MAHKHAPRÜ 20
20
Israelrü Thirithsüpü Thsakhamkhi
1Judüki Israelrü alalanü Dan chingnü Beersheba tüsho Gilead lomi chingnü akhiukbah Atungpuh miki Mizpa ching mukhung. 2Tüsho Israel limberü alala Thrünpuh mihtsürübo mukhungkhi ching arü, tüsho nukshang shuhrü bonungrü 400,000 lakheah. 3(Kheakü Benjaminrünü Israel mihtsürübo Mizpa ching wutudo de so.) Tüsho Israel mihtsürübonü tha, “ Ha athsümünim rhimo künangde adünjikheanü isa ki thaang?” 4Tüshe ashebe yamkhünbuhnü alo, “I tüsho I hanniube Benjaminrü yo Gibea ching azhing ching binkheampü thsüde arü. 5Gibea mihtsürübonü azhing ching I laksahpü thüyam zündode arü; ju müthri arünü I hanniube kheak amütsü thsü tüsho anihbe sheabah. 6Jumonü inü anihbe pang lubah khapthünak tüsho Israel trük thürükheak mahne abande mühah, tümütüsho arünü Israel ching achihbe müzammüram yihbeak. 7Kheakü nüsa alala Israelrü ah; nüsa athsunganah tüsho ha ching lümthiyan jihang.”
8Tüsho mihtsürü alalanü khülang ruk asürübah tha, “Isa she lang she khimyam yungsho thüyam lim müyülo. 9Tüshe kheakü isanü Gibea kheak ha rhimobah: isanü azan thsüde mihtsürü mokhitbah Gibea yanbah. 10Israel ching shihcham thürü chingnü shihcham khülangnü bonungrü ahiuhakhipbah, tüsho püpürübonü yübah Israel ching arünü ha müzammüram yihbeakkhi dünkheak Benjamin ching lakhi Gibea thsümüchibah.” 11Jumonü Israel mihtsürü alala kiuto azhihde mihtsürü khülang kamde mukhung.
12Judüki Israel trükbonü Benjamin trük alala ching mihtsürübo yüshihde tha, “Nüsa bolung dünjikhi athsümünim rhimo ha tümü a? 13Kheakü Gibea ching mihbukmuyuk mihtsürübo jihang, junangde isanü arübo asheshihbah tüsho Israel chingnü amütsü rhimo yihkhita bahbah.” Tüshe Benjamin mihtsürübonü arü keoniorü Israelrü yu mani. 14Ju müthri Benjamin mihtsürübonü Israelrü bede keochihpü arü kiutobo chingnü rukhüh Gibea ching mukhung. 15Ju kim ching Benjamin mihtsürü nukshang shuhrü 26,000 khekhit, ju lung Gibea ching larü amokhitkhi 700 mokhit. 16Harü mihtsürü alala lungnü huzulim-khah mihtsürü 700 amokhitkhi lakheah; mihbüm abannü lunghitliunü kuyübüm kheak mülakphahde kingrhakde alakheah. 17Tüsho Benjamin mükhede, Israel mihtsürü nukshang shuhrü 400,000 khekhit; harü alala thirithsürü lakheah.
Benjamin bede Thirithsükhi
18Tüsho Israel mihtsürünü asürübah Thrünpuh lümkhi keopü Thrünpuh yam ching wutu. Arünü tha, “Benjamin mihtsürü bede keochihpü isa shepü akhuhde awutuba?” Atungpuhnü alo, “ Juda akhuhde awutubah.”
19Jumonü Israel mihtsürünü yapsu asürü tüsho Gibea azhihde binkheampung thsü. 20Israel mihtsürünü Benjamin bede keochihpü wutu tüsho keochihpü bonungrü kiuto lim abinbah zhippung thsakhama lu. 21Benjaminrünü Gibea chingnü akhiuk tüsho Israelrü mihtsürü 22,000 thirithsüpung ching kiua lungshih. 22Tüsho Israel mihtsürübonü khülangnü khülang mulong toa lu tüsho atan ni arü zhippung thsakhambah zhip. 23Israelrünü wutu tüsho arelim khiungde Atungpuh ki trip tüsho Atungpuh ki keokhi. Arünü tha, “Isanü isa keoniorü Benjamin bede keochihpü yüloba shi?” Atungpuhnü alo, “ Arü azhihde wutuang.”
