MAHKHAPRÜ 5
5
Debora Khün
1Ju nimung Debora tüsho Abinoam tsührü Barak anenü ha khün thsü: @SP ACE =
2Israel ching limberübonü abekhinü,
mihtsürübonü mulongsahde nihbuh jih,
Atungpuh shiang!
3Soang, O kiulongthsürübo;
aniang, O yakzanshuhrübo;
inü Atungpuh ki khün thsübah,
inü Atungpuh , Israel Thrünpuh kilim khün düsheak thsübah.
4O Atungpuh , nü küyimki Seir chingnü wukhiukkhea,
nü küyimki Edom lo chingnü atsahkhitkhea,
alomi ajan, thüningbonü bukkhi, amobonü ke bukkhi. @SP ACE =
5 Atungpuh miki müzüngbo ajan,
ju Sinai, Atungpuh Israel Thrünpuh miki.
6Anath tsührü, Shamgar nimungbo ching limtobo ching mütsahdebah
tüsho hantsahrübonü limkeanganubo chingnü tsah.
7Israel kiutobo bahyuka lado,
I Debora; I Israel berü nangde marüyi khiungde arü akeangkeang lakheah,
8küyimki thrünpuhbo aso mokhitkhea,
ripitbo ki thirithsü arü,
tüsho Israel ching chithürü yirü bolung tsung yungsho thsüh khülang she müngü.
9I mulong ju mihtsürü bolung shuhmülanga jihrü Israel yakzanshuhrü lung lah.
Atungpuh shiang!
10Ha thaang, nüsa sherü donki amüyebo kheak binla,
nüsa sherü alarü pheak kheak binla tüsho nüsa sherü limro ching tsahcho.
11Aniang! kekhipbo mühide alanaji botonü,
Israel mihtsürü akuk ngükhi,
Atungpuh akuk ngükhibo thachoh! @SP ACE =
Judüki Atungpuh mihtsürübonü kiuto chipi lim yüki.
12Wusuang, wusuang, Debora!
Wusuang, wusuang, khün thsang!
Asürang Barak, nü yo aramrübo bede tsoang,
O Abinoam tsührü.
13Judüki aninga larü arü limberübo azhihde aki;
wuto azhihde Atungpuh I thsungkheaknü aki.
14Amalek ching aying lakhi Ephraim chingnü khürü arü;
nü ruyanrü bolung Benjamin lakheah.
Makir chingnü wühkenorübo,
Zebulun chingnü limthorü tso hanrü aki.
15Issakar yakzanshuhrübo Debora lung lakheah;
am, Barak lung Issakar lakheah,
api dunglim jindükhün ching nanachihde yüzah.
Reuben chamnakkhi bolung tode mulong ajamachihkhi lakheah.
16Nü tümü thsükhi mihnu jikhi anide mihnu bolung binkhea?
Reuben chamnakkhi bolung tode mulong ajamachihkhi lakheah.
17Gilead a Jordan hobah la;
tüsho tümüde Dannü sangkungbo lung lakhea?
Ashernü ke mungyean api keampung judü lang bin.
18Zebulun mihtsürübonü arü rhangdung ashepü ching jihdo;
Naphtali she mükeak wung ching jude thsüdo. @SP ACE =
19Kiulongthsürübo arübah keochih;
Kanan kiulongthsürübonü Megiddo keyean Taanak ching keochih tüshe arünü ayankhikhi kukruk, shotoyinchi tümü mulu.
20Thüningbo ching chiningbonü keochih,
arünü arü limrobo chingnü Sisera azhihde keochih.
21Kishon düchinü arü zünde tsodo,
jipü Kishon yung.
Tsahang, I me; sühmüh lade! @SP ACE =
22Judüki khorabo arü biuobonü akhün khungde jukde yü.
23Meroz athruang, Atungpuh yunirünü tha,
ju ching larü khühde athruang,
tümütüsho arünü Atungpuh rungde wuto azhihde keochihpü marü.
24Khide kuhi atsü liberü ju Jael ah,
Kenrü Heber niube–
khimyambo ching lakhi khide kuhi atsü liberü ah.
25Siseranü ke kheang, tüshe anihbenü api kilim niuhke jih;
alibenü phurusük atsü chingnü api kilim niuhke kingkung handarü jih.
26Alibenü khimyam müzam akhah khülang ching,
rhimorü yümlung thripkhüh ching zhim;
alibenü Sisera lak tüsho akuro züthünak;
alibenü api ku chingnü chinkhitshih.
27Ajing kheak api keam,api lungabah; ju ching api yap.
Ajing kheak api keam, api lungabah;
api küching keamkhea, ju ching api sheabah. @SP ACE =
28Sisera abenü ayinripit chingnü abinkhita kheah;
alibenü yakdokhi rhü dunglimnü zhi,
“ Tümüde api khora-lolungbe arüpü khide ashucho?
Tümüde api khorabo nahnah alode marü le?”
29Alibe yo lümlung larü anünürübonü anihbe ki alo,
am, aküdah thsüde alolo,
30“ Arübo ayankhikhi kukruk ngüa chamchoh yung de?
Athrürü aban anünürü khülang yungsho mahne;
Sisera thsungkheak ayankhikhi atsüdak khimmihbo,
kiulongthsübe hung ching yukpü züt-thsükhi kukrukbo.” @SP ACE =
31Jumonü nü riri alala dükheakshang, O Atungpuh !
Tüshe nü muzhorü a ani müzhakde akhiukchoki nangde lashang.
Judüki lomi ju kam yirü thsungkheak mungtsü la.
Currently Selected:
MAHKHAPRÜ 5: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.