü I nüsa kurungkheak kiulongthsürü thsüshihbasho, arübah I khüp alamang; jude yungsho, I yang khahbo chingnü mo akhiukbah tüsho Lebanon cedarbo aniubah.’
16“Kheakü jumonü, nüsanü thiyuronü tüsho kurhangde Abimelek kiulongthsürü kamshihdüsho, tüsho api thülünkhinü Jerubbaal tüsho ayamkhün kheak tsüde rhimodüsho– 17tümüde I buhnü nüsa thsungkheak keochihdo, tüsho api rhangdung jih, tüsho Midiarü khah chingnü nüsa bekhit; 18tüshe nüsanü khihni I buh yamkhün azhihde wusudo, tüsho atsührü 70 lung khülang kheaknü laksah, tüsho api yamlaberü tsührü Abimelek, api nüsa akeoniorü thsümonü Shekem mihtsürübo kurungkheak kiulongthsürü kamshih– 19jumonü nüsanü khihni Jerubbaal tüsho api yamkhün kheak thiyuro tüsho wüntre lade rhimoa lasho, Abimelek lung asühang shi, tüsho Abimeleknü she nüsa asühachihshang shi; 20tüshe jude yungsho, Abimelek kheaknü mo akhiukshang tüsho Shekem le Bethmillo mihtsürübo aniuabahshang; tüsho Shekem le Beth-millo mihtsürü kheaknü mo akhiukshang tüsho Abimelek aniuabahshang.” 21Tüsho Jothamnü akeoniorü Abimelek tremonü tsode yünü Beer ching la.
22Abimeleknü Israel kurungkheak kam mahsam kiulongthsü. 23Tüsho Thrünpuhnü Abimelek le Shekem mihtsürübo dükeak amütsü me khülang yüshih; tüsho Shekem mihtsürübonü Abimelek kheak mülapyukde rhimo; 24hanangde Abimelek tüsho api tuthsuka Gideon tsührü 70 laksahshihkhi Shekem mihtsürübo kheak royimpü lakheah. 25Tüsho Shekem mihtsürübonü api azhihde awung mujuk kheak mihtsürübo jimde binshihbah limro ching hantsahrü alala kheak jangkhijangra; tüsho ju Abimelek ki tha.
26Ebed tsührü Gaalnü akeoniorübo bebah Shekem ching yü; tüsho Shekem mihtsürübonü api kheak mulonglam la. 27Tüsho arünü thulu ching yübah kurungasolubo chingnü kurungasobo rho tüsho yukhu thsübah thünio la, tüsho arü thrünpuh yam ching yüzahbah tsühyungde Abimelek athruaji. 28Ebed tsührü Gaalnü tha, “ Abimelek ju she a tüsho isanü api tankihpü thsüde isa Shekemrü she a? Jerubbaal tsührü tüsho api yo atorü Zebulnü Shekem abuh Hamor mihtsürü tankihkhi yung de? Dale küde thsah isanü api tankihpü? 29Ha mihtsürübo I khah ching lakhülaa inü Abimelek yankhita bahbah. Inü api ki thabah, ‘Nü yo bonungrü hihde kambah akhiukang.’ ”
30Küyimki kiuto yakzanshuhrü Zebulnü Ebed tsührü Gaal yubo sokhea, api bukakhiuk. 31Tüsho apinü Aruma ching Abimelek kilim yunithsürü thiyia yüshih, “ Kheahang, Ebed tsührü Gaal tüsho api keoniorübo Shekem ching arüa lah, tüsho nü azhihde arünü kiuto neamneamjihchoh. 32Kheakü jumonü, nü lung nü mihtsürübo azhing ching yüang tüsho thulu ching jika aleangde binang. 33Jushu yapsu, ani akhiuk akede, nahde asürang tüsho kiuto lim nanachihang; tüsho küyimki api le api lung bekhi mihtsürübo nü azhihde akhiukbanü, nüsanü akukkhi thülün arü kheak rhimoang.”
