MAHKHAPRÜ 2
2
Bokim ching Atungpuh Yunirü
1Judüki Atungpuh yunirü Gilgal chingnü Bokim ching atu tüsho tha, “Inü nüsa Ijip chingnü bekhit tüsho inü nüsa jipürü ki alokhikhi lomi ching bedarü; tüsho inü tha, ‘Inü küyimkishe nüsa ki tangzüngkhi müthsümünim. 2Tüsho nüsanü ha lomi ching larü ki tangzüng müthsü; nüsanü arü kingaün sadam thsümünima keamshihbah.’ Tüshe nüsanü I yu mani. Tümüde nüsanü ha rhimokhea? 3Jumonü inü she tha, inü nüsa mikinü arü yankhita mübah; tüshe arü ju nüsa rheang ki ayangbo kamshihbah, tüsho arü thrünpuhbo ju nüsa ki qimürip kamshihbah.” 4Junangde küyimki Atungpuh yunirünü Israelrü alala ki thiyu harü ha asukkhea, mihtsürübonü arü düsheak achangnü trip. 5Tüsho arünü ju dangpung mung ju Bokim de ji; tüsho ju ching arünü Atungpuh kilim laksah-a kingaün jih.
Jihusua Shekhi
6Küyimki Jihusuanü mihtsürübo ju müzütshihkhea, Israel tsührübo abannü alo müküh-a lupü nihbuh yamrüplurüp lim yü. 7Jumonü Jihusua nimungbo alala ching tüsho Jihusua sheshu rhangdung larü, Atungpuhnü Israel ching rhimokhi ato ngürü nimungbo alala ching mihtsürübonü Atungpuh tankih. 8Kheakü Nun tsührü Jihusua Atungpuh yamlarü kam 110 pü ching sheabah. 9Tüsho arünü api ju Gaash Müzüng dukulim, Ephraim müzüngbo ching, Timna Heres ching ayamrüplurüp aredung yean phulung ching kiuyukabah. 10Küyimki ju lün alala arü bebuhrü ki mukhungkhea, Atungpuh mümükheahkhi yungsho Israel thsungkheaknü rhimokhi mümükheahkhi, arü dunglim lün püpü asürü.
Israelnü Atungpuh Kingaünpü Tuklokhi
11Judüki Israelrübonü Atungpuh miki amütsü ju rhimo tüsho Baalbo tankih; 12tüsho arünü arü bebuhrü Atungpuh , Thrünpuh arü Ijip lomi chingnü bekhitbuh bahyuk; tüsho arünü arü mühi lakhi thrünpuhbo ki mükhümde kingaün; tüsho arünü Atungpuh bukakhiukshih. 13Arünü Atungpuh bahyuk tüsho Baal le Astar tankih. 14Tüsho Israel azhihde Atungpuh bukakhiuk. Jumonü apinü arübo ju arü yankhia lurü khah ching jih; tüsho apinü arübo arü mühide lakhi thiriribo khah ching yinabah. Junangde arü riribo miki arübonü müzhipkhukde kam. 15Küyimki arü wukhiukbanü Atungpuhnü athakhi tüsho thiyuchihchimkhi nangde thsümütsüpü Atungpuh khah arü azhihde lakheah. Tüsho arü tode lümthsünü.
16Judüki Atungpuhnü arü yankhia lurü khah chingnü bekhitrü mahkhaprübo asürüshih. 17Tütüshe arünü mahkhaprübo yu mani tüsho arünü püpürü thrünpuhbo kheak müzammüram thsü tüsho arü ki khukning. Arünü nahde arü bebuhrünü atsahkhi limro chingnü, Atungpuh yukhüm anikhi chingnü rholode tso; ju ruk arünü mürhimo. 18Küyimki Atungpuhnü arü thsungkheaknü mahkhaprü arüshihkhea, Atungpuh ju mahkhaprü lung la, tüsho apinü arübo mahkhaprü nimungbo alala ching arü riri khah chingnü khümkhit; tümütüsho arü junode thsümüchirü dünkheaknü tüzhochoki Atungpuhnü mihmuzho huh. 19Tüsho küyimki mahkhaprübo sheabahkhea, arünü rholobah püpürü thrünpuhbo yande, tankihde tüsho khukningde arü bebuhrü kheaknü amütsübe thsüde rhimo. Arünü arü nihbuh rhimokhi chingnü yungsho arü nihnihkhi limro chingnü arün müthsü. 20Jumonü Atungpuhnü Israelrü kheak khide bukakhiukde tha, “ Tümütüsho ha trükshihnü inü arü jipürü ki tangzüngkhi thsümünimdo tüsho I yu mani. 21Inü she Jihusua shechoki aninga lakhi trükshihbo arü müngühnü yankhita mübah, 22junangde jurü hode inü Israelrü ju arü bebuhrünü Atungpuh limro ching tsahkhi nangde rhimonahnü rükakiakheahbah.” 23Jumonü Atungpuhnü jurü trükshihbo nahde yankhita mübahde zojih; yungsho Jihusua khah ching she apinü müjih.
Currently Selected:
MAHKHAPRÜ 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