24Jumonü Israel mihtsürünü mahne nipü Benjaminrü azhihde phünide yü. 25Tüsho Benjaminrünü arü azhihde Gibea chingnü mahne nipü wukhiuk, tüsho Israel mihtsürü 18,000 kiua lungshih; harü alala nukshang shuhrü mihtsürü lakheah. 26Judüki Israel mihtsürü bonungrü athrünkhi wutubah Bethel ching arü tüsho trip; arünü Atungpuh miki bin tüsho ju nimung arelim khiungde khümkeak thsü, tüsho Atungpuh miki taka kingaünkhi le mungtsü kingaünbo jih. 27Tüsho Israel mihtsürünü Atungpuh ki keokhi (tümüde ju nimungbo ching Thrünpuh tangzüng sangdan ju ching lakheah, 28tüsho judüki Aron tsührü, Eleazar tsührü Phinehasnü Atungpuh miki tankihde alakheah,) “ Kheaküshe isanü wutuba shi, dashi arün thsüba?” Atungpuhnü tha, “Wutuang; tümüde inü shido arübo nüsa khah ching jihbah.”
29Jumonü Israelrü Gibea mükamde mihtsürü jika binshih. 30Tüsho Israel mihtsürübonü asam nipü Benjaminrü azhihde wutubah püpüki nangde Gibea azhihde thürüna zhip. 31Benjaminrünü mihtsürübo azhihde wukhiuk tüsho kiuto chingnü khanguhde yüa lakheah. Arünü püpüki nangde Israelrü khürü Bethel limro le Gibea limro kheak tüsho mükeak ching laksahpü tankih. Arünü Israelrü 30 bande laksah. 32Benjaminrünü tha, “Püpüki nangde isanü kukdo.” Tüshe Israelrünü rholode arüpü lümkhi thsü tüsho arübo kiuto chingnü limrobo ching yüabahshih. 33Israel mihtsürü alalanü arü dangpung chingnü asürü tüsho Baal-tamar ching ayanpü thsakham; tüsho Israel mihtsürü sherübo jika binkheanü Geba aniyüzahlim thripnü nanachihde akhiuk. 34Israel mihtsürü alala chingnü amokhitkhi 10,000 Gibea azhihde arü, tüsho thirithsü müküpde alakheah; tüshe Benjaminrünü arü kheak thsümütsü lah de mümükheah. 35Atungpuhnü Israel müngüh Benjaminrü kukjih; tüsho Israelrünü ju nimung Benjaminrü 25,100 laksah; harü alala nukshang shuhrü mihtsürü lakheah. 36Jumonü Benjaminrünü arünü mukuk de lümkhit.
Israelrünü Akukkhi
Israel mihtsürübonü Benjaminrü kheaknü rholode arü, tümütüsho arünü Gibea mükamde jika binshihrü kheak mulonglam la. 37Tüsho jika binkhi mihtsürübonü nanachihde Gibea lim yü; jika binkhi mihtsürübonü wukhiukbah kiuto ching alala laksah. 38Kheakü Israel mihtsürü le jika binrü dükeak amütsan khülang mokhüh ato kiuto chingnü thüning lim yükihshihpü thsü, 39tüsho Israel mihtsürübonü keochihpung rholode arüpü lakheah. Ha kim khiungde Benjaminrünü Israel 30 laksah-a lakheah. Arünü arü küdah thsüde tha, “ Akhuhbe rithsü nangde, tsükjide isanü arü kukdo.” 40Tüshe küyimki kiuto chingnü mokhüh khülang yükihpü tankihkhea, Benjaminrünü arü dunglim kheah, tüsho kiuto abümnü mokhüh thüning lim yükihkhi ngü. 41Judüki Israel mihtsürünü arü kilim rholode yü, tüsho Benjaminrü müyinsah, tümütüsho arü kheak thsümütsü arüdo de arünü mükheah. 42Jumonü arünü Israelrü müngüh sunglo lim tso, tüshe arünü mutsokhi. Tüsho kiutobo chingnü akhiukrübo Israelrünü ju ching kiua lungshih. 43Arünü Benjaminrü zündobah yande müsham tüsho aniakhiuklim Gibea mikhuh khiungde laksahde yü. 44Tüsho Benjamin mihtsürü athrungrü 18,000 laksah. 45Jushu arünü sunglo limpeang Rimmon lungto lim yü; tüsho arünü limtobo kheaknü 5000 laksah. Arünü mutuklode Gidom khiungde yande yü tüsho 2000 laksah. 46Ju nimung Benjaminrü alala thsürubah athrungrü 25,000 laksah. 47Tüshe mihtsürü 600 rholobah sunglo limpeang Rimmon lungto lim yü, tüsho ju ching Rimmon lungto ching khinu phüyi lakheah. 48Tüsho Israel mihtsürünü Benjamin mihtsürü azhihde rholode arü tüsho kiuto aban chingnü mihtsürü tüsho shiwüh angükhi alala nukshangnü laksah. Arünü arü yükhi kiuto alala ching mo thsahkih.
Currently Selected:
MAHKHAPRÜ 20: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
