MAHKHAPRÜ 18
18
Mika tüsho Dan Trük
1Judüki nimungbo ching Israel ching kiulongthsürübo mülade alakheah. Tüsho Dan trük arü lapung yimde alakheah, tümüde Israel trük bolung arü alo müngüyide alakheah. 2Jumonü Danrünü athrungrü phüngü lomi züta kheahshihpü Zora tüsho Eshtaol chingnü yüshih. Harü mihtsürübo ju arü guk aban chingnü alakheah. Arünü arübo ki tha, “Yüang, lomi züta kheahang.” Jumonü arünü Ephraim müzüngbo ching, Mika yam lim yü tüsho ju ching bin. 3Küyimki arü Mika yam ching lakheanü, arünü athrününgtsüng Levibuh düsheak mütsankhit. Arünü tsahhuhbah api ki tha, “Nü shenü ha ching bedarükhea? Nü ha ching tümü rhimocho?” 4Apinü arü ki tha, “ Mikanü I thsungkheak ha rhimodo. Apinü I muloa lu, tüsho I api yo amükeamrü kam.” 5Jumonü arünü api ki tha, “ Muzhobah Thrünpuh ki keojang, junangde isa akuk ngüde hantsahba shi yungnü amükheahbah.” 6Tüsho amükeambuhnü arü ki tha, “ Mungtsü chingnü yüang. Nüsa limro ching Thrünpuh nüsa lung lashang.”
7Jumonü mihtsürü phüngü ju chamachih tüsho Laish ching yü. Ju ching mihtsürübo ju Sidonrü yakli nangde keamramde tüsho kuram tsükhi ching lakheah. Arü ki achih kippü thsüde lomi ching yakzanshuhrü mülakheah. Arübo Sidonrü kheaknü limshude alakheah tüsho she kheak she chingkihachihde müla. 8Judüki zütakheahrübo arü keoniorü kilim Zora tüsho Eshtaol ching arü, tüsho arü keoniorübonü tha, “Nüsa yusheak tümü a?” 9Arünü tha, “ Asürang, isanü arü azhihde wutuanü. Tümüde isanü alo ngüdo tüsho ju khide tsülah. Nüsanü tümü müthsübea de? Alo müküh-a lupü yüzahpü nüsanü düdükiuhlo. 10Küyimki nüsa yübanü, kuram tsükhi mihtsürü tüsho alo ato ching arübah. Tümüde ha lomi kheak tümü müngüde mülapung dangpung khülang Thrünpuhnü nüsa khah ching jihdo.”
11Judüki Dan guk chingnü thsühnuk hanbah keochihpü Zora tüsho Eshtaol chingnü mihtsürü 600 tsahmusu. 12Arünü wutubah Juda ching lakhi Kiriath-jearim ching binkheam. Hamonü khihni khiungde aniyüzahlim Kiriath-jearim dangpung ki Mahane-dan de jichoh; 13ju chingnü arübo Ephraim awung lomi ching yü tüsho Mika yam ching arü.
14Judüki mihtsürü phüngü Laish lomi zütakheahrünü arü keoniorübo ki tha, “ Ha yambo ching kingaünbe kukruk, yambuk sangthsübo, asümkhi tüsho anungkhi sangthsübo lah de nüsanü mükheahnah? Kheakü jumonü nüsanü tümü thsübanü lümakheahang.” 15Jumonü arünü rholobah athrününgtsüng Levibuh lapung, Mika yam ching arü tüsho api ki salüm jih. 16Dan mihtsürü 600 thsühnuk hankhi ju chipiripit ki zhip. 17Judüki lomi zütakheahrü mihtsürü phüngünü wutu tüsho yüzahbah asümkhi sangthsü, kingaünbe kukruk, yambuk sangthsü, tüsho anungkhi sangthsübo lu. Amükeambuh ju mihtsürü 600 thirithsü thsühnuk hanrü lung ripit ki zhip. 18Küyimki harübo Mika yam ching yüzahbah asümkhi sangthsü, kingaünbe kukruk, yambuk sangthsü, tüsho anungkhi sangthsübo lukhea, amükeambuhnü arü ki tha, “Nüsa tümü thsücho?” 19Tüsho arünü api ki tha, “Dalan, nü khahnü nü mün hümbah isa lung arang; isa ki athsunganahrü tüsho amükeamrü thsang. Nünü mihtsürü yambuk khülang ki amükeamrü atsübea shi, dashi Israel ching trük tüsho yamkhün khülang yo amükeamrü thsükhi atsübea?” 20Junangde amükeambuh mulong asühde kam, tüsho apinü kingaünbe kukruk, yambuk sangthsü, asümkhi sangthsü lubah mihtsürübo lung yü.
21Arünü arü tsührü anini, shiwühbo tüsho lakhitbo arü müngüh yüshihbah rholode tso. 22Küyimki arü Mika yam chingnü anükhüh yüa lakhea, Mika yam phünide alarü mihtsürü mukhungbah Danrü yanphuhde arü. 23Arü dunglim arünü azhichoki, Danrünü rholobah Mika ki tha, “Nü tümü thsüa nü mihtsürübo keochihpü jimukhunga la?” 24Apinü alo, “Nüsanü inü athsükhi thrünpuhbo le I yo amükeamrü lude tsoa lah. I tümü lale de nüsanü I ki keocho, ‘Nü tümü thsüa la?’” 25Danrünü alo, “Isa kheak datsangachih, jude yungsho bukmüke mihtsürü khürünü nü zündobah, tüsho nü le nü yamkhün rhangdung dükheakbah.” 26Judüki Danrübo arü limro ching yüabah. Tüsho Mikanü arübo api thsungkheak khide müküplah de angüchoki, rholobah ayam lim alode yü.
27Jumonü arünü Mikanü athsükhi kukrukbo tüsho api yo amükeamrü lu tüsho keamramde tüsho kuram tsüde alarü mihtsürü kilim Laish ching yü; tüsho arünü nukshang mulonü arü laksah tüsho monü kiuto takabah. 28Arü khümkhitrü she mülakheah, tümütüsho ju Sidon chingnü limshude alakheah, tüsho arünü she kheak chingkihachih-a müla. Ju Beth-rehob jindükhün ching lakheah. Jumonü arünü kiuto thrünlobah ju ching la. 29Tüsho arünü kiuto mung ju Israel kilim zübejihkhi arü bebuhrü Dan mung jimulode Dan de ji. Tüshe adüso kiuto mung ju Laish lakheah. 30Judüki Danrünü arü thsungkheak asümkhi sangthsü zhipshih; tüsho Mosa tsührü, Gershon tsührü Jonathan tüsho api tsührübo lomi ramtso ching lakhi khiungde Dan trük amükeamrübo lakheah. 31Thrünpuh yam Shilo ching lakhi kim amuyung, Mikanü athsükhi sangthsü mutukzhakde zo.
Currently Selected:
MAHKHAPRÜ 18: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
