MAHKHAPRÜ 3
3
Lomi ching Aninga Lakhi Trükshihbo
1Jumonü Atungpuhnü trükshih harü Israelrü rükakipü Kanan ching thirithsü ching müyüakheahrübo zojih. 2(Ha hodü lang Israel tsührübo püpüki thiri müthsüakheahrü ki thsangyupü lakheah): 3Filistiarü yakzanshuhrü phüngü, Kananrü alala, Sidonrü tüsho Baal-hermon chingnü Lebo-hamath khiungde Lebanon Müzüng kheak larü Hivrübo. 4Arübo ju Atungpuhnü Mosa hode arü bebuhrü kilim jihkhi Atungpuh yukhüm aninahki de Israelrü rükakipü lakheah. 5Junangde Israelrü ju Kananrü, Hivrü, Amorrü, Perizrü, Hitrü tüsho Jebusrü lung lakheah. 6Arünü arü tsührü aliberübo yamkhün thsüpü lu tüsho arü tsührübebo arü tsührü kilim jih, tüsho arünü arü thrünpuhbo tankih.
Othniel
7Jumonü Israelrünü Atungpuh arü Thrünpuh mihabahbah, A TUN GPU H miki amütsü rhimo, tüsho Baal le Ashera sangthsü kingaün. 8Jumonü Atungpuhnü Israelrü kheak bukakhiuk tüsho apinü arübo Mesopotamia kiulongthsüpuh Kushan-rishathaim khah ching yinabah; tüsho Israel tsührübonü kam tizheah Kushan-rishathaim tankih. 9Küyimki Israelrünü Atungpuh ki zhikhea, Israelrü tsührübo bekhitpü thsungkheaknü Kenaz tsührü Kaleb niurü Othniel yüshih. 10Atungpuh me api kheak arü, tüsho apinü Israel mahkhap; api thirithsü ching yü, tüsho Atungpuhnü Mesopotamia kiulongthsüpuh Kushan-rishathaim api khah ching jihde akuk ngüshih. 11Junangde lomi ju kam yirü sühakhim. Jushu Kenaz tsührü Othniel sheabah.
Ehud
12Kheaküshe Israelrünü A TUN GPU H miki amütsü rhimo; jumonü Atungpuhnü Moab kiulongthsüpuh ju Israel azhihde reangzahshih. 13Judüki apinü Amonrü le Amalekrü bebah Israelrü kuk, tüsho arünü ashisang lakhi kiuto luabah. 14Jumonü Israelrünü Moab kiulongthsüpuh Eglon kam thürükheak tizheah tankih.
15Tüsho küyimki Israelrü tsührübonü Atungpuh ki zhikhea, Atungpuhnü bekhitshihpü Benjamin trük chingnü Gera tsührü Ehud, huzulimnü arhimobuh asürüshih. Israelrünü Moab kiulongthsüpuh Eglon kilim api kheaknü ruk mühah-a yüshih. 16Ehudnü nuk khülang thripkhüh thripkhüh ahüyuk, ashanglim khahnap 1nü thsü; tüsho apinü akhim alunglimnü achim tsülimpeang rüma lu. 17Junangde apinü Moab kiulongthsüpuh Eglon kilim thsambah jih. Eglon kiulongthsüpuh ju khide shihkihrü mihtsürü lakheah. 18Küyimki Ehudnü ruk ju jihabahkheanü ruk hanrü mihtsürübo thiyia tsoshih. 19Tüshe apinü Gilgal thüninde lung-mejak mikinü alode yübah kiulongthsüpuh ki tha, “O kiulongthsüpuh, nü thsungkheak inü aramyu khülang lah.” Jumonü kiulongthsüpuhnü tha, “Dalan!” Tüsho api lung larübonü api mikinü wukhiukabah. 20Api arüngmükhing yam achangbe khiungshak ching alangzü binde alachoki Ehudnü api ki arübah tha, “ Thrünpuh kilimnü nü thsungkheak thiyusheak khülang lah.” Jumonü apinü abinpung chingnü asürü. 21Judüki Ehudnü akhah huzulim chungkhitbah achim tsülimnü nuk lu tüsho abuk ching düchipyukjih; 22tüsho nukphi she alala yüzahabah, tüsho amüdangnü nuk ju müleamdo, tümüde apinü abuk chingnü nuk mudukkhit; tüsho bukningbo müleamkhit. 23Judüki Ehudnü mükü hode wukhiuk tüsho achangbe khiungshak ripit mükhipdojih. 24Küyimki api wukhiukkhea, yamlarübo arü, tüsho küyimki arünü achangbe khiungshakbo ju mükhipdoa ngükhea, api akhiungshak ching sühakhimchoh de lüm. 25Jumonü arünü zhoyuk arüde aleang tüsho kheaküshe akhiungshak khimdopü ju mükhimshuh. Jumonü arünü amükhipbe lubah khimshuh; tüshe arü tungpuh ju adampü kheak shea yapa lakheah.
26Tüshe arü ashua lachoki Ehud a tsokhit, tüsho lung-mejak hode yübah Seira lim tsokhit. 27Küyimki api akhiungkhea, apinü Ephraim awung lomi chingnü hulipungpung khung, tüsho Israel tsührübo awung chingnü api lung yüki; tüsho apinü arü be. 28Judüki apinü arü ki tha, “I dunglim yanang, tümüde Atungpuhnü nüsa riri Moabrü nüsa khah ching jihdo.” Jumonü arünü Moab lim yüpü Jordan dükihhopung zhipdo, tüsho sheshe muhoshih. 29Ju kim ching arünü Moabrü 10,000 bande, athrungrü khülang she mutsokhitshihde laksah. 30Ju ni Moabrü ju Israelrü bukkhüp yüzahabah, tüsho lomi ching kam zheahrü mungtsü lakheah.
Shamgar
31Api dunglim limberü Anath tsührü Shamgar lakheah. Apinü moshi kitbe-tsonü Filistiarü 600 laksah; tüsho apinü she Israel bekhit.
Currently Selected:
MAHKHAPRÜ 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
