MAHKHAPRÜ 19
19
Levirü tüsho Hanniube
1Judüki nimungbo ching Israel ching kiulongthsürü mülade alakheah. Kheakü Ephraim awung lomi ashang ching lakhi Levirü khülangnü Juda ching lakhi Bethlehem chingnü hanniube khülang lu. 2Tüshe alibenü api ki thiyuro mülakheah. Alibenü api bahjihbah Juda ching lakhi Bethlehem ching abuh yam lim alode yü, tüsho ju ching khinu phüyi amuyung lakheah. 3Judüki aniubuhnü asürü tüsho anihbe ki mushude thabah belodarüpü api lung yamlarü khülang tüsho donki mahne bebah yü. Junangde alibenü api abuh yam ching bede yüzah; tüsho küyimki alibe abuhnü api ngükheanü asühde beyuk. 4Kheakü anihbuh akü, alibe abuhnü api tholo; tüsho apinü anihbuh lung nimung mahsam lakheah. Jumonü arünü tsühyungde ju ching mung. 5Aphüyi nipü arünü mükikde asürü tüsho atsopü thsakham, tüshe alibe abuhnü atsühmeak ki tha, “ Tümükhüh tsühbah müsüalung; jushu nüsa yüang.” 6Jumonü anenü binbah rukhühnü tsühyung. Ju dunglim alibe abuhnü tha, “ Muzhobah khihre binang tüsho nü asühang.” 7Tüsho küyimki mihtsürü junü atsopü wusukheanü, akünü muhde tha, jumonü apinü ju re yap. 8Aphüngü nipü yapsu, küyimki api atsopü asürükhea, alibe abuhnü tha, “Nü müsüalung. Animuro khiungde aleangang!” Jumonü ane rukhühnü yimtsüh. 9Küyimki athrüpü lung anihbuh hanniube tüsho ayamlabuh atsopü wusukheanü, akü, alibe abuhnü tha, “ Kheakü kheahang, azhingpü thsüchoh. Ha ching yapang; zhingabahpü thsüchoh. Binloang tüsho asühang. Shido mükikde asürübah nüsa yam lim yüang.”
10Tüshe mihtsürü junü ju re binpü mümulong; jumonü apinü asürübah chamachih, tüsho Jebus thrip (ju Jirusalem) arü. Api lung hah hankhi donki mahne lakheah; anihbuh hanniube she api lung lakheah. 11Arübo Jebus thüninde lakheah tüsho nimung hoabahde alakheah; tüsho yamlarünü anihbuh putungrü ki tha, “ Muzhobah arang, tüsho alode yübah Jebusrü kiuto ching yapanü.” 12Api putungrünü alo, “Yung, Israel mihtsürü yungkhi khiungkerü kiuto ching isa müyüzah. Isa Gibea lim yübah.” 13Jumonü apinü ayamlabuh ki tha, “ Arang, isanü harü dangpung khürü phünide yüanü tüsho Gibea yungsho Rama ching yapanü.” 14Tüsho arünü tsahhode arü limro yü; tüsho arü Benjaminrü yo Gibea phünide lachoki ani yüzahabah. 15Arünü Gibea ching yappü tuklo. Arünü kiuto wungdo phulung ching yüzahbah bin, tüshe azhing ching thsungkheaknü shenü she arü ju thüyam lim bede müyü.
16Kheakü ashinbuhrü khülang arelim thulu rhimo chingnü alungde alakheah; mihtsürü ju Ephraim awung lomi chingnü ah, tüsho api Gibea ching lakheah; ju dangpung ching larü ju Benjaminrü lakheah. 17Küyimki zünga kheahkhea, apinü kiuto wungdo phulung ching hantsahrü ngü; tüsho ashinbuhnü tha, “Nüsa küchingnü arücho tüsho külim yücho?” 18Apinü alo, “Isa Juda ching lakhi Bethlehem chingnü limshu Ephraim wungbo lim yüchoh. I Juda ching lakhi Bethlehem ching yükheah tüsho I yam lim yüchoh; tüsho shenü she I api yam ching bede müyü. 19Isa yo donkibo thsungkheak sangrung tüsho ajim lah. I lung nü yamlaberü tüsho athrününgtsüng thsungkheak yikhap tüsho yukhu lah; tümü she mülakhi müla.” 20Tüsho ashinbuhnü tha, “Nü lung mungtsü lashang; nü yihnüpü alala I hahmülang thsübah; wungdo phulung ching lang azhing ching düyap.” 21Jumonü apinü arübo ayam ching bede yüzah, tüsho donki tsühyungpü jih; tüsho arü jing müsühbah tsühyung.
22Arübo mulong asühde alachoki, zukleangnü kiuto ching müzammüramrü mihtsürübonü arübah khimdopü kheak yüm. Arünü thüyam putungrü, ashinbuh ki tha, “Nü yam ching arürü mihtsürü bede akhiukang, junangde isanü api kheak müzammürambah!” 23Tüshe thüyam putungrü ashinbuhnü wukhiuk tüsho arü ki tha, “Yung, I keoniorübo, inü nüsa ki mushuchoh, khide mihbukmuyuk dürhimo! Ha mihtsürü I yam ching arükhi ngübah hadürü achihbe dürhimo. 24Kheahang, ha ching I tsührübe atsangkhitkhi tüsho mihtsürübuh hanniube lah; arü kheak nüsa künkhi rhimoang; tüshe ha buh mihtsürü kheak hadürü achihbe dürhimo!” 25Tüshe mihtsürübonü api ki mani. Jumonü mihtsürübuhnü anihbuh hanniube arü kilim bede wukhiuk. Tüsho arünü tsüngreroro yapsu khiungde amütsü thsüde rhimo; tüsho küyimki ayinkhikheanü arünü anihbe tsoshih. 26Yapsu mükikde alibenü arü tüsho anihbe putungrü lapung yam khimdopü ki ayinkhi khiungde yap.
27Küyimki anihbe putungrü yapsu asürübah nihbuh limro yüpü khimdopübo khimshuhkhea, api hanniube thüyam khimdopü lim akhah chungbah yapa lakheah. 28Tüsho apinü alibe ki tha, “ Asürang tüsho isa yüanü.” Tüshe malojih. Jumonü mihtsürü junü donki kheak alibe ju shuhkih tüsho api lapung lim yü. 29Küyimki api ayam ching yüzahkhea, apinü nukjip khülang lu tüsho thürükheak mahne thsüde khapthünakbah Israel trük thürükheak mahne abande mühah-a yüshih. 30Jumonü ha ngürü alalanü tha, “Israel mihtsürü Ijip chingnü atubah khihni khiungde hadürü mürhimo yungsho müngüakheah. Ha lümakheahang! Tümü thsübanü isa ki thaang!”
Currently Selected:
MAHKHAPRÜ 19: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
