MAHKHAPRÜ 10
10
Tola
1Abimelek dunglim Israel khümkhitpü Issakar mihtsürü Dodo tsührü Pua tsührü Tola asürü; tüsho api Ephraim wungbo, Shamir ching lakheah. 2Apinü Israel kam mukukheak mahsam mahkhap; api sheabah tüsho Shamir ching kiuyukabah.
Jair
3Api dunglim Gileadrü Jair asürü; tüsho apinü Israel kam mukukheak mahne mahkhap. 4Kheakü api tsührü donki samrü kheak binrü samrü lakheah; arü kiuto samrü, “ Havoth Jair” de khihni khiungde ajihkhi, Gilead lo ching lakheah. 5Jair she tüsho Kamon ching kiuyukabah.
Jephtha
6Judüki Israelrünü kheaküshe Atungpuh miki amütsü rhimo, tüsho Baalbo, Astarbo, Siria thrünpuhbo, Sidon thrünpuhbo, Moab thrünpuhbo, Amon thrünpuhbo tüsho Filistia thrünpuhbo tankih; arünü Atungpuh bahyuk tüsho api mütankih. 7Jumonü Israel azhihde Atungpuh bukakhiuk; tüsho apinü arübo Filistia le Amon mihtsürü khah ching yinabah. 8Ju kam ching arünü Israelrü alala Gilead ching lakhi, Amorrü lomi ching Jordan thripkhüh lakhi kam thürükheak tizheah thsümüchi tüsho juno. 9Kheaküshe Amon mihtsürünü Juda, Benjamin tüsho Ephraim yamkhün bede keochihpü Jordan hode arü, junangde Israel khitode lümthsünüde alakheah.
10Tüsho Israelrünü Atungpuh ki zhide tha, “Isanü nü azhihde neak yihbeakdo, tümütüsho isanü isa Thrünpuh bahyuk tüsho Baalbo tankih!” 11Jumonü Atungpuhnü Israelrü ki tha, “Inü nüsa Ijiprü, Amorrü, Amonrü tüsho Filistiarü kheaknü abekhitkhi yung de? 12Kheaküshe Sidonrü, Amalekrü, tüsho Maonrünü nüsa juno; nüsanü I ki zhi tüsho inü arü khah chingnü nüsa bekhit. 13Tütüshe nüsanü I bahyuk tüsho püpürü thrünpuhbo tankih. Jumonü kheaküa inü nüsa mübekhit. 14Nüsanü amokhitkhi thrünpuhbo ki yübah zhiang; nüsa lümthsünü kim ching arünü nüsa bekhitshang.” 15Judüki Israelrünü Atungpuh ki tha, “Isanü neak yihbeakdo! Nünü atsükhi isa kheak rhimoang; khihni isa lang bekhitang, isanü tamkhüntamnüchoh.” 16Jumonü arünü khiungkerü thrünpuhbo arü bolungnü yihkhita bah tüsho A TUN GPU H tankih. Tüsho Israel thsünükhi apinü küruhkhüh marümkheamde alakheah.
17Judüki Amon mihtsürübo rukhüh mukhungde Gilead ching arü. Tüsho Israelrünü Mizpa ching mukhung. 18Tüsho mihtsürübo, Gilead limberübonü khülangnü khülang ki thaachih, “ Amon mihtsürü bede keochihpü shepü mihtsürünü atankihba? Api Gilead ching larü alala kurungkheak aku labah.”
Currently Selected:
MAHKHAPRÜ 10: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
