MAHKHAPRÜ 8
8
Akheamde Midiarü Kukkhi
1Tüsho Ephraim mihtsürübonü api ki tha, “ Tümü thsükhi nü Midiarü bede keochihpü yüchoki isa müjide isa kheak hade arhimokhea?” Tüsho arünü thsokihde api müneah. 2Jumonü apinü arü ki tha, “Inü nüsa kheak akede tümü rhimoa la? Ephraimnü kurungaso müdre mokhi ju Abiezernü kurungaso yimlukhi kheaknü atsübe yung de? 3Thrünpuhnü Midia limberübo, Oreb tüsho Zeeb nüsa khah ching jihdo; inü nüsa kheak akede tümü rhimokhuka la?” Apinü ha thachoki anihbuh azhihde arü bukakhiukkhi keamlo.
4Tüsho Gideon le api lung mihtsürü 300 keaka lalashe müshamde Jordan ching arü tüsho hode yü. 5Jumonü apinü Sukkoth mihtsürübo ki tha, “ Muzhobah I lung arürü kilim yikhap jihang, tümüde arü keaka lah, tüsho I Midia kiulongthsürü Zeba tüsho Zalmunna müshamchoh.” 6Tüsho Sukkoth limberübonü tha, “Zeba le Zalmunna lah de isanü nü yo bonungrü kilim yikhap jihpü?” 7Jumonü Gideonnü tha, “ Ha dünkheaknü, küyimki Atungpuhnü Zeba tüsho Zalmunna I khah ching jihbanü, sunglo yangbo tüsho khingphubonü nüsa shihtsü wuhkhitbah!” 8Tüsho ju chingnü api Penuel ching wutu tüsho ju ruk lang arü ki tha; tüsho Sukkoth mihtsürübonü alokhi nangde Penuel mihtsürübonü api ki alo. 9Tüsho apinü Penuel mihtsürübo ki tha, “ Küyimki I akuk ngübah arübanü, inü ha aheangsadam lukkheambah.”
10Kheakü Zeba tüsho Zalmunna, aniakhiuklim bonungrü aningkhi alala, mihtsürü 15,000 bande bebah Karkor ching lakheah; tümüde bonungrü 120,000 laksahdo. 11Gideonnü Noba tüsho Jogbeha aniakhiuklim loshelo limronü wutu, tüsho bonungrü zündo; tümüde aheangrü mülade alakheah. 12Tüsho Zeba le Zalmunna büne shande tso; apinü Midia kiulongthsürü mahne Zeba tüsho Zalmunna yande müshambah lu, tüsho apinü bonungrü alala tsomüzütshih.
13Judüki Joash tsührü Gideonnü thirithsü chingnü rholobah Heres limronü arü. 14Tüsho apinü Sukkoth athrününgtsüng khülang tholobah api ki keokhi; tüsho apinü anihbuh kilim Sukkoth atorübo le azothsürübo mihtsürü 77 thrüta jih. 15Apinü Sukkoth mihtsürübo kilim arü tüsho tha, “ Kheahang Zeba tüsho Zalmunna, sherü dünkheak nüsanü I münejihde tha, ‘Zeba tüsho Zalmunna nü khah ching lah de isanü nü mihtsürü keaka larü kilim yikhap jihpü?’” 16Apinü kiuto azothsürübo bea lu tüsho sunglo ayang tüsho khingphubonü Sukkoth mihtsürü ki amütsan thsangyu. 17Tüsho apinü Penuel aheangsadam lukkheam tüsho kiuto mihtsürübo laksah.
18Judüki apinü Zeba tüsho Zalmunna ki tha, “Nüsanü Tabor ching laksahkhi mihtsürübo küruk a?” Anenü alo, “ Arübo nü ruk lakheah; arübo kiulongthsürü tsührübo kiphahde alakheah.” 19Tüsho apinü tha, “ Arübo I be tsührü I keoniorü ah; Atungpuh lale, nünü arü rhangdung khümkhita lashihkhülaa, inü nüke mülaksah.” 20Apinü atsührü adüjibuh Jether ki tha, “Wusuang, tüsho ane laksahang.” Tüshe Jethernü anukshang mudukkhit, tümütüsho api azürü thsükhinü trede alakheah. 21Judüki Zeba tüsho Zalmunnanü tha, “ Arang, nünü ike laksahang; tümüde athrürü khülangnü nihbuh rhimo rhimochoh.” Jumonü Gideonnü wusu tüsho Zeba le Zalmunna büne laksah; tüsho apinü ane yo kemel hung kheaknü zülubo lu.
22Israel mihtsürübonü Gideon ki tha, “Nü le nü tsührü tüsho nü tsührü-tsührünü she isa kurungkheak yakzan shuhang; tümüde nünü isa Midiarü khah chingnü bekhitdo.” 23Gideonnü arü ki tha, “I tüsho I tsührünü nüsa kurungkheak yakzan mushuh; Atungpuhnü nüsa kurungkheak yakzan shuhbah.” 24Tüsho Gideonnü arü ki tha, “Inü nüsa ki khülang mushuanü; nüsanü ayankhikhi shihcham chingnü I kilim mihbüm abannü suna nüpü jihang.” (Arübo suna nüpübo lakheah, tümütüsho arübo Ishmaelrü lakheah.) 25Tüsho arünü alo, “Isanü künsahde jurübo jihbah.” Arünü khim khima zo, tüsho mihtsürü abannü arünü ayankhikhi nüpübo ju ching yuk. 26Gideonnü aleangkhikhi suna nüpübo ju khahngak 20 bande alakheah, tüsho ha ching zülubo, lakbo, Midia kiulongthsürübonü ayihkhi mürümmuchu khimbo, tüsho arü kemelbo hung kheak mükamkhi lakbo mübe. 27Gideonnü sunanü sangthsü khülang thsüa api lapung kiuto, Ophra ching zo. Israel alalanü Thrünpuh bahyuk tüsho yübah sangthsü kingaün. Gideon tüsho api yamkhün thsungkheaknü ju qimürip kamabah.
28Hanangde Midiarü ju Israelrü miki junoa lakheah, tüsho arü ku mudukolokhuk. Gideon nimungbo ching kam yirü lomi ching mungtsü lakheah.
Gideon Shekhi
29Judüki Joash tsührü Jerubbaal yübah nihbuh yam ching la. 30Gideon tsührü athrürü 70 lakheah, tümüde api niuberü ahihdo lakheah. 31Tüsho api hanniube Shekem ching labenü she api kilim tsührü 1 zübejih, amung Abimelek lakheah.
32Kheakü Joash tsührü Gideon zobanbah she, tüsho Abiezerrü kiuto Ophra ching, abuh Joash kiuyuk ching bah. 33Tüsho Gideon she yanalünde Israelrünü Baalbo kingaün, tüsho Baal-berith ju arü thrünpuh kamshih. 34Junangde Israelrünü amühi aban arü riri khah chingnü arü bekhitbuh arü Thrünpuh, Atungpuh mülümkhit; 35tüsho apinü Israel thsungkheak atsü rhimokhi yande arünü Jerubbaal (ju Gideon) yamkhün kheak amuzho muhuh.
Currently Selected:
MAHKHAPRÜ 8: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