34Tüsho Abimelek le api lung mihtsürübo alala azhing chingnü asürü tüsho khunung phüyi thsübah Shekem azhihde aleangde bin. 35Küyimki Ebed tsührü Gaal wukhiukbah kiuto chipiripit limro zhipkhea, Abimelek tüsho mihtsürübo aleangde abinkhi chingnü jukmusu. 36Tüsho küyimki Gaalnü mihtsürübo ngükhea, apinü Zebul ki tha, “ Kheahang mihtsürübo awung mujukbo chingnü akichoh!” Tüshe Zebulnü api ki tha, “Nünü awung mebo ju mihtsürübo ah müdam ngüchoh.” 37Jumonü Gaalnü alode tha, “ Kheahang, mihtsürübo lomi phulungnü akichoh, tüsho püpü khunung Müchitrü thülamdung limnü arüchoh.” 38Judüki Zebulnü api ki tha, “ Atsütsü nü yu tode athakhi küching la, ‘Isanü api tankihpü thsüde Abimelek ju shepü a?’ Harü mihtsürü ha nünü ajunokhi yung de? Nünü lümsho wukhiukang, tüsho kheakü arü bede keochihang.” 39Jumonü Gaalnü Shekem mihtsürübo bebah wukhiuk tüsho Abimelek bede keochih. 40Tüsho Abimeleknü api yande müsham, tüsho anihbuh kheaknü api alihde tso; mihtsürü ahihdo kiuto ching yüzah limro khiungde yuria yap. 41Judüki Abimelek ju Aruma ching la tüsho Zebulnü Gaal le api keoniorübo Shekem ching mülapü thsüde yankhitabah.
42Ashidopü Shekem mihtsürübo thulubo ching wukhiuk, tüsho ju Abimelek ki thiyusheak jih. 43Jumonü apinü api mihtsürübo bea lubah khunung mahsam thsüde cham tüsho thulubo ching jimde binshih. Küyimki mihtsürübo kiuto chingnü akhiukkhi ngükhea, apinü arü yanpü jukmusu. 44Judüki Abimelek tüsho api lung khunung khülang nanachihde khuhto ching yü tüsho kiuto chipiripit yüzah limro kheak zhip; tüsho khunung mahnenü thulubo ching larü alala kilim nanachihde yü tüsho arübo laksah. 45Jumonü Abimeleknü ju nimung amuyung kiuto bede keochih; apinü kiuto ju lu tüsho ju ching lakhi mihtsürübo laksah; tüsho apinü kiuto thsümünim tüsho thimi suka zojih.
46Kheakü küyimki Shekem aheangsadam mihtsürübonü ju sokhea, Berith thrünpuh arüngyam chipi ching yüzahabah. 47Tüsho Shekem aheangsadam mihtsürübo alala rukhüh mukhunga lah de Abimelek ki tha. 48Judüki Abimelek tüsho api lung mihtsürübo alala Zalmon Müzüng lim wutu. Tüsho Abimeleknü awü khülang akhah ching thrüa lubah sangdungbo chingnü akhah khülang ngamkhi, tüsho ju lua adubuh kheak yihkih; judüki apinü api lung larü ki tha, “Inü tümü thsüde nüsanü ngüdünü, niokheamang tüsho I ruk rhimoang.” 49Jumonü mihtsürü abannü sangkhah ngamkhia lu tüsho Abimelek yande yübah chipi kheak rhungkih, tüsho arü kumung mo thsahkih junangde Shekem aheangsadam mihtsürü athrürü tüsho aliberü 1000 bande sheabah.
50Judüki Abimeleknü Thebez lim yü tüsho ju zündobah yankhia lu. 51Tüshe kiuto ching aheangsadam amüküp khülang lakheah tüsho kiuto mihtsürü athrürü tüsho aliberü alala alihde yübah rihdoloabah; jushu arünü aheangsadam mujuk kheak yükih. 52Jumonü Abimeleknü aheangsadam khiungde yübah keochih; tüsho apinü monü atakpü aheangsadam ripit ki yü. 53Tüshe azoberü khürünü thsam khülang Abimelek ku kheak lah-a akishih tüsho akuro kingrüp. 54Judüki apinü nahde api thsühnuk hanrü athrününgtsüng mihtsürü ki tha, “Nü nukshang dukkhitang tüsho I laksahang, jude yungsho mihtsürübonü athabah, ‘ Azoberü khülangnü api laksah-a lah.’” Jumonü api yo athrününgtsüngbuhnü api chinkhitde düchip tüsho sheabah. 55Tüsho küyimki Israel mihtsürübonü Abimelek shea ngükhea, mihtsürü abannü müzütde nihbuh lapung ching yü. 56Hanangde Abimeleknü mihbukmuyuk rhimokhi, api keoniorü 70 laksahde abuh azhihde arhimokhi Thrünpuhnü jihlo. 57Tüsho Thrünpuhnü Shekem mihtsürü amütsü-rhimo alala arü ku kheak jihlo, tüsho Jerubbaal tsührü Jotham muthrumünean arü kheak arü.
Currently Selected:
MAHKHAPRÜ 9: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
