MAHKHAPRÜ 7
7
Gideonnü Midiarü Kukkhi
1Judüki Jerubbaal (ju Gideon) tüsho api lung lakhi mihtsürü alala mükikde asürü tüsho Harod kenü ki binkheam. Midiarü binkheampung ju dukulim jindükhün ching More wung phünide alakheah.
2 Atungpuhnü Gideon ki tha, “I thsungkheaknü Midiarü arü khah ching jihpü thsüde nü mihtsürü khide hihlah. Junangde anihbe sühmühnü api khümkhitkheah de Israelnü I azhihde mükükheang, 3kheakü mihtsürübo ki zhia mükheahshang, ‘ Khürü trede ajansho rholode Gilead wung bahbah tsoang.’” Jumonü mihtsürü 22,000 alode tsobah 10,000 aninglo.
4Tüshe Atungpuhnü Gideon ki tha, “ Kheaküshe mihtsürü khide hihlah. Arübo ke ching bede yükiang, tüsho inü nü thsungkheaknü ju ching arü rükakheahbah. ‘ Ha nü lung yübah,’ de inü thasho, api ayübah; tüshe ‘ Ha nü lung müyü,’ de inü thasho, api müyü.” 5Jumonü apinü mihtsürübo ke ching bede yüki. Tüsho Atungpuhnü Gideon ki tha, “ Mukhuknü khukningbah khihnu ruk mulonü ke müleaka yungrü büthsüang.” 6Mihtsürü 300nü arü khahnü khipa mün ching yuk. Aningkhi alalanü ayungpü khukning. 7Atungpuhnü Gideon ki tha, “ Khahnü khipa yungrü mihtsürü 300 hode inü nü khümkhitbah tüsho nü khah ching Midiarü jihbah. Mihtsürü püpürü alala nihbuh lapung lim tsoshang.” 8Jumonü Gideonnü aningkhi Israelrü nihbuh khimyambo ching thiyia yüshih, tüshe ahiuhakhiprü tüsho hulipungpung shuhrü 300 zolo; tüsho Midiarü binkheampung ju abolim jindükhün ching lakheah.
9Ju tsüngre Atungpuhnü api ki tha, “ Asürang, binkheampung azhihde yükiang; tümüde inü ju nü khah ching jihdo. 10Tüshe nünü ayükipü tresho, nü yamlabuh Pura bebah yükiang; 11tüsho arünü tümü thabanü nünü asobah, tüsho ju dunglim binkheampung azhihde yükipü nü khahbo düküngbah.” Jumonü apinü ayamlabuh Pura ane binkheampung ching lakhi bonungrü mühümpung ching yü. 12Tüsho Midiarü le Amalekrü tüsho aniakhiuklim mihtsürü alala tangkhobo nangde hihdakde jindükhün ching bin; arü kemelbo ju keyean loyi nangde mükhebinbe lakheah. 13Küyimki Gideon arükhea, mihtsürü khülangnü amüyamrü ki milim khülang kheande alakheah, “ Kheahang, inü milim khülang mido; barli yikhap ju Midiarü binkheampung ching lungde yüzah, tüsho khimyam kheak yükihbah ju kheak kinga lungshih tüsho keama chitphülapa yap.” 14Tüsho amüyambuhnü alo, “ Ha Joash tsührü, Israel mihtsürü Gideon nukshang labah; Thrünpuhnü api khah ching Midiarü tüsho bonungrü alala jihdo.”
15Küyimki Gideonnü milim kheankhi tüsho thanakkhi sokhea, apinü kingaün; tüsho apinü Israel binkheampung ching rholode yü, tüsho tha, “ Asürang; tümüde Atungpuhnü Midia bonungrü nüsa khah ching jihdo.” 16Tüsho apinü mihtsürü 300 ju khunung mahsam thsüde chamjih tüsho arü khah ching hulipungpung le pangjiphüh akeangkeangbo ching tsünthsahbebo zahde yukjih. 17Tüsho apinü arü ki tha, “I kilim kheahang, tüsho junangde thsü; küyimki I binkheampung ki arübanü inü athsükhi ruk thsang. 18Küyimki I tüsho I lung lakhi alalanü hulipungpung mütbanü, binkheampung thrip aban chingnü mütang, tüsho ahoang, ‘Atungpuh thsungkheak tüsho Gideon thsungkheak.’ ”
19Jumonü Gideon tüsho api lung mihtsürü 100 ju arü aheangrü müthriachih yanalünde, tsüngphulung müngüh binkheampung khiungde arü. Arünü hulipungpungbo müt tüsho arü khah ching shuhkhi pangjiphühbo yihrüp. 20Judüki khunung mahsamnü hulipungpung müt tüsho pangjiphüh ju yihrüp. Arü khah huzulimnü tsünthsahbe shuh tüsho tsülimnü hulipungpung shuhbah arünü aho, “Atungpuh tüsho Gideon thsungkheak nukshang!” 21Mihtsürü abannü binkheampung alala mükamde nihbuh dangpung ching zhipchoki, Midiarü alala khungde alihde tso. 22Küyimki 300nü hulipungpung mütkhea, Atungpuhnü mihtsürübo nukshang ju nihbuh müyamrü kheak dünkihachihshih. Arünü Tabbath phüni Abel kiuto Mehola khiungde, Beth-shitta khiungde Zarethan lim alihde tso. 23Tüsho Israel mihtsürü Naphtali, Asher, tüsho Manase alala chingnü trüngmukhung tüsho Midiarü yande müsham.
24Judüki Gideonnü Ephraim awung lomi alala ching yunithsürü thiyia yüshih, “ Midiarü azhihde akiang tüsho Beth-bara le Jordan kebo khiungde kapdoang.” Jumonü Ephraim mihtsürü alala jikhit, tüsho Beth-bara le Jordan khiungde kebo kapdo. 25Tüsho arünü Midia limberü mahne Oreb tüsho Zeeb lu; arünü Midiarü yanchoki, Oreb lungto kheaknü Oreb laksah, tüsho Zeeb yukhu-nitpung kheaknü Zeeb laksah; tüsho arünü Oreb le Zeeb kubo Jordan hode Gideon kilim lubah arü.
Currently Selected:
MAHKHAPRÜ 7: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
