MAHKHAPRÜ 17
17
Mika Sangthsübo
1Kheakü mihtsürü khülang Ephraim müzüngbo ching, amung Mika lakheah. 2Tüsho apinü abe ki tha, “Inü sode nünü alubuh muthrumüneankhi shotoyinchi 1100 I kilim lah; ju inü alukheah.” Tüsho abenü api ki tha, “I tsah-a, Atungpuhnü nü müngühshang!” 3Jumonü küyimki apinü shotoyinchi 1100 ju abe kilim jihlokhea, abenü tha, “Inü I tsührü thsungkheak sangthsü thsüjihpü I khah ching shotoyinchi Atungpuh kilim abümnü müsühkhitdo; jumonü nü kilim jihlobah.” 4Hanangde apinü shotoyinchi abe kilim jihlo. Jushu abenü shotoyinchi 200 yinchizünrü kilim jih, tüsho apinü junü sangthsü khülang thsübah shotoyinchinü lüpdo; tüsho jurübo Mika yam ching lakheah. 5Mika a arüngakopung khülang lakheah, tüsho arüngako kukruk tüsho yambuk sangthsübo thsüa lakheah; tüsho apinü atsührü khülang amükeamrü thsüshih. 6Judüki nimungbo ching Israel ching kiulongthsürü mülakheah; mihbüm abannü nihbuh mük ki tümü alungkianü ju rhimo.
7Kheakü Juda ching lakhi Bethlehem chingnü Juda yamkhün yo athrününgtsüng mihtsürü khülang lakheah; api ju Levirü lakheah tüsho ju ching yünü alakheah. 8Mihtsürü junü anihbuhnü angükhi dangpung ching lapü Juda ching lakhi Bethlehem chingnü chamachih. Jushu apinü hantsahde Ephraim awungbo ching Mika yam lim arü. 9Tüsho Mikanü api ki tha, “Nü küchingnü arücho?” Apinü anihbuh ki alo, “I Juda ching lakhi Bethlehem chingnü Levirü khülang ah, tüsho I alapü lapung yimchoh.” 10Mikanü api ki tha, “I lung laang, tüsho I athsunganahrü tüsho I yo amükeamrü thsang, tüsho inü nü kilim kam chingnü shotoyinchi 10 jihbah tüsho khimmih le tsühyungbe jihbah.” Jumonü Levibuhnü yüzah. 11Judüki Levibuhnü ju mihtsürü lung lapü reangkeamde alakheah; tüsho athrününgtsüng ju api tsührü nangde kamabah. 12Jumonü Mikanü Levibuh tsangkhit, tüsho api ju anihbuh yo amükeamrü kamshih, tüsho Mika yam ching la. 13Mikanü tha, “ Kheakü Atungpuhnü I ki tsüde alabah de mükheahlah, tümütüsho I a Levirü amükeamrü khülang lah!”
Currently Selected:
MAHKHAPRÜ 17: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
