MAHKHAPRÜ 4
4
Debora tüsho Barak
1Ehud she dunglim Israel mihtsürübonü Atungpuh miki amütsü rhimolo. 2Jumonü Atungpuhnü arübo Hazor ching yakzanshuhbuh Kanan kiulongthsüpuh Jabin khah ching jih. Tüsho api bonungrü abebuh ju Harosheth Hagoyim ching lakhi Sisera lakheah. 3Tüsho Israelrünü Atungpuh ki zhi; tümüde Jabin a yinchi khoralolungbe 900 lakheah, tüsho apinü Israelrü kam muku juno.
4Ju kim ching Lapidoth niube wukihrü Debora ju Israel mahkhapde alakheah. 5Anihbenü Ephraim müzüng lomi ching Rama tüsho Bethel dükeak Debora ashidung bukkhüp binde alakheah, tüsho Israelrünü mahkhappü thsungkheak anihbe kilim arü. 6Alibenü Naphtali ching lakhi Kadesh ching Abinoam tsührü Barak kilim yüshihde tha, “Atungpuh Israel Thrünpuhnü nü ki thiyukhüm jihchoh: Yüang tüsho Naphtali le Zebulun mihtsürü 10,000 bebah Tabor wung lim yüang. 7Inü Jabin bonungrü abebuh Sisera api khora-lolungbebo tüsho bonungrübo Kishon yung ching münitde azahbah; tüsho inü api nü khah ching jihbah.”
8Tüsho Baraknü alibe ki tha, “Nünü I lung yüsho I ayübah, tüshe nü I lung müyüsho I müyü.” 9Jumonü anihbenü tha, “ Tsükjide I nü lung yübah; tüshe nü yüpü lakhi ching nü müretah müla, tümüde Atungpuhnü Sisera ju alibe kilim jihbah. Jumonü Deboranü Barak lung Kadesh ching yü.” 10Tüsho Baraknü Zebulun tüsho Naphtali ju Kadesh ching ji; tüsho mihtsürü 10,000 api lung yü; tüsho Debora api lung yü.
11Kheakü Mosa akü Hobab tsühsoniuso Kenrü Hebernü anihbuh Kenrü kheaknü chamkhi tüsho Kadesh yean Zaanaim ching thülamsang phünide api khimyam thsü. 12Tüsho Abinoam tsührü Barak ju Tabor wung ching wutudo de arünü Sisera ki thiyusheak jih. 13Jumonü Siseranü api yo yinchi khoralolungbe 900 tüsho api lung Harosheth Hagoyim khiungde alarübo jimukhung.
14Judüki Deboranü Barak ki tha, “ Asürang, tümüde khihni Atungpuhnü Sisera nü khah ching jihdo. Atungpuh nü müngüh müyü de?” Jumonü Baraknü mihtsürü 10,000 api lung yande Tabor müzüng kheaknü aki. 15Atungpuhnü Sisera le api khora-lolungbe tüsho bonungrübo alala nukshangnü Barak müngüh laksahkham, tüsho Sisera ju api khora-lolungbe kheaknü akibah ajingnü alihde tso. 16Tüshe Baraknü khora-lolungbebo le bonungrü Harosheth Hagoyim khiungde müshamde yü, tüsho Sisera bonungrübo alala nukshangnü keamshih; mihtsürü khülang she maning.
17Tüshe Sisera ju ajingnü tsokhitde Kenrü Heber yamkhünbe Jael yam ching yü; tümüde Hazor kiulongthsüpuh Jabin tüsho Kenrü Heber dükeak mungtsü lakheah. 18Jaelnü Sisera shorupü wukhiuk tüsho api ki tha, “I tungpuh arang, azahang; tümü dütre.” Jumonü apinü anihbe yam ching yüzah, tüsho alibenü phuyap-khimnü api muhiudojih. 19Apinü alibe ki tha, “I kethürilah jumonü muzhobah I ke duhang.” Anihbenü niuhke keluh khimshuhbah ayungbe duh tüsho muhiudoa zo. 20Apinü alibe ki tha, “ Thüyam khimdopü ki zhipang tüsho khürünü arübah ha ching khürükhüh la shi de keosho müla de thaang.” 21Judüki Heber niube Jaelnü müzam khülang lu tüsho yümlung khülang akhah ching shuh, tüsho mükhihde yübah müzam ju amüchip chingnü kheana alo khiungde yüzahshih; tümütüsho api akeakkhinü nahde yapshea lakheah. Jumonü api sheabah. 22Baraknü Sisera müshamde arü, tüsho Jaelnü api shorupü wukhiuk, tüsho api ki tha, “ Arang, nünü shepü mihtsürü yimchonü inü ahuhbah.” Jumonü apinü alibe yam ching yüzah tüsho Sisera amüchip ching müzam müjipbah shea yapde lakheah.
23Jumonü ju nimung Thrünpuhnü Kanan kiulongthsüpuh Jabin ju Israelrü miki khenoabahjih. 24Tüsho arünü Kanan kiulongthsüpuh ju müdükheakshihyi khiungde Israel mihtsürübo khah Jabin kiulongthsüpuh azhihde amüküpbe amüküpbe kam.
Currently Selected:
MAHKHAPRÜ 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.